ވިޝުއަލް އަރޓްސްގެ ދާއިރާގައި މަސައްކަތް ކުރާ ފަރާތްތަކުގެ ޚިޔާލު ހޯދުމަށް ޚާއްޞަ ފޯރަމެއް ބާއްވަނީ

ރާއްޖޭގެ ވިޝުއަލް އަރޓްސްގެ ދާއިރާގައި ހުރި ކަންބޮޑުވުންތަކާއި، އެ ދާއިރާގައި ހުރި މައްސަލަތައް ދެނެގަތުމަށް ޚާއްސަ ފޯރަމެއް ބާއްވަން ނިންމައިފިއެވެ.

މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖާއި، ނެޝެނަލް ސެންޓަރ ފޯރ ދި އާޓްސް، އެން.ސީ.އޭ ގުޅިގެން ބާއްވާ މި ފޯރަމް އޮންނާނީ މިމަހުގެ 6 ވާ ބުދަ ދުވަހުގެ ރޭ ޝީ ބިލްޑިންގެ 3 ވަނަ ފަންގިފިލާގައެވެ.

"ވިޝުއަލް އާޓްސް ދާއިރާގެ ފަންނާނުންގެ ފޯރަމް" މި ނަމުގައި ބާއްވާ މި ފޯރަމުގައި ރާއްޖޭގައި ހަރަކާތްތެރިވާ ކުރެހުންތެރިންނާއި، ފޮޓޯގްރާފަރުންނާއި، ގްރެފިކް ޑިޒައިނަރުންގެ އިތުރުން އަތްތެރި މަސައްކަތުގެ ފަންނުވެރިންނަށް ބައިވެރިވުމުގެ ފުރުޞަތު ހުޅުވާލާފައިވާކަމަށް މިނިސްޓްރީ އޮފް އަރޓްސް، ކަލްޗަރ އެންޑް ހެރިޓޭޖުން މަޢުލޫމާތުދެއްވައެވެ. އަދި މި ފޯރަމްގައި އެފަރާތްތަކުގެ ހުރި ކަންބޮޑުވުންތަކާއި، ރާއްޖޭގެ ވިއުޝަލް އަރޓްސްގެ ދާއިރާ އިތުރަށް ފުޅާކޮށް ތަރައްޤީކުރުމުގައި ހުރި ގޮންޖެހުންތަކާއި މައްސަލަތައް، ކަމާބެހޭ ފަރާތްތަކުގެ ސަމާލުކަމަށް ގެނެއުމުގެ ފުރުޞަތު ލިބިގެންދާނެކަމަށްވެސް އެ މިނިސްޓްރީން ވިދާޅުވެއެވެ.

ވިޝުއަލް އަރޓްސްގެ ދާއިރާގައި މަސައްކަތް ކުރާ ފަރާތްތަކަށް އަމާޒުކޮށްގެން ޙާއްސަ ފޯރަމެއް ބޭއްވުމަށް ނިންމާފައިވާއިރު، ރާއްޖޭގެ މިއުޒިކް އިންޑަސްޓްރީގައި މަސައްކަތް ކުރާ ފަރާތްތަކާއި، ފިލްމް އިންޑަސްޓްރީގައި މަސައްކަތް ކުރާ ފަރާތްތަކުގެ ޚިޔާލާއި، މަޝްވަރާ ހޯދުމުގެ ގޮތުން ދެ ފޯރަމެއް މީގެ ކުރިންވެސް ބާއްވާފައިވެއެވެ.