ކަޅުވަކަރު މިސްކިތް ރަސްރަނި ބަގީޗާގައި އަލުން ބެހެއްޓުމާގުޅޭ މަޝްވަރާތައް ފަށައިފިއެވެ.
ކަޅުވަކަރު މިސްކިތް ރަސްރަނި ބަގީޗާގައި އަލުން ބެހެއްޓެވުމަށް ވަޒީރުންގެ މަޖިލީހުގެ ލަފާގެ މަތިން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ނިންމަވާފައިވަނީ މިމަހުގެ 25 ވަނަ ދުވަހުއެވެ.
ރައީސް ޞާލިޙުގެ މި ނިންމެވުމާ ގުޅިގެން، އެކަމުގެ މަޝްވަރާތައް މިނިސްޓްރީ އޮފް ހައުސިންގ އެންޑް އަރބަން ޑިވެލޮޕްމަންޓާއި، މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖާއި ދެމެދު މިހާރު ވަނީ ފަށާފައެވެ. މި މަޝްވަރާތަކުގައި ހައުސިންގ މިނިސްޓަރ އާމިނަތު ޢާޠިފާއާއި، ހެރިޓޭޖް މިނިސްޓަރ ޔުމްނާ މައުމޫން ބައިވެރިވެވަޑައިގެންފައިވެއެވެ.
ކަޅުވަކަރު މިސްކިތް އަލުން ކުރީގެ ސަލްޓަން ޕާކު ސަރަޙައްދުގައި ބަހައްޓާނީ އިހުގެ އާސާރީ މިސްކިތެއްގެ ހައިބަތު ފެންނާނެ ފަދައިން، މީހުންނަށް ނަމާދުކުރެވޭނެ އިންތިޒާމުތަކާއެކުއެވެ. އަދި ބޭނުންވާ ފަރާތްތަކަށް ޒިޔާރަތްވެސްކުރެވޭ ތަނެއްގެ ގޮތުގައި، ރައްކާތެރިކަމާއެކު ބެލެހެއްޓޭނެ ފަދަ ގޮތަކަށްކަމަށް ސަރުކާރުން ބުނެއެވެ.
ކަޅުވަކަރު މިސްކިތް އަލުން ބެހެއްޓުމަކީ، ސަރުކާރުގެ ފުރަތަމަ 100 ދުވަހުގެ ވަޢުދުތަކުގެ ތެރޭގައި ހިމެނޭ ކަމެކެވެ. ކަޅުވަކަރު މިސްކިތް ބަހައްޓާނެ ތަނަކާ ގުޅޭގޮތުން އާންމުންގެ ޚިޔާލު ހޯދުމަށް ސަރުކާރުން ވަނީ އާންމުކޮށް ހުޅުވާލައިގެން ފޯރަމެއްވެސް ބާއްވާފައެވެ.
މި މިސްކިތް ބިނާކުރިފަހުން 3 ފަހަރު މަތިން މިސްކިތްވަނީ އެހެންތަންތަނަށް ބަދަލުކޮށްފައެވެ. އެންމެ ފަހުން އެ މިސްކިތް ބަހައްޓާފައިވަނީ ކުރީގެ ސަލްޓަންޕާރކް ސަރަހައްދުގައެވެ. ކުރީގެ ސަރުކާރުން 8 މެއި 2016 ގައި އެމިސްކިތް އެތަނުން ނަގައި އެހެން ތަނަކަށް ބަދަލުކުރުމަށް ނިންމާފައިވެއެވެ. އެހެންނަމަވެސް، މިސްކިތް އެހެންތަނަކަށް ބަދަލުކުރުން ލަސްވަމުން ދިއުމާ ގުޅިގެން ބައެއް އާންމުން ކަންބޮޑުވުން ފާޅުކުރަމުންދިޔަ ނަމަވެސް، މިސްކިތް ރޫޅާލުމަށްފަހު ބަހައްޓާފައި ހުރިތަނެއްވެސް ސަރުކާރު ނިމިގެންދިޔައިރުވެސް ހާމަކޮށްފައެއް ނުވެއެވެ.
ކަޅުވަކަރު މިސްކިތަކީ އެތައް ޚާއްޞަކަމެއް އެކުލެވިގެންވާ އެހެން މިސްކިތްތަކާ ޚިލާފު މިސްކިތެކެވެ. މުޅިން ކަޅުވަކަރާއި، ހިރިގާ ބޭނުން ކޮށްގެން ހަދާފައި ހުރި އެވަރުގެ ދެވަނަ މިސްކިތެއް މުޅި ރާއްޖޭގައި ވެސް ނެތެވެ. މިސްކިތުގައި ބޭނުން ކޮށްފައި ހުރި ލިޔެލާ ޖެހުމުގެ މަސައްކަތް ރަމްޒު ކޮށްދެނީ ދިވެހީންގެ ހުނަރާއި، ފަންނުވެރިކަމާއި މަސައްކަތްތެރިކަމެވެ.