އިނގިރޭސިވިލާތުގެ އަސްކަރީ މަތިންދާބޯޓު ރާއްޖެއައިސްފައިވަނީ ޑިޕްލޮމެޓިކް ކްލިއަރެންސް ދިނުމުން - އެމް.އެން.ޑީ.އެފް
އިނގިރޭސިވިލާތުގެ އަސްކަރީ މަތިންދާ ބޯޓެއް ރާއްޖޭގައި ހަރަކާތްތެރިވަމުންދަނީ، ނަގަންޖެހޭ ހުއްދަތައް ނަގައިގެންކަމަށް މޯލްޑިވްސް ނޭޝެނަލް ޑިފެންސް ފޯސް، އެމް.އެން.ޑީ.އެފުން ބުނެފިއެވެ.
އެމް.އެން.ޑީ.އެފުން މިހެން ބުނެފައިވަނީ، އިނގިރޭސިވިލާތުގެ އަސްކަރީ މަތިންދާ ބޯޓެއް ރާއްޖޭގެ މައި އެއަރޕޯޓު، ވެލާނާ އިންޓަރނޭޝަނަލް އެއަރޕޯޓުގައި ޖައްސާފައިވާ ފޮޓޯތަކަކާއެކު، ބައެއް ފަރާތްތަކުން ސޯޝަލް މީޑިއާގައި ފަތުރަމުންދާ ޙަޤީޤަތާ ޚިލާފު ވާހަކަތަކާ ގުޅިގެންނެވެ.
އެމް.އެން.ޑީ.އެފުން ބުނީ މިބޯޓު ރާއްޖެ އައިސްފައިވަނީ ސަރުކާރުގެ ކަމާގުޅުންހުރި ވުޒާރާތަކުގެ ހުއްދަ ހޯދައިގެން ކަމަށާއި، އެބޯޓު ރާއްޖެއައީ ޑިޕްލޮމެޓިކް ކްލިއަރެންސް ދިނުންމުންކަމަށެވެ. އަދި ވެލޭނާ އިންޓަރނޭޝަނަލް އެއަރޕޯޓަށް މިއަދު ޖެއްސި އިނގިރޭސިވިލާތުގެ އަސްކަރީ މަތިންދާބޯޓަކީ މިމަހުގެ 8 ވަނަ ދުވަހު ތެޔޮއެޅުމަށް ރާއްޖެއައި އެޤައުމުގެ އަސްކަރީ މަތިންދާބޯޓަކަށް ދިމާވި ޓެކްނިކަލް މައްސަލަތަކެއްގެ ސަބަބުން އެއަރޕޯޓުގައި ގްރައުންޑް ކުރަންޖެހުމުން، އެ ފްލައިޓަށް ދިމާވި މައްސަލަ ހައްލުކުރުމަށް ބޭނުންވާ ސްޕެއަރ ޕާޓްސްތައް ހިފައިގެން އައި ފްލައިޓެއްކަމަށްވެސް އެމް.އެން.ޑީ.އެފުން ބުނެއެވެ.
އަދި މިމަހުގެ 8 ވަނަ ދުވަހުން ފެށިގެން ވީ.އައި.އޭގައި ގްރައުންޑްކޮށްފައިވާ އިނގިރޭސިވިލާތުގެ އަސްކަރީ މަތިންދާބޯޓަކީ އިންޑޮނޭޝިއާއަށް ދާދިފަހުން އެރި ސުނާމީގައި ގެއްލުން ލިބުނު ފަރާތްތަކަށް ބޭނުންވާ އިންސާނީ އެހީ ފޯރުކޮށްދިނުމަށް ހަރަކާތްތެރިވި ފްލައިޓެއްކަމަށްވެސް ޤައުމީ ދިފާއީ ބާރުން ބުނެއެވެ.