ދައުލަތުގެ ބެލުމުގެ ދަށުގައި ހުއްޓާ ގެއްލުނު އުމުރުން 14 އަހަރުގެ ޝައިމް ޢަބްދުﷲ ގެއްލުނު މައްސަލައިގައި މިނިސްޓަރ އޮފް ޖެންޑަރ ފެމިލީ އެންޑް ސޯޝަލް ސަރވިސަސް ޝިދާތާ ޝަރީފް ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީއަށް ޙާޒިރުކޮށްފިއެވެ.
ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީއަށް ޖެންޑަރ މިނިސްޓަރ ޝިދާތާ ޙާޒިރުކޮށްފައިވަނީ މިރޭގެ ވަގުތެއްގައެވެ. ނަމަވެސް ކޮމެޓީގެ ބައްދަލުވުން ކުރިއަށްގެންގޮސްފައިވަނީ ސިއްރުންނެވެ. ހިއުމަން ރައިޓްސް އެންޑް ޖެންޑަރ ކޮމިޓީއަކީ 19 ވަނަ ރައްޔިތުންގެ މަޖިލީހުގައި މުޅިން އަލަށް އެކުލަވާލި ކޮމެޓީއެކެވެ. މި ކޮމެޓީ އެކުލެވިގެންވަނީ ޖުމްލަ 10 މެންބަރުންގެ މައްޗަށެވެ. އަދި ކޮމެޓީގެ މުޤައްރިރުކަން ކުރައްވަނީ ހިންނަވަރު ދާއިރާގެ މެންބަރު ޖީހާން މަޙްމޫދެވެ.
ދަޢުލަތުގެ ބެލުމުގެ ދަށުގައި ކުޑަކުދިންގެ ހިޔާގައި ހުއްޓާ ޝައިމް ގެއްލިފައިވަނީ މިމަހުގެ 18 ވަނަ ދުވަހުއެވެ. ޝައިމް ގެއްލިފައިވާތާ ހަފްތާއަކަށްވުރެ ގިނަ ދުވަސްވެފައިވާއިރު އެކުއްޖާގެ އެއްވެސް ޚަބަރެއް މޯލްޑިވްސް ޕޮލިސް ސަރވިސްއަށްވެސް އަދި ޖެންޑަރ މިނިސްޓްރީއަށްވެސް މިހާތަނަށް ހޯދިފައެއް ނުވެއެވެ. ޝައިމް މީގެ ކުރިންވެސް ފިލާފައިވާކަމަށް ޖެންޑަރ މިނިސްޓްރީން ވިދާޅުވެފައިވެއެވެ، އަދި ޝައިމް ދެވަނަ ފަހަރަށް ފެނިފައިވަނީ ފުލުހުން އެހެން މައްސަލައަކާއި ގުޅިގެން ކުރަމުންދިޔަ ތަޙުގީގެއްގެ ތެރެއިން ކަމަށާއި އެފަހަރު ޝައިމް ހޯދާފައިވަނީ ކުށުގެ ވެށިންކަމަށްވެސް ޖެންޑަރ މިނިސްޓްރީން ދާދިފަހުން ބޭއްވި ނޫސްވެރިންގެ ބައްދަލުވުމެއްގައި މިނިސްޓަރ ޝިދާތާ ވަނީ ވިދާޅުވެފައެވެ.
ޝައިމް ކުޑަކުދިންގެ ހިޔާއަށް ލާފައިވަނީ އެފަދަ ކުދިންގެ ކަންކަން ބެލުމަށް ޚާއްސަ މަރުކަޒެއްވެސް އަދި އެކުދިން ބަލަހައްޓަން ބޭނުންވާ ތަމްރީން ލިބިފައިވާ މަރުކަޒެއް ނެތުމުންކަމަށް ޖެންޑަރ މިނިސްޓްރީން ވިދާޅުވެފައިވެއެވެ. މި މައްސަލައިގައި ގިނަ ބައެއްގެ ފާޑުކިއުން ޖެންޑަރ މިނިސްޓްރީއަށް އަމާޒުވެފައިވާއިރު، މިކަމުގެ ކަންބޮޑުވުން ކުޑަކުދިންގެ ހައްޤުތަކަށް މަސައްކަތްކުރާ ރާއްޖޭގެ އަމިއްލަ ޖަމިއްޔާ ޖަމާއަތްތަކުންވެސް ވަނީ ފާޅުކޮށްފައެވެ.
މި މައްސަލައިގެ މަޢުލޫމާތު ހޯދުމަށް ޖެންޑަރ މިނިސްޓަރ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމެޓީއަށް ހާޒިރުކޮށްފައިވާއިރު، މި މައްސަލައިގައި އެޗް.އާރް.ސީ.އެމް އިން ކުރަމުންގެންދާ ތަހުގީގާއި ގުޅޭ އަވަސް ރިޕޯޓެއް ރައްޔިތުންގެ މަޖިލީހަށްވެސް ވަނީ ހުށަހަޅާފައެވެ.