އިނގިރޭސިވިލާތުގެ މަޝްހޫރު ކޮފީ ހައުސް "ކޮސްޓަރ ކޮފީ"ގެ ދެވަނަ އައުޓްލެޓް ވެލާނާ އިންޓަރނޭޝަނަލް އެއަރޕޯޓުގައި ހުޅުވައިފިއެވެ. މިތަން ހުޅުވާފައިވަނީ އެއަރޕޯޓުގެ އިންޓަރނޭޝަނަލް ޓަރމިނަލްގެ ޑިޕަރޗަރ ހޯލްގައެވެ.
އެއަރޕޯޓުގައި އަލަށް ހުޅުވި ކޮސްޓަރ ކޮފީގެ އައުޓްލެޓުންވެސް، އެތަނުގެ އެހެން އައުޓްލެޓްތަކެކޭ އެއްފަދައިން ކޮފީއާއި ގުޅުންހުރި ތަފާތު ބުއިންތަކާއި، ލުއިކެއުންތައް ލިބެން ހުންނާނެކަމަށް ރާއްޖޭގައި ކޮސްޓަރ ކޮފީ އޮޕަރޭޓްކުރާ އެޗްއެމްއެސްހޯސްޓުން ބުނެއެވެ.
ޕީ.އެސް.އެމް ނިއުސްއަށް މަޢުލޫމާތުދެއްވަމުން އެޗް.އެމް.އެސް ހޯސްޓުގެ ޖެނެރަލް މެނޭޖަރ ދުރްގާދަޝް ޝެޓީ ވިދާޅުވީ، ކޮސްޓަރ ކޮފީގައި ބޭނުންކުރާ ކޮފީ ބީންސްއަކީ ސީދާ އިނގިރޭސިވިލާތުން އުފައްދައިގެން ރާއްޖެއަށް އިމްޕޯޓްކުރާ ކޮފީ ބީންސްތަކެއްކަމަށާއި، އެތަނުން ލިބެން ހުންނަ ޕޭސްޓްރީ އުފެއްދުންތަކަކީވެސް އެކަމަށް ޙާއްސަ ބޭކަރީއަކުން ތައްޔާރުކުރާ ތަކެތިކަމަށެވެ. އަދި އެއަރޕޯޓުގައި ކޮސްޓަރ ކޮފީގެ އިތުރު އައުޓްލެޓެއް ޤާއިމުވެގެންދިއުމަކީ، ރާއްޖެއަށް ޒިޔާރަތްކުރާ ފަތުރުވެރިންނަށާއި، ދިވެހިންގެ މެދުގައިވެސް އެ ބްރޭންޑް އިތުރަށް މަޝްހޫރުކުރުމަށް ހުޅުވިގެންދިޔަ ދޮރެއްކަމަށް އޭނާ ވިދާޅުވިއެވެ.
ކޮސްޓަރ ކޮފީއަކީ އިނގިރޭސިވިލާތުގެ ރައްޔިތުންގެ މެދުގައި ބޮޑު މަޤުބޫލުކަމެއް ހޯދާފައިވާ، އަދި ފުޅާ ދާއިރާއެއްގައި ކުރިއަރަމުން އަންނަ ކޮފީ ބްރޭންޑެކެވެ. އެގޮތުން އިނގިރޭސިވިލާތުގައި އެކަނިވެސް ދެ ހާހަށްވުރެ ގިނަ އައުޓްލެޓް ހުޅުވާފައިވާއިރު، ދުނިޔޭގެ 31 ޤައުމެއްގައި އެއް ހާހަށްވުރެ ގިނަ އައުޓްލެޓް ކޮސްޓަަރ ކޮފީއިން އަންނަނީ ހިންގަމުންނެވެ. ވެލާނާ އިންޓަރނޭޝަނަލް އެއަރޕޯޓުގައި ކޮސްޓަރ ކޮފީގެ އެންމެ ފުރަތަމަ އައުޓްލެޓް ހުޅުވާފައިވަނީ ޑޮމެސްޓިކް ޓަރމިނަލް ކުރިމަތީ ތަރައްޤީކޮށްފައިވާ ވޯޓަރ ފްރަންޓް ރެސްޓޯރެންޓުގައެވެ.
ވެލާނާ އިންޓަރނޭޝަނަލް އެއަރޕޯޓުން ލިބޭ ޚިދުމަތްތަކުގެ ފެންވަރު ރަނގަޅުކޮށް، އިތުރު ޚިދުމަތްތައް ތަޢާރަފުކުރުމަށްޓަކާ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމް.އޭ.ސީ.އެލުން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ފާއިތުވި ކުރު މުއްދަތުގެ ތެރޭގައި ދުނިޔޭގެ ނަން މަޝްޙޫރު އެތައް ފާސްޓްފުޑް ޗެއިންތަކުގެ އައުޓްލެޓްތައް އެއަރޕޯޓުގައި ހުޅުވާފައިވެއެވެ.