ޔޫއެފާ ޗެމްޕިއަންސް ލީގުގެ ކުއާޓާ ފައިނަލްގައި މެންޗެސްޓާ ޔުނައިޓެޑުން ބާސެލޯނާއާ ދެކޮޅަށް ކުޅެ، ބަލިވީ އެގްރިގޭޓް 4-0ގެ ނަތީޖާއަކުންނެވެ.
ފުރަތަމަ ލެގުގައި އަމިއްލަ ދަނޑުގައި 1-0ގެ ނަތީޖާއަކުން ބަލިވި އިރު، ރޭގެ މެޗުގައި ބަލިވީ 3-0ގެ ނަތީޖާއަކުންނެވެ. ދެ ލެގަށް ބަލާ އިރު، ބާސާ ފެނުނީ ޔުނައިޓެޑަށްވުރެ ތަފާތު މޮޅު ލެވެލްއެއްގައެވެ.
ރޭގެ މެޗުގައި ބާސާގެ ދެ ގޯލް ކެޕްޓަން ލިއޮނަލް މެސީ ޖެހިއިރު ތިންވަނަ ގޯލަކީ ފިލިޕް ކުޓީނިއޯ ޖަހައިދިން ގޯލެކެވެ.
ރޭގެ މެޗަށްފަހު ޔުނައިޓެޑްގެ ކޯޗު އޮލި ގުނަ ސޯލްޝެއާ ބުނީ ވަނީ ބާސާގެ ފެންވަރަށް ތައުރީފް ކުރަން ޖެހޭ ކަމަށާއި، ޒަމާންވީ ތާރީހު އޮތް، ޔުނައިޓެޑްގެ އަސްލު ފެންވަރަކީ ބާސާއާ ވާދަކުރެވޭ ފެންވަރު ކަމަށެވެ. އެކަމަށް ޔުނައިޓެޑުން މަސައްކަތް ކުރަން ޖެހޭ ކަމަށާއި، ޔުނައިޓެޑުން ބާސާ ލެވެލްއަށް ދާން ގިނަ ކަންކަން ކުރަން ޖެހިފައިވާ ކަމަށްވެސް ސޯލްޝެއާ ބުންޏެވެ.
ސޯލްޝެއާއާއެކު ޔުނައިޓެޑުން ސީޒަން އަނބުރާލި އިރު، އެންމެ ބޮޑު ކާމިޔާބީއެއްވެސް މިހާތަނަށް ހޯދީ ޗެމްޕިއަންސް ލީގުގައެވެ. ބާސާ ދަނޑުގައި 1998 ވަނަ އަހަރުގެ ޗެމްޕިއަންސް ލީގުގެ ފައިނަލްގައި ބަޔާން މިއުނިކް ކޮޅަށް މޮޅުވި ގޯލްވެސް ޖެހި ސޯލްޝެއާ ރޭ ނުކުތީ އޭނާގެ ކާމިޔާބު ހަނދާންތައް ތަކުރާރު ކުރުމަށެވެ. ނަމަވެސް އެކަން ކުރެވޭގޮތެއް ނުވިއެވެ.