އަޑުއިވުމުގެ އަދި ވާހަކަދެއްކުމުގެ ދަތިތައް ހުންނަ ކުޑަކުދިންނަށާއި ޒުވާނުންނަށް ހާއްސަކޮށްގެން "ސްޕީޗް އެންޑް ހިއަރިންގ" ކޭމްޕެއް އައްޑޫ ސިޓީގައި ހިންގައިފިއެވެ.
އައްޑޫ ސިޓީގައި ކުރިއަށްގެންދިޔަ މި ކޭމްޕަކީ އެޑްވޮކޭޓިންގ ދަ ރައިޓްސް އޮފް ޗިލްޑްރެން، އާކްއާއި ބިއުޓިފުލް އައިޒް ޑައުން ސިންޑްރޯމް އެސޯސިއޭޝަނާ ގުޅިގެން ކުރިއަށްގެންދިޔަ ޙާއްސަ ކޭމްޕެކެވެ.
މި މަހުގެ 4 އިން 6 އަކަށް ކުރިއަށް ގެންދިޔަ މިކޭމްޕްގައި ރާއްޖެއިން ބޭރުގެ ސްޕީޗް ތެރަޕިސްޓަކަށް ހިތަދޫ ރީޖަނަލް ހޮސްޕިޓަލުގައި ހިލޭ ދެއްކުމުގެ ފުރުސަތާއި، ވަކިވަކި ކުދިންނަށް އެސެސްމަންޓްތައް ހެދުމާއި، ޑައިގްނޯޒްކުރުން އަދި އޯޑިއޯމެޓްރިކް ޓެސްޓް ހެދުމުގެ ފުރުސަތު ފަހިކޮށްދީފައިވެއެވެ. އަދި މިކޭމްޕްގައި ބެލެނިވެރިންނަށް ގޭތެރޭގައި ކުރިއަށްގެންދެވިދާނެ ބައެއް އިންޓަވެންޝަންތަކުގެ މުހިއްމު މަޢުލޫމާތުވެސް ވަނީ ފޯރުކޮށްދީފައެވެ.
މީގެ އިތުރުން، އައްޑޫ ސިޓީގެ ގުޅިފައިވާ ރަށްތަކުގައި ހިންގާ 6 ސްކޫލެއްގައި ކިޔަވަމުންދާ ނުކުޅެދުންތެރިކަން ހުންނަ ކުދިންނާއެކު މަސައްކަތްކުރާ 30 އަށްވުރެ ގިނަ ޓީޗަރުންނަށް އަމާޒުކޮށްގެން 2 ދުވަހުގެ ހާއްސަ ވޯކްޝޮޕެއްވެސް ކުރިއަށް ގެންގޮސްފައިވެއެވެ. މިވޯކްޝޮޕްގައި "އިމްޕްރޫވިންގ އާޓިކިއުލޭޝަން އެންޑް ސްޕީޗް" އަދި "މިނިމައިޒިންގ ކޮމިއުނިކޭޝަން ޗެލެންޖަސް"ގެ އިތުރުން، ކްލާސްރޫމްގައި ކިޔަވައިދިނުމުގައި ޓީޗަރުންނަށް ކުރެވޭނެ މުހިއްމު ކަންތައްތަކާގުޅޭ މަޢުލޫމާތުތައްވެސް ފޯރުކޮށްދީފައިވެއެވެ.