މަޖީދިއްޔާ ސްކޫލަށް 65 އަހަރުފުރުމުގެ މުސާބަތުގައި އެ ސްކޫލުން ވަޅުވި ޓައިމް ކެޕްސޫލް ގެއްލިގެން ހޯދަމުންދަނިކޮށް އޭގައި ބައިތަކާއި އޭގައި ރައްކާކޮށްފައި ހުރި ބައެއް ތަކެތި ހޯދައިފިއެވެ. މި ތަކެތި ފެނިފައިވަނީ ދަރުމަވަންތަ ސްކޫލްގެ ގޯތިތެރޭގައި ވަޅުލެވިފައި ހުއްޓާކަމަށް، އެސްކޫލްގެ އިސް ދަރިވަރަކުވަނީ ޕީއެސްއެމް ނިއުސްއަށް މަޢުލުމާތު ދެއްވާފައެވެ.
އޭނާ ވިދާޅުވީ ކެޕްސޫލް ވަޅުލިތަން ހޯދައި، އެތަން ކޮނެ ބެލިއިރު، ކެޕްސޫލްގެ ގޮތުގައި ވަޅުލި ބޮޑު ހަމުގެ އެއްވެސް ނިޝާނެއް އެތަނުގައި ފެންނަން ނެތް ކަމަށެވެ. ނަމަވެސް ކެޕްސޫލްގައި ރައްކާކުރި ގިނަތަކެތި ދަރުމަވަންތަ ސްކޫލްގެ ގޯތިތެރޭގައި، ކެޕްސޫލް ވަޅުލިތަނުގެ ބިމުގެ އަޑިން ފެނިފައިވާކަމަށެވެ.
މަޖީދިއްޔާ ސްކޫލްގެ ބައެއް އިސްދަރިވަރުން ވިދާޅުވީ، އެތަން ކޮނުމުގެ ތެރޭގައި، އޭރުގެ ބައެއް ދަރިވަރުންގެ ޔުނީފޯމާއި، ސްކޫލާގުޅޭ ރިޕޯޓްތަކާއި، ކުދިން ލިޔެފައިވާ ސިޓީއާއި، ސްކޫލަށް އެކި މުބާރާތްތަކުގައި ލިބުނު ޓްރޮފީއާއި، ސްކޫލް ބޭންޑުގައި ބޭނުންކުރި ބައެއް އިންސްޓްރޫމަންޓްތަކާއި، ސްކޫލްގެ ނިޝާން ޖަހާފައިވާ ލިޔުންތައްވެސް ފެނިފައިވާކަމަށެވެ. އޭނާ ވިދާޅުވީ އެތަނުން ފެނުނު ތަކެއްޗަކީ 1992ވަނަ އަހަރު ކެޕްސޫލްގައި ވަޅުލި ތަކެތިކަން ޔަގީންވާކަމަށެވެ. މި ތަކެތި ހުރީ ކެޕްސޫލްއަށް ލުމަށްޓަކައި ވެކިއުމް ޕެކްތަކުގައި ރައްކާތެރިކުރި ގޮތަށެވެ. މި ތަކެތި ކެޕްސޫލްއަށް ލާފައިވަނީ ދިގުމުއްދަތަކަށް ގެއްލުން ނުލިބި ހުންނާނެގޮތަށް ހަދާފައެވެ. ނަމަވެސް ކެޕްސޫލުން ނެގުމުގެ ސަބަބުން ފެނުނު ތަކެތިވަނީ ވަރަށް ބޮޑަށް ވެއްޔާއެކުވެ ހަޑިވެފައެވެ.
އެނާ ވިދާޅުވީ ކެޕްސޫލް އޮތް ތަނަށް ކޮންސްޓަރކްޝަން ސައިޓްގައި ބޭނުންކުރާ ހެވީ ވެހިކަލްއެއް ގަނބައިގެންދިޔަކަން، އެތާގައި މަސައްކަތްކުރާ މީހުންގެ ވާހަކައިން އިންގޭކަމަށެވެ. އަދި ބެލެވޭ ގޮތުގައި އެމީހުންނަށް އެ ކެޕްސޫލްގައި ހުރި އެއްޗެހިތައް ފެނި ނަގާފައިވާކަމުގެ ނިޝާންތައް ފެންނަން ހުރިކަމަށް އޭނާ ވިދާޅުވިއެވެ. އެއީ އެތަނުގައި ކެޕްސޫލްގެ ގޮތުގައި ވަޅުލި ހަން ފެންނަން ނެތް ނަމަވެސް، ކެޕްސޫލްގައި ހުރި ބައެއް ތަކެތި އެތަނުގެ ބިމުގެ ފަސްގަނޑުގެ ތެރެއިން ނަގާފައިވާތީކަމަށް އޭނާ ވިދާޅުވިއވެެ.
ޕީއެސްއެމްއަށް މަޢުލޫމާތުދެއްވަމުން މަޖީދިއްޔަގެ ބައެއް އިސް ދަރިވަރު ވިދާޅުވެފައިވަނީ، އެތަނުން ބޮޑު ހަމެއް ފެނުނުކަމަށް ސައިޓްގައި މަސައްކަތް ކުރާ ބިދޭސީން ބުނެފައިވާކަމަށެވެ. އަދި އެހަން މިހާރު ތިލަފުއްޓަށް އެއްލާލާފައިވާކަމަށް އެމީހުންވަނީ ބުނެފައެވެ. އޭނާ ވިދާޅުވީ މަޖީދިއްޔާ ސްކޫލުން ވަޅުލާފައިވަނީ ރަތް ކުލައިގެ ހަމެއްކަމަށެވެ. އެހެންކަމުން މި ހަމުގެ އެއްވެސް ނިޝާނެ ފެނޭތޯ ބެލުމަށް، މާދަމާ ތިލަފުއްޓަށް ދިއުމަށް އިސް ދަރުވަރުންތަކެއް ނިންމާފައިވާކަަމށެވެ.
1992ވަނަ އަހަރު ވަޅުލި އެކެޕްސޫލަކީ މަޖީދިއްޔާ ސްކޫލަށް 100އަހަރު ފުރޭމުނާސަބަތުގައި ނެގުމަށް ވަޅުލި ކެޕްސޫލްއެކެވެ. ކެޕްސޫލް ވަޅުލިތާ 27އަހަރު ވެފައިވާއިރު، މި ކެޕްސޫލް ހުޅުވުމަށް ނިންމާފައި އޮތީ 2027ވަނަ އަހަރުއެވެ.
ނަމަވެސް މިހާރު ހަދަމުންދާ ދަރުމަވަންތަ ސްކޫލްގެ ގޯތި ތެރޭގައި އޮތް ކެޕްސޫލް މަޖީދިއްޔާ ސްކޫލްގެ މިއަހަރުގެ އަހަރީ ދުވަހު، މަޖީދިއްޔާ ގޯތު ތެރެއަށް ބަދަލުކުރުމަށް ސްކޫލާއި، އެޑިއުކޭޝަން މިނިސްޓްރީން ނިންމިއެވެ. ދަރުމަވަންތަ ސްކޫލަކީ ކުރިން މަޖިދިއްސާ ސްކޫލުގެ ބައެކެވެ. ފަހުން މަޖީދިއްޔާ ދެބައިކޮށް ދަރުމަވަންތަ އުފެއްދުމުން ޓައިމް ކެޕްސޫލް ވަޅުލި ސަރަހައްދު ހިމެނުނީ ދަރުމަވަންތަ ސްކޫލުގައެވެ