ކުރީގެ ރައީސުންނަށް މަޖިލީހަށް ވާދަނުކުރެވޭ އިސްލާޙު ފާސްވިޔަސް ތަސްދީޤެއް ނުކުރާނަން - ރައީސް
ރައީސުންނަށް މަޖިލީހުގެ އިންތިޚާބުގައި ވާދަނުކުރެވޭ އިސްލާޙު ފާސްވިޔަސް ތަސްދީޤު ނުކުރައްވާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސުލްޖުމްހޫރިއްޔާކަށް ކުރައްވާފައިވާ ބޭފުޅަކަށް ރައްޔިތުންގެ މަޖިލީހުގެ މެންބަރަކަށް ނުވެވޭނެގޮތަށް ރައްޔިތުންގެ މަޖިލީހުގެ ދިއްދޫ ދާއިރާގެ މެމްބަރު ޢަބްދުއްލަތީފު މުޙައްމަދު ވަނީ ޤާނޫނު އަސާސީއަށް އިޞްލާހެއް ހުށައަޅުއްވާފައިވާފައެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި މި އިސްލާޙް މަޖިލީހުން ފާސްވެއްޖެނަމަ ތަސްދީޤްކުރައްވާނެތޯ ނޫސްވެރިއަކު ދެންނެވުމުން ރައީސް ވިދާޅުވީ އެ އިސްލާޙު ރައްޔިތުންގެ މަޖިލީހުން ފާސްކުރެއްވިޔަސް ތަސްދީޤު ނުކުރައްވާނެކަމަށެވެ. ރައީސް ވިދާލުވީ އެއްވެސް މީހެއްގެ ސިޔާސީ މަސައްކަތަކަށް ހުރަސްއެޅޭ އެއްވެސް އިޞްލާހަކަށް ތާޢީދުނުކުރައްވާނެ ކަމަށެވެ.
"ރައީސްކަން ކުރައްވާފައިވާ ބޭފުޅަކަށް ކުރިމަތިނުލެވޭގޮތަށް ޤާނޫނު އަސާސީއަށް އެ ގެންނަ އިޞްލާޙު އަޅުގަނޑު ތަސްދީޤެއް ނުކުރާނަން،" ރައީސް ވިދާޅުވިއެވެ.
ރައީސުލްޖުމްހޫރިއްޔާ މިހެން ވިދާޅުވެފައިވާއިރު ޤާނޫނު އަސާސީގެ 91 ވަނަ މާއްދާގައި ވަނީ ރައްޔިތުންގެ މަޖިލީހުން ފާސްވެގެން ރައީސުލްޖުމްހޫރިއްޔާ ތަސްދީޤްކުރުމަށް ފޮނުވާލި ބިލެއް ތަސްދީޤްކުރަން އޮންނަ މުއްދަތުގައި އެ ބިލަކާމެދު އަލުން ވިސްނުމަށް ނުވަތަ އިޞްލާޙެއް ގެނައުމަށް ރައްޔިތުންގެ މަޖިލީހަށް އަނބުރާ ނުފޮނުވައިފިނަމަ ރައީސުލްޖުމްހޫރިއްޔާ އެ ބިލް ތަސްދީޤްކުރީކަމަށްބަލާ ސަރުކާރުގެ ގެޒެޓްގައި ޝައިޢުކުރަންވާނެ ކަމަށެވެ.
ރައީސްކަން ކުރައްވާފައިވާ ބޭފުޅަކަށް މަޖިލީހަށް ވާދަނުކުރެވޭ ގޮތަށް މީގެ ކުރިންވެސް މަޖިލީހަށް އިޞްލާހެއް ހުށައަޅުއްވަފައިވާއިރު، އެ އިޞްލާޙު ނުނަންގަވާ އަނެއްކާވެސް އިޞްލާޙު ހުށައަޅުއްވާފައިވަނީ، ޤާނޫނު އަސާސީގެ 73ވަނަ މާއްދާގެ (ހ)އަށް ނަންބަރެއް އިތުރުކުރުމަށެވެ.
މިހާރު ޤާނޫނު އަސާސީގެ 73ވަނަ މާއްދާގެ (ހ)ގައި ބަޔާންކޮށްފައިވަނީ ރައްޔިތުންގެ މަޖިލީހުގެ މެންބަރުކަމަށް އިންތިޚާބުކުރެވޭ މީހެއްހެއްގެ ކިބާގައި ފުރިހަމަ ވާންޖެހޭ ޝަރުތުތަކެވެ. މި މާއްދާގައި މިހާރު މެންބަރަކަށް ވުމުގެ ޝަރުތުގެ ތެރޭގައި ކުރީގެ ރައީސުން ހިމަނާފައެއްނުވެއެވެ.
ރައްޔިތުންގެ މަޖިލީހުގެ ޤަވާއިދު ބުނާގޮތުން ޤާނޫނު އަސާސީއަށް އިޞްލާޙެއް ގެނައުމަށް ފާސްވާނީ މަޖިލީހުގެ ޖުމްލަ މެންބަރުންގެ ހަތަރުބައިކުޅަ ތިންބައިގެ އަޣްލަބިއްޔަތުންނެވެ. އިޞްލާޙު ހުށަހެޅުއްވި މެންބަރު ލަތީފް ވިދާޅުވީ ޤާނޫނު އަސާސީގައި ރައީސްކަން ކުރައްވާފައިވާ ބޭފުޅަކަށް ކުރިމަތިލެވޭގޮތަށް ކުރިން އޮތީ 2008ވަނަ އަހަރުގެ ކުރީގެ ހާލަތަށް ރިޔާއަތްކޮށްކަމަށެވެ.
އެހެންނަމަވެސް މި ފާއިތުވި ދިހަ އަހަރުގެ ތެރޭގައި އެ ޙާލަތަށް ބަދަލުތަކެއް އައިސްފައިވާކަމަށާ، ރައީސްކަން ކުރައްވާފައިވާ ގިނަ ބޭފުޅުންތަކެއް މިއަދު ރާއްޖޭގައި އެބަތިއްބެވިކަމަށް ލަތީފް ވިދާޅުވިއެވެ. އެބޭފުޅުންނަށް އެކި އިނާޔަތްތަކާއި ސެކިއުރިޓީއާއި އެނޫންވެސް ގިނަ ޚަރަދުތަކެއް ދައުލަތުން ކުރައްވާކަމަށާއި އެބޭފުޅުންކީ ޢިއްޒަތާއި ޤަދަރު ލިބިވަޑައިގެންތިއްބެވި ބޭފުޅުންތަކެއްކަން ލަޠީފް ފާހަގަކުރެއްވިއެވެ.
ކުރީގެ ރައީސުންނަށް މަޖިލީހަށް ވާދަނުކުރެއްވޭނެ އިސްލާހެއް ޤާނޫނޫ އަސާސީއަށް ހުށައަޅުއްވާފައިވާއިރު، އަންނަ އޭޕްރިލްމަހު ބާއްވާ ރައްޔިތުންގެ މަޖިލީހުގެ އިންތިޚާބުގައި ވާދަކުރެއްވުމަށް ކުރީގެ ރައީސް މުހައްމަދު ނަޝީދު ގެންދަވަނީ ކެމްޕެއިން ކުރައްވަމުންނެވެ. އަދި ކުރީގެ ރައީސް އަބްދުﷲ ޔާމީންވެސް ވަނީ މަޖިލީހަށް ވާދަކުރެއްވުމުގެ ވިސްނުންފުޅު ގެންގުޅުއްވާކަން ހާމަކުރައްވާފައެވެ.