ޢާމްދަނީއެއް ނުލިބޭ، ބޯހިޔާވަހިކަން ނެތް އެންމެނަށް މިސަރުކާރުން ހިލޭ ބޯހިޔާވަހިކަން ފޯރުކޮށްދެއްވާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، އާޓިފިޝަލް ބީޗް ސަރަޙައްދުގައި އެމްޑީޕީން ބޭއްވި ކެމްޕެއިން ޙަރަކާތެއްގައި ވާހަކަފުޅު ދައްކަވަމުންނެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ، މި ސަރުކާރުން ބޯހިޔާވަހިކަމުގެ މަޝްރޫޢު ކުރިއަށް ގެންދާނީ ތިން ބަޔަކަށް ބަހާލައިގެންކަމަށެވެ. ފުރަތަމަ ބަޔަކީ ޢާމްދަނީ ނުލިބި ބޯހިޔާވަހިކަން ނެތް ހުރިހާ މީހުންނަށްވެސް ހިލޭ ބޯހިޔާވަހިކަން ސަރުކާރުން ފޯރުކޯށްދިނުންކަމަށް ރައީސް ވިދާޅުވިއެވެ. ދެވަނަ ބަޔަކީ ލިބޭ ޢާމްދަނީން ކުލި ދައްކައިގެން ދެކޮޅު ނުޖެއްސޭ ފަރާތްތަކަށް ސަރުކާރުން އެހީތެރިވެދެއްވުންކަމަށް ރައީސް ވިދާޅުވިއެވެ.
އަދި ބޯހިޔާވަހިކަމުގެ ތިންވަނަ ބައެއްގެ ގޮތުގައި ރައީސް ފާހަގަކުރެއްވީ، ފްލެޓް ގަންނަން ބޭނުންވާ ފަރާތްތަކަށް ފްލެޓް ލިބޭނެ ގޮތް ހަދައިދީ ލުއި ލޯން ލިބޭނެގޮތް ހެއްދަވުމެވެ. ރައީސް ވަނީ މި ސަރުކާރުގެ ވެރިކަމުގެ ފަސް އަހަރު ނިމިގެންދާއިރު ބޯހިޔާވަހިކަން ނެތް އެއްވެސް ދިވެހި ރައްޔިތަކު ނުހުންނާނެކަމަށް ވަޢުދުވެޑައިގެންފައެވެ.
މި ސަރުކާރުން ހިންގާ ބޯހިޔާ ވަހިކަމުގެ ފުތަމަ މަޝްރޫޢުގައި ހިމެނޭ އެޕާޓްމަންޓުތަކުގައި ހިމެނޭނީ 950 އަކަފޫޓްގެ ތިން ކޮޓަރިކަމަށާ، އަދި އެތަނުގެ މަހު ކުލި ހަހާސް ރުފިޔާއަށްވުރެ މަތި ނުވާނެކަމަށްވެސް ރައީސް ވަނީ ވިދާޅުވެފައެވެ.
ބޯހިޔާވަހިކަމުގައި މާލޭގެ ހާލަތު މާ ގޯސްކަމަށް އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ. އެހެންކަމުން މާލެއަކީ ފަސޭހައިން ދިރިއުޅޭވޭނެ ތަނަކަށް ހަދަންޖެހިފައިވާކަމަށްވެސް ރައީސް ވިދާޅުވިއެވެ. އެ މަސައްކަތް ސަރުކާރުން މިހާރުވެސް ފަށްޓަވައިގެން ކުރިއަށް ގެންދާކަން ފާހަގަކުރައްވަމުން އެމަނިކުފާނުވަނީ ކުރީގެ ސަރުކާރުން ހުޅުމާލޭގައި ހިޔާ މަޝްރޫޢުގެ ނަމުގައި ކުރިއަށް ގެންދިޔަ ހަތްހާސް ފްލެޓް މަޝްރޫޢު ކުރިއަށް ގެންދިޔަގޮތަށް އަނެއްކާވެސް ވަރަށް ބޮޑަށް ފާޑުވިދާޅުވެ ވާހަކަފުޅު ދައްކަވާފައެވެ.
"ޚާއްޞަކޮށް މާލޭގެ ރައްޔިތުންނަށް މިއަދު ދިރިއުޅުމުގައި ދިމާވެފައިވާ އެންމެ ބޮޑު ދައްޗަކީ، ބޯހިޔާވަހިކަމުގެ މައްސަލަ. އެކަން ހައްލު ނުވެ ފަސޭހަ ދިރިއުޅުމެއް އުޅެވޭކަށް ނެތް. ލިބޭ ޢާމްދަނީ ހުސްކޮށްލަން މިޖެހެނީ ތަނުގެ ކުއްޔަށް. އެހެންވީމާ ފަސޭހަ ލުއިގޮތެއްގައި ބޯހިޔާވަހިކަން ހޯދައިދޭން މާލޭގެ ރައްޔިތުންނަށް އެބަޖެހޭ." ރައީސް ވިދާޅުވިއެވެ.
މާލޭގެ ރައްޔިތުންނަށް ޚާއްޞަ ބޯހިޔާވަހިކަމުގެ ބިޔަ މަޝްރޫއެއް ވަރަށް އަވަހަށް ފަށްޓަވަން ނިންމަވާފައިވާކަމަށް ރައީސް ޞާލިޙް ވަނީ މިދިޔަ މަހުގެ 18 ވަނަ ދުވަހު ވިދާޅުވެފައެވެ. ހުޅުމާލޭގައި އިތުރު 4000 ހައުސިންގ ޔުނިޓް އިމާރާތްކޮށް، ބޯހިޔާވަހިކަމުގެ އަގު ހެޔޮކޮށްދެއްވާނެކަމަށް ރައީސުލްޖުމްހޫރިއްޔާ ވަނީ މިއަހަރަށް މަޖިލިސް ހުޅުވުމަށް ދެއްވި ރިޔާސީ ބަޔާނުގައިވެސް ވިދާޅުވެފައެވެ. ހިޔާ މަޝްރޫޢުގެ ދަށުން ހުޅުމާލޭ 2ވަނަ ފިޔަވަހީގައި އިމާރާތްކުރަމުންދާ 7000 ހައުސިންގ ޔުނިޓުގެ ކޮންސެޕްޓަށް ބަދަލުތަކެއް ގެނެއުމަށްވެސް ސަރުކާރުން ވަނީ ނިންމަވާފައެވެ.