އަތްތެރި މަސައްކަތްތައް ކުރިއެރުވުމާ ގުޅޭގޮތުން އިކޮނޮމިކް މިނިސްޓަރާއި އާރޓްސް، ކަލްޗަރ އެންޑް ހެރިޓޭޖް މިނިސްޓަރ މަޝްވަރާކުރައްވައިފިއެވެ.
އިކޮނޮމިކް މިނިސްޓްރީގައި ބޭއްވި މަޝްވަރާ ބައްދަލުވުމުގައި މި ބައްދަލުވުމުގައި މައިގަނޑު ގޮތެއްގައި މަޝްވަރާކޮށްފައިވަނީ ރާއްޖޭގައި އަތްތެރި މަސައްކަތްތަކުގެ ވިޔަފާރިތަކަށް ދިމާވާ ދަތިތައް ހައްލުކޮށް، އެމަސައްކަތްތައް ކުރިއެރުވެން ކުރެވޭނެ މަސައްކަތްތަކާ ގުޅޭގޮތުންނެވެ. މީގެ އިތުރުން އަތްތެރި މަސައްކަތްކޮށް ފުޅާކޮށް، އެމަސައްކަތް ކުރިއެރުވުމަށް އިކޮނޮމިކް މިނިސްޓްރީން ކުރެވިދާނެ މަސައްކަތްތަކާ ގުޅޭގޮތުންވެސް މިބައްދަލުވުމުގައި މަޝްވަރާކުރެއްވިއެވެ.
ކުދި އަދި މެދު ފަންތީގެ ވިޔަފާރިތަކަށް މިހާރު ހުރި އެންމެ ބޮޑު ދަތިކަމަކީ ފައިސާ ނުލިބުންކަމަށް އިކޮނޮމިކް މިނިސްޓަރ މީގެ ކުރިން ވަނީ ވިދާޅުވެފައެވެ. އަދި މިކަމަށް ހައްލެއް ހޯދައިދިނުމުގެ ގޮތުން ސަރުކާރުން އެސް.އެމް.އީ ބޭންކްގެ ނަމުގައި ބޭންކެއް އުފެއްދުމަށް އަންނަނީ ތައްޔާރުވަމުންނެވެ. އެސް.އެމް.އީ ބޭންކް ވެގެންދާނީ ކުދި ވިޔަފާރިތަކަށް ވަރަށް ބޮޑު އެހީތެރިކަމެއް ފޯރުކޮށްދޭ ބޭންކަކަށްކަމަށް ސަރުކާރުން ބުނެއެވެ. އެހެން ބޭންކްތަކާއި ޙިލާފަށް މި ބޭންކުން ކުދި ވިޔަފާރިތަކަށް ލޯނުނަގާއިރު ލުއިތަކެއް ލިބިގެންދާނެކަމަށް ސަރުކާރުން ވަނީ ބުނެފައެވެ.