ކުރީގެ ސަރުކާރުން ކައުންސިލަރުންނާމެދު އަޅަފައިވާ ފިޔަވަޅުތައް މުރާޖަޢާކުރުމުގެ މަސައްކަތް ފަށައިފިއެވެ.
ހޯމް މިނިސްޓަރ އިމްރާން އަބްދުﷲ ވިދާޅުވީ ސިޔާސި ސަބަބުތަކާހުރެ ކައުންސިލަރުންނާމެދު ފިޔަވަޅު އެޅުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ސަރުކާރުން ކުރާނެކަމެއް ނޫންކަމަށެވެ. އެހެންކަމުން ކައުންސިލަރުންނާމެދު އަޅަފައިވާ ނުޙައްޤު ފިޔަވަޅުތައް މުރާޖަޢާ ކުރަންފަށާފައިވާކަމަށާއި، ވަރަށް އަވަހަށް އެމައްސަލަތައް ނިންމާ އިންސާފް ޤާއިމްވެގެންދާނެކަމަށެވެ.
ކައުންސިލްތަކުގެ ބެލެނިވެރި ފަރާތް ލޯކަލް ގަވަރމަންޓް އޮތޯރިޓީ، އެލް.ޖީ.އޭގެ ރައީސްކަންވެސް ކުރައްވާ ހޯމް މިނިސްޓަރ އިމްރާން ޢަބްދުﷲ މިހެން ވިދާޅުވެފައިވާއިރު، ކުރީގެ ރައީސް ޢަބްދުﷲ ޔާމީންގެ ސަރުކާރުގައި އެކި ސަބަބުތަކާހުރެ ގިނަ ކައުންސިލްތަކަކާއި ކައުންސިލަރުންނާމެދު ވަނީ ފިޔަވަޅު އަޅާ، ސަސްޕެންޑްކޮށްފައެވެ. އަދި ކައުންސިލްތަކުގެ ބާރުތައް ކުޑަކޮށް ސަރުކާރަށް ހުރިހާ ބާރެއް ވަނީ ސަރުކާރަށް ނަގާފައެވެ.
ނަމަވެސް ރައީސް އިބްރާހީމް މުޙައްމަދު ޞާލިޙް ވަނީ ކުރީގެ ސަރުކާރުން ނަގާފައިވާ ކައުންސިލްތަކުގެ ބާރުތައް އަނބުރާ ކައުންސިލްތަކަށް ދޭން ފަށާފައެވެ. އެގޮތުން ސަރުކާރުން ވަނީ ލާމަރުކަޒީ ޤާނޫނަށް ބޮޑެތި އިޞްލާޙުތަކެއް ގެންނަންޖެހޭކަން ފާހަގަކުރައްވާ އެ މަސައްކަތް ފަށާފައެވެ.
އެ އިޞްލާޙުތަކުގެ ސަބަބުން ކައުންސިލްތައް މިހާރަށްވުރެ ހަރަކާތްތެރިވެ، ހިންގުން ހަރުދަނާ ވެގެންދާނެކަމަށް ސަރުކާރުން ދެކެއެވެ. ކައުންސިލްތައް ބާރުވެރިކުރުމުގެ އިތުރުން، ކައުންސިލްތަކަށް ލިބޭ ޢާމްދަނީ އިތުރުކޮށްދިނުމަށްވެސް ސަރުކާރުން ދަނީ މަސައްކަތް ކުރަމުންނެވެ.