ނުކުޅެދުންތެރިކަން ހުންނަ ފަރާތްތަކަށް އެމްޓީސީސީއިން ދެމުންގެންދާ ފެރީއާއި ބަހުގެ ޙިދުމަތް ހިލޭ ލިބޭނެ އިންތިޒާމް ހަމަޖައްސައިފިއެވެ.
އެމް.ޓީ.ސީ.ސީން މަޢުލޫމާތުދޭ ގޮތުގައި އެންސްޕާގައި ރަޖިސްޓްރީކޮށްފައިވާ ނުކުޅެދުންތެރިކަން ހުންނަ ފަރާތްތަކަށް އެންސްޕާއިން ފޯރުކޮށްދޭ ކާޑު ހިއްޕަވައިގެން ވަޑައިގެންނެވުމުން އެފަރާތްތަކަށް އެމްޓީސީސީން ފޯރުކޮށްދެމުންދާ ދަތުރުފަތުރުގެ ޙިދުމަތްތައް ހިލޭ ލިބޭނެކަމަށެވެ. އަދި މިފަދަ އިންތިޒާމެއް ހަމަޖެއްސުމުގެ އެންމެ ބޮޑު ބޭނުމަކީ ނުކުޅެދުންތެރިކަން ހުންނަ ފަރާތްތައް މުޖުތަމައުގެ ތެރޭގައި ބާރުވެރިކޮށް، އެފަރާތްތަކަށް ލިބޭ ޙިދުމަތްތައް ލުއި ފަސޭހަކޮށްދިނުންކަމަށް އެކުންފުނިން ބުނެއެވެ.
އެމްޓީސީސީގެ ފެރީ ގިމަތައާއި، ފެރީތަކާއި، ހުޅުމާލޭގައި ދުއްވާ ބަސްތައްވެސް ފަރުމާކޮށްފައިވަނީ ނުކުޅެދުންތެރިކަން ހުންނަ ފަރާތްތަކަށް އަރާ ފޭބުމަށް ފަސޭހަވާނެވާނެ ފަދަ ގޮތަކަށެވެ.
ނުކުޅެދުންތެރިކަން ހުންނަ ފަރާތްތައް ބާރުވެރިކޮށް އެފަރާތްތަކަށް މުޖުތަމައު ތެރޭގައި ފުރުސަތުތައް ފަހިކޮށް ދިނުމަށް އެމްޓީސީސީން ތަފާތު މަސައްކަތްތައް ކުރަމުންދެއެވެ. އަދި ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުސަތު ފަހިކޮށްދިނުމުގެ ދާއިރާއިން ގައުމީ އިނާމުވެސް އެމްޓީސީސީން 2016 އަހަރު ވަނީ ހާސިލުކޮށްފައެވެ.