ހުޅުމާލޭގައި މަދިރި އާލާވާގޮތަށް ހުރި ތަންތަން ނައްތާލުމުގެ މަސައްކަތް ހައުސިންގ ޑިވެލޮޕްމަންޓް ކޯރޕަރޭޝަން، އެޗް.ޑީ.ސީން ފަށައިފިއެވެ.
އެޗް.ޑީ.ސީން ބުނީ މި މަސައްކަތް އެކުންފުނިން އަލުން ފެށީ ހުޅުމާލޭގައި މަދިރި އާލާވުން އިތުރުވުމާ ގުޅިގެން ހުޅުމާލޭގައި ދިރިއުޅޭ އާންމުންނަށާއި، ޒިޔާރާތްކުރާ މީހުންނަށް އެކަމުގެ ސަބަބުން ދިމާވެދާނެ ދަތިތަކާއި، އަދި ޞިއްޚީ ގޮތުން ކުރިމަތިވެދާނެ ނުރައްކާތަކުން ސަލާމަތް ކުރުމަށްކަމަށެވެ.
އެގޮތުން އެންމެ ގިނައިން މަދިރިފަނި އާލާވެފައިވާ ތަންތަނަކީ ކޮބައިތޯ ބެލުމަށްފަހު، މަދިރިފަނި އާލާވެފައިވާ ތަންތަނަށް ބޭސްޖެހުމުގެ މަސައްކަތް ހެލްތް ޕްރޮޓެކްޝަން އެޖެންސީއާއި، ހުޅުމާލޭ ހޮސްޕިޓަލާ ގުޅިގެން މިހާރު ކުރަމުންދާކަމަށްވެސް އެކުންފުނިން ބުނެއެވެ. އަދި މަދިރި އާލާވާގޮތަށް ހުރި 61 ތަނަކަށް މިހާރުވެސް ބޭސްޖަހާފައިވާކަމަށް އެޗް.ޑީ.ސީން ބުނެއެވެ.
މަދިރި އުފެދެން ދިމާވާ އެންމެ ބޮޑު ސަބަބެއްގެ ގޮތުގައި އެޗް.ޑީ.ސީއިން ފާހަގަކޮށްފައިވަނީ އިމާރާތް ކުރާ ތަންތަނުގެ ލިފްޓް ގޮޅިތަކާއި، ވަޅުތަކުގައި ގިނަ ދުވަސްތަކެއް ވަންދެން ފެން ހަރުލާފައި ހުރުމެވެ. އެހެންކަމުން އިމާރާތްކުރާ ފަރާތްތަކުން އާއްމުންގެ ޞިއްޚީ ރައްކާތެރިކަން އިސްކޮށް، މަދިރި އުފެދުން ހުއްޓުވުމަށް އެއްބާރުލުން ދިނުމުގެ ގޮތުން އެފަދަ ތަންތަނުގައި ފެން ހަރުނުލާނެފަދަ ގޮތަކަށް މަސައްކަތްތައް ރޭވުމަށް އެޗް.ޑީ.ސީއިން ވަނީ އިލްތިމާސްކޮށްފައެވެ.
ހުޅުމާލެއިން މަދިރި ކޮންޓްރޯލްކުރުމަށްޓަކާ އެޗް.ޕީ.އޭއާއި ހުޅުމާލޭ ހޮސްޕިޓަލް ގުޅިގެން އެޗް.ޑީ.ސީން މީގެކުރިންވެސް ވަނީ މަދިރި އާލާވާގޮތަށް ހުރި ތަންތަން ނައްތާލުމުގެ މަސައްކަތް ކޮށްފައެވެ.