ވަރލްޑް ކަޕަށް ފަހު ޗުއްޓީ ނިންމާލާ ބާސެލޯނާގެ ފޯވަޑް ލަޔޮނަލް މެސީ އާއި މުހިންމު ގިނަ ކުޅުންތެރިން ޓީމާ ގުޅިއްޖެއެވެ.
އެމެރިކާގައި މިވަގުތު ތިބި ބާސެލޯނާ ޓީމާ އެންމެ ފަހުން ގުޅުނީ އާޖެންޓީނާގެ ކެޕްޓަން މެސީ އާއި ވޯލްޑް ކަޕް ކުޅުނު ސްޕޭނުގެ ކުޅުންތެރިން ކަމަށްވާ ޖެރާޑް ޕީކޭ އާއި ޖޯޑީ އަލްބާ އަދި ސާޖިއޯ ބުސްކެޓްސް އާއި ޖަރުމަނުގެ ކީޕަރު މާކް އަންދްރޭ ޓާސްޓެގަންއެވެ.
މި ކުޅުންތެރިންނަށް ފުރަތަމަ އޮތީ މެޑިކަލް ޓެސްޓް ހެދުމާއި އާދައިގެ ފަރިތަކުރުންތަކެކެވެ. ވަރލްޑް ކަޕް ކުޅުނު ކުޅުންތެރިންގެ ތެރެއިން ބާސެލޯނާ ޓީމާ އެންމެ ފަހުން ގުޅޭނީ ފައިނަލްގައި ކުޅުނު ކްރޮއޭޝިޔާ އާއި ޗެމްޕިއަން ފްރާންސްގެ ކުޅުންތެރިންނެވެ. ފްރާންސްގެ ޑިފެންޑަރު ސެމިއުލް އުމްޓީޓީ އާއި އޮސްމާނޭ ޑެމްބޭލޭ އައި ކްރޮއޭޝިޔާގެ އިވާން ރަކިޓިކް ޓީމާ ގުޅޭނީ މި މަހުގެ 15ގެ ފަހުންނެވެ.
ބާސެލޯނާއިން އާ ސީޒަން ފަށާނީ މި މަހުގެ 18 ވަނަ ދުވަހު އަލްވޭޒްއާ ދެކޮޅަށް ކުޅޭ މެޗުންނެވެ.
ވަރލްޑް ކަޕް ކުޅުނު ކުޅުންތެރިންގެ ތެރެއިން ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯވެސް އިއްޔެ ވަނީ އާ ކުލަބާއެކު ފަރިތަކުރުންތަކަށް ނުކުމެފައެވެ. 9 އަހަރަށް ފަހު ރޮނާލްޑޯ ވަނީ ބާސެލޯނާއާ އެންމެ ވާދަވެރި ރެއާލް މެޑްރިޑް ދޫކޮށް، އިޓަލީގެ ޗެމްޕިއަން ޔުވެންޓަސް އަށް ބަދަލުވެފައެވެ.