ކައުންސިލްތަކަށް ޤާނޫނީގޮތުން ބާރުވެރިކުރުވަމުން ނުފުދޭކަމަށާއި، މާލީގޮތުންވެސް ބާރުވެރިކުރުމަށް ޢާންމުން ޚިޔާލު ހުށައަޅައިފިއެވެ. ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނު އިޞްލާޙުކުރުމަށް ޚިޔާލު ހޯދުމަށް ބޭއްވި "ޖަޒީރާ ހޮޅުއަށި"ގައި ޢާނމުންގެ ފަރާތުން އެ ޤާނޫނަށް ގެންނަން ފެންނަ ގިނަ ޚިޔާލުތައް ހުށައަޅާފައިވެއެވެ.
ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިއްގުމުގެ ޤާނޫނަކީ 2010ވަނަ އަހަރު ފާސްކުރި ޤާނޫނެކެވެ. މިޤާނޫނުގެ ދަށުން 2011ވަނަ އަހަރު ފުރަތަމަ ފަހަރަށް ކައުންސިލްތައް އިންތިޚާބުކޮށް މިޤާނޫނަށް ޢަމަލުކުރާތާ މިހާރު މިވަނީ 8 އަހަރުވެފައެވެ. މިހާ ދުވަސް ފާއިތުވިނަމަވެސް ލާމަޒރުކަޒީ އުސޫލުން ރާއްޖެ ހިންގުމުގައި ބޮޑެތި މައްސަލަތަކެއް ހުރިކަން ސަރުކާރުން ފާހަގަކުރައްވައެވެ. އެހެންކަމުން ރައީސް އިބްރާހީމް މުޙައްމަދު ޞަލިޙްގެ ސަރުކާރުގެ ފުރަތަމަ 100 ދުވަހު އެ ޤާނޫނަށް އިޞްލާހު ގެންނަވާ މަޖިލީހަށް ހުށައެޅުމަށް ވަނީ ކަނޑައަޅުއްވާފައެވެ. އެގޮތުން މިސަރުކާރުން މިޤާނޫނަށް ގެންނަންބޭނުންވާ އިޞްލާޙުތަކަށް ޚިޔާލު ހޯދުމަށް ބޭއްވި ބައްދަލުވުން ފަށްޓަވާދެއްވައި ވާހަކަފުޅު ދައްކަވަމުން ރައީސް ވިދާޅުވީ، ރިޔާސީ އިންތިޚާބުގެ ކުރިން ރައްޔިތުންގެ ފަރާތުން އިވުނު އަޑަކީ ވީހާވެސް ގާތުން ޚިދުމަތްދެވޭ ގޮތްހެދުންކަމަށާއި، ޚާއްޞަކޮށް ސަރުކާރުގެ ސިޔާސަތުގައި ރައްޔިތުންގެ ޚިޔާލު ހޯދުމަށެވެ. އެ އަޑުއަހާގެން ސަރުކާރުން އެގޮތަށް ޢަމަލުކުރަމުން އަންނަކަމަށް ރައީސް ވިދާޅުވިއެވެ.
ލާމަރުކަޒީ ނިޒާމަށް ޚިޔާލު ހުށައެޅި ޢާންމުންވެސް އެންމެ ބޮޑަށް ފާހަގަކޮށްފައިވަނީ މާލީ ގޮތުން ކައުންސިލްތައް ބާރުވެރިކުރުވުމަށެވެ. ބައެއް ފަރާތްތަކުން ވަނީ ލޯކަލްގަވަރުމަންޓް އޮތޮރިޓީގެ ބޯޑުގެ މެންބަރުން އިތުރުކޮށް ރައްޔިތުންނާއި އެންމެ ގުޅުންހުރި ވުޒާރާތަކުން ބަންދޫބުން ޢައްޔަންކުރުމަށެވެ.
މިނިޒާމަށް ޚިޔާލު ހުށަހެޅި އެހެން ފަރާތަކުންވަނީ އަތޮޅު ކައުންސިލްތަކުގެ ބަދަލުގައި އަތޮޅު އޮފީސް ޤާއިމްކުރުމަށް ނިންމާ ރައީސުލްޖުމްހޫރިއްޔާއަށް އެންމެ އިތުބާރު ހިފޭ ބޭފުޅަކު ސަރުކާރުން އަތޮޅުތަކަށް ކަނޑައަޅާ ސިޔާސަތުތައް އަދި ތަރައްޤީގެ މަޝްރޫޢުތައް ބެލުމަށް ކަނޑައެޅުމަށެވެ. އޭނާ ވަނީ ރަށު ކައުންސިލުން ކުރާ މަސައްކަތް އަތޮޅު ކައުންސިލްތަކުން ކުރާކަމަށް ވިދާޅުވެ އަތޮޅު ކައުންސިލްތައް އުވާލުމަށް ޚިޔާލު ހުށައަޅާފައެވެ. މީގެ އިތުރުން ބައެއް ފަރާތްތަކުން ވަނީ އަންހެނުންގެ ކޮމިޓީތައްވެސް މާލީ ގޮތުން ފުދުންތެރި ހަރުދަނާ ބަޔަކަށް ހެދުމަށްވެސް ޚިޔާލު ހުށައަޅާފައެވެ.
އައްޑޫ ސިޓީއަށް ނިސްބަތްވާ ބައެއް ފަރާތްތަކުން ހުށައެޅި ޚިޔާލުތަކުގައި އައްޑޫ ސިޓީ މީދޫ ގުޅިފައިވާ ރަށްތަކާއި ވަކިން އޮތުމުގެ ސަބަބަބުން ސިޓީ ކައުންސިލުން ނިންމާ ނިންމުންތަކުގައި އެފަރާތްތަކުގެ ހިއްސާ ނުހިމެނޭކަމަށެވެ. އަދި ޚިދުމަތް ދިނުމުގައި ތަފާތުކުރާކަން ފާހަގަކޮށް ވަނީ މީދޫއަކީ އައްޑޫ ސިޓީގެ ރަށެއްގެ ގޮތުގައި ނުހިމަނާ ވަކި ރަށެއްގެ ގޮތުގައި ބޭއްވުމަށް ޚިޔާލު ހުށައަޅާފައެވެ. މީގެ އިތުރުން ކައުންސިލްތަކުގެ ދައުރު ތިން އަހަރުން ފަސް އަހަރަށް ބަދަލުކުރުމަށްވެސް ޚިޔާލު ހުށައެޅިއެވެ. އަދި މާލީ ބާރުވެރިކަން ކައުންސިލްތަކަށް ދޫކުރުމަށް ގިނަ ބަޔަކު ޚިޔާލު ހުށައެޅިއެވެ.
ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް ސަރުކާރުން ބޮޑެތި ގިނަ އިޞްލާޙުތަކެއް ގެނައުމަށް ނިންމާފައިވާއިރު، މިހާތަނަށް އެއް ޤާނޫނަކަށް އެންމެ އިޞްލާޙު ގެނެސްފައިވާ ޤާނޫނުކަން ފާހަގަކޮށްލެވެއެވެ.