މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް ޝިދާތާ ޝަރީފް ހުޅުމާލޭގައި ހިންގާ ކުޑަކުދިން ބަލަހައްޓާ މަރުކަޒު ފިޔަވަތިއަށް ޒިޔާރަތްކޮށްފިއެވެ.
މިނިސްޓަރ ޝިދާތާގެ މި ޒިޔާރަތުގައި އެކަމަނާ ވަނީ، ފިޔަވަތީގައި ދައުލަތުގެ ބެލުމުގެ ދަށުގައި ތިބޭ ކުދިންގެ ހާލަތު ބައްލަވާލައްވައި، އެތަނުގައި މަސައްކަތް ކުރާ މުވައްޒަފުންނާވެސް ބައްދަލުކުރައްވާފައިވެއެވެ.
ދައުލަތުގެ ބެލުމުގެ ދަށުގައި ތިބޭ ކުދިން ބެލެހެއްޓުމަށްޓަކައި ހުޅުމާލޭގައި ޤާއިމުކޮށްފައިވާ ފިޔަވަތި ރަސްމީކޮށް ހުޅުވާފައިވަނީ 2016 ވަނަ އަހަރުގެ ފެބްރުއަރީ މަހުގެ 17 ވަނަ ދުވަހުއެވެ. 2 ފަންގިފިލާއަށް އިމާރާތްކޮށްފައިވާ މިތަނުގައި 12 ކޮޓަރި ހުންނައިރު، މިތަނުގެ ހުރިހާ ވަސީލަތްތަކެއްވެސް ޤާއިމުކޮށްފައިވަނީ، އަންހެން ކުދިންނަށާއި ފިރިހެން ކުދިންނަށްވެސް ވަކިން ބޭނުންކުރެވޭނެހެނެވެ. ފިޔަވަތީގައި މި ވަގުތު 12 އަހަރުން ދަށުގެ 98 ކުދިން ދިރިއުޅެމުންދެއެވެ.
މިއީ މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްގެ މަޤާމާއި ޝިދާތާ ޝަރީފް ހަވާލުވެވަޑައިގަތްފަހުން، އެ މަރުކަޒަށް އެކަމާ ކުރެއްވި މިފަދަ ފުރަތަމަ ޒިޔާރަތެވެ.