އަދިވެސް ޤަބޫލުފުޅުކުރައްވަނީ އެންމެ ރަނގަޅުގޮތަކީ މަޖިލިސް އިންތިޚާބަށް އެކުގައި ސަރުކާރުގެ ކޯލިޝަނުން ވާދަކުރުންކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުމުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވީ، މަޖިލިސް އިންތިޚާބުގައި ވާދަކުރުމަށް އެއްބަސްވުން ޤާއިމްކޮށްފައިވާނީ އެމްޑީޕީއާއި ޖުމްހޫރީ ޕާޓީއާއި އަދާލަތު ޕާޓީން އެކަނި ކަމަށެވެ. އެ އެއްބަސްވުމުގައި ކޯލިޝަންގެ އަނެއް ބައިވެރިޔާކަމުގައިވާ ރައީސް މަޢުމޫންގެ ފަރާތްޕުޅުން ސޮއިކުރައްވާފައިނުވާ ކަމަށް ރައީސް ވިދާޅުވިއެވެ. އަދި ހުރިހާ ޕާޓީއެއް އެއްބަސްވެފައިވާ އެއްބަސްވުމެއް ނޯންނާނެކަމަށް ރައީސް ވިދާޅުވިއެވެ. އަދި އެފަދަ އެއްބަސްވުމަކަށް ނާދެވުނީ ޚިޔާލުތަފާތުވެގެން ކަމަށް ރައީސް ޞާލިޙު ވިދާޅުވިއެވެ.
ރައީސް ޞާލިޙު ވިދާޅުވީ ރިޔާސީ އިންތިޚާބަށްފަހު ކުރިއަށް އޮތް މަޖިލިސް އިންތިޚާބާއި ކައުންސިލް އިންތިޚާބަށް ކޯލިޝަންގައި ހިމެނޭ ހުރިހާ ސިޔާސީ ޕާޓީތަކެއް ގުޅިގެން އެކުގައި މަސައްކަތް ކުރުމަށް އެއްބަސްވުމަށް އައުމަށް މަސައްކަތް ކުރެއްވި ކަމަށެވެ. ނަމަވެސް ރިޔާސީ އިންތިޚާބަށް އެއްބަސްވުމެއް އެކުލަވާލެވުނުއިރު، ދެން އޮތް އިންތިޚާބުތަކަށް އެއްބަސްވުމެއް އެކުލަވާލުމުގެ މަސައްކަތް ފުރިހަމަ ކުރެވިފައި ނުވާ ކަމަށް ރައީސް ވިދާޅުވިއެވެ.
ރައީސް ވިދާޅުވީ، ކުރިއަށް އޮތް މަޖިލީހުގައި އެމަނިކުފާނު ބޭނުންފުޅުވަނީ ސަރުކާރު ކޯލިޝަންގައި ހިމެނޭ ހަތަރު ޕާޓީއަށް މެޖޯރިޓީއޮތް މަޖިލީހެއް ކަމަށެވެ. އަދި އެއީ ސަރުކާރުގެ ވަޢުދުތައް ފުއްދުމަށް މަޖިލީހުގެ ތެރެއިން ތާޢީދުލިބޭ މެޖޯރިޓީއަކަށް ވާންވާނެކަމަށް ރައީސް ވިދާޅުވިއެވެ.
"އަޅުގަނޑު ދެކެން ބޭނުން ރައްޔިތުންގެ މަޖިލީހުގައި ހަތަރު ޕާޓީގެ މެންބަރުންތިބޭތަން. އެއާ އެކީގައި ސަރުކާރަށް މެޖޯރީޓީއޮތް މަޖިލީހެއް އަޅުގަނޑު ބޭނުންވަނީ،" ރައީސް ވިދާޅުވިއެވެ.
ޕާޓީތަކުގެ މެދުގައި ޚިޔާލުތަފާތުވުން އުފެދިފައިވާ މައްސަލައަށް އިޝާރާތްކުރައްވާ ޕީއެސްއެމް ނިއުސްއިން ދެންނެވި ސުވާލަކަށް ޖަވާބުދެއްވަމުން ރައީސް ވިދާޅުވީ، ކޯލިޝަން ދެމިއޮންނާނެކަމުގެ ފުރިހަމަ ޔަޤީންކަން އެބައޮތް ކަމަށެވެ. އަދި ކޯލިޝަން ދެމެހެއްޓުމަށް ހަތަރު ލީޑަރުންވެސް މަސައްކަތްކުރައްވާނެ ކަމަށާއި ކޯލިޝަންގައި ހަމަނުޖެހުން އުފެދޭނެ ކަމެއް އެއްވެސް ލީޑަރަކު ކުރިތަން ފެނިވަޑައިގެންފައިނުވާކަމަށް ރައީސް ވިދާޅުވިއެވެ.
ރައީސް ޞާލިޙު ވިދާޅުވީ ޚިޔާލު ތަފާތުވުން އުފެދިފައިވާކަމަށް ފެނިވަޑައިގަންނަވަނީ، ކޮންމެ ޕާޓީއަކުންވެސް އެންމެ ގިނަ ގޮނޑި ކާމިޔާބުކުރުމަށް މަސައްކަތްކުރާތީ ކަމަށެވެ. ނަމަވެސް އެއީ ކޯލިޝަން ރޫޅެންވީ ސަބަބެއް ނޫންކަމަށް ރައީށް ފާހަގަކުރެއްވިއެވެ. ހަތަރު ލީޑަރުން ކޯލިޝަން އެކުލަވާލީވެސް ޚިޔާލުތަފާތުވުން ހުންނާނެކަން އެނގިގެންކަމަށާއި، އެ ޚިޔާލުތަފާތުވުންތާއެކު ކުރިއަށް ދިއުމަކީ ހަތަރު ލީޑަރުންވެސް އެއްބަސްވެވަޑައިގެންނެވި ގޮތް ކަމަށް ރައީސް ޞާލިޙު ވިދާޅުވިއެވެ.
"މަޖިލީހުގެ އިންތީޚާބުގައި އެކީގައި ކުރިއަށް ދާނެތޯ ނުވަތަ ނޫންތޯ އެއާ ދޭތެރޭ އެއބަސްވުމެއް އަދި ނެތީމަ ކުރިއަށް އޮތް މަޖިލީހުގެ އިންތިޚާބު ކާމިޔާބުކުރުމަށްޓަކައި ކުރައްވާ މަސައްކަތް ފެނިވަޑައިގަންނަވަނީ. އެއަކުން އަޅުގަނޑު ޤަބޫލެއް ނުކުރަން އަދި ނުވެސް ފެނޭ ކޯލިޝަން ރޫޅިގެން ދާތަނެއް،" ރައީސް ޞާލިޙު ވިދާޅުވިއެވެ.
ރައީސް ވަނީ ކޯލިޝަން އެއްބަސްވުން ޤާނޫނެއްގެ ސިފައިގައި އެކުލަވާލާނެކަމަށް ވިދާޅުވާ ވިދާޅުވުން މިއަދުވެސް ތަކުރާރު ކުރައްވާފައެވެ. އަދި ލެޖިސްލޭޓިވް އެޖެންޑާގެ ތެރެއިން އެކަންތައް ކުރިއަށްދާނެކަމަށްވެސް ރައިސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވިއެވެ.