ޗެމްޕިއަންސް ލީގުގައި ލިވަޕޫލާ ދެކޮޅަށް ކުޅެން ބަޔާން މިއުނިކްގެ ފޯވަޑް ކިންގްސްލީ ކޯމަން ފިޓްވެއްޖެއެވެ.
މިކަން ޔަގީންވީ ބަޔާން މިއުނިކުން މިއީ އުފާވެރި ހަބަރެއްކަމަށް ސިފަކޮށް ސޯޝަލް މީޑިއާގައި މިކަން އިއުލާނުކުރުމުންނެވެ.
އުމުރުން 22 އަހަރުގެ ފޯވަޑް ވަނީ ހުކުރު ދުވަހު އޯގްސްބާގް އާ ދެކޮޅަށް ކުޅެ ދެ ގޯލު ޖަހާފައެވެ. އޭނާ ވަނީ މި ސީޒަނުގައި ކުޅުނު 15 މެޗުގައި ޖުމްލަ 5 ފަސް ގޯލު ޖަހާފައެވެ. އަންގާރަ ދުވަހުގެ ރޭ ލިވަޕޫލާ ދެކޮޅަށް ކުޅޭ މެޗަކީ ބަޔާނުން ސިފަ ކުރާ ގޮތުގައި މި ސީޒަނުގައި އެޓީމު މިހާތަނަށް ކުޅޭނެ އެންމެ އުނދަގޫ މެޗެވެ.
މި ދެ ޓީމު ވެސް ވަނީ މިހާތަނަށް ޗެމްޕިއަންސް ލީގު ފަސް ފަހަރު ކާމިޔާބުކޮށްފައެވެ. ނަމަވެސް ނިމިދިޔަ ސީޒަނަށް ބަލާއިރު ޗެމްޕިއަންސް ލީގުގައި ބަޔާންއަށްވުރެ ލިވަޕޫލްގެ ކާމިޔާބީތައް ރަނގަޅެވެ. އެމީހުން ވަނީ އެންމެ ފަހުގެ މުބާރާތުގެ ފައިނަލްގައި ކުޅެފައެވެ. ބަޔާނަށް މިދިޔަ ހަތަރު އަހަރު ތެރޭގައި ފައިނަލަށް ދެވިފައެއްނުވެއެވެ.