މާލޭ ސިޓީގައި ސުވިމިންގ ޕޫލެއް އެޅުމާގުޅޭގޮތުން ރައްޔިތުންގެ ޚިޔާލު ހޯދުމަށް ޚާއްސަ ބައްދަލުވުމެއް ބޭއްވުމަށް މާލޭ ސިޓީ ކައުންސިލުން ނިންމައިފިއެވެ.
މި ބައްދަލުވުން އޮންނަނީ މާދަމާ ރޭ 20:30 ގައި އިސްކަންދަރު ސްކޫލް ހޯލުގައިކަމަށް މާލޭ ސިޓީ ކައުންސިލުން ބުނެއެވެ.
ރައްޔިތުންގެ ޚިޔާލު ހޯދުމަށް ބާއްވާ މި ބައްދަލުވުމުގައި މާލޭގައި ސުވިމިންގ ޕޫލެއް އެޅުމުގެ އިތުރުން، އެކި ސަރަޙައްދުތަކުގައި އައުޓްޑޯރ ޖިމް އިކުއިޕްމަންޓްތައް ބެހެއްޓުމާއި، ކޮންމެ ހަފްތާ ބަންދެއްގައި ވީކެންޑް މާކެޓެއް ބޭއްވުމަށް މިނިސްޓްރީ އޮފް ޔޫތް، ސްޕޯޓްސް އެންޑް ކޮމިއުނިޓީ އެމްޕަވަރމަންޓުން ނިންމާފައިވާތީ، އެކަމާގުޅޭ ގޮތުންވެސް މަޝްވަރާކޮށް، ރައްޔިތުންގެ ޚިޔާލު ހޯދާނެކަމަށް ސިޓީ ކައުންސިލުން ބުނެއެވެ.
މީގެ އިތުރުން މާލޭ ސިޓީގައި ހުރި އާސާރީ ތަންތަން ހިމެނޭހެން ތަރިކައިގެ ލިސްޓެއް އެކުލަވާލުމަށް މިނިސްޓްރީ އޮފް އަރޓްސް، ކަލްޗަރ އެންޑް ހެރިޓޭޖުން ނިންމާފައިވާތީ، އެކަމާގުޅޭގޮތުންވެސް މި ބައްދަލުވުމުގައި މަޝްވަރާކުރާނެކަމަށް މާލޭ ސިޓީ ކައުންސިލުން ބުނެއެވެ.
މާލޭ ސިޓީ ކައުންސިލްގެ ފަރާތުން ބާއްވާ މި ބައްދަލުވުމަކީ އާއްމުކޮށް ހުޅުވާލައިގެން ބާއްވާ ބައްދަލުވުމެއްކަމުން، މާލޭ ސިޓީގެ ވީހާވެސް ގިނަ ރައްޔިތުން މި ބައްދަލުވުމުގައި ބައިވެރިވުމަށް މާލޭ ސިޓީ ކައުންސިލުން ވަނީ އިލްތިމާސްކޮށްފައެވެ.
މާލޭގައި ސުވިމިންގ ޕޫލެއް އެޅުމަކީ ރައީސް ޞާލިޙުގެ ރިޔާސީ ވަޢުދުފުޅެކެވެ.