މޯލްޑިވްސް ގާލްގައިޑް އެސޯސިއޭޝަނުން އިންތިޒާމު ކޮށްގެން ގާލްގައިޑް ފެސިލިޓޭޓަރުން ތަމްރީން ކުރުމަށް ބޭއްވި ޕޮޓެންޝިއަލް ލީޑަރސް ޓްރެއިނިންގ ޕްރޮގުރާމް ނިމިއްޖެއެވެ.
4 ދުވަހުގެ މުއްދަތައް ކުރިއަށްގެންދިޔަ މި ހަރަކާތާއި ގުޅޭގޮތުން ޕީއެސްއެމް ނިއުސްއަށް މަޢުލޫމާތު ދެއްވަމުން މޯލްޑިވްސް ގާލްގައިޑް އެސޯސިއޭޝަންގެ ޓްރެއިނިންގ ކޮމިޝަނަރ ރަޝީދާ ނަޖީބު ވިދާޅުވީ، މިއީ ސުކޫލްތަކުގައި ގައިޑް ހަރަކާތް ކުރިއަށްގެންދާނެ މީހުން ތަމްރީންކުރާނެ ފެސިލިޓޭޓަރުން ބިނާކުރުމަށް ކުރިއަށްގެންދިޔަ ޕްރޮގުރާމެއްކަމަށެވެ. މި ޕްރޮގުރާމްގެ ތެރެއިން ތަމްރީންވި މީހުން ގައިޑް އެސޯސިއޭޝަންގެ މެންބަރުންގެ ގޮތުގައި ކުރިއަށްއޮތް ތަނުގައި މަސައްކަތްކުރާނެކަމަށް އޭނާ ވިދާޅުވިއެވެ.
"މި ހަރަކާތުގެ ބޭނުމަކީ އެޑަލްޓް ލީޑަރުން، ސުކޫލްގައި ގައިޑް ހަރަކާތް ކުރިއަށްގެންދާނެ މީހުން ތަމްރީންކުރާނެ ފެސިލިޓޭޓަރސް ޓްރެއިނިންގ އެއް. އެހެންވީމަ އަޅުގަނޑުމެން މުޅި ރާއްޖޭގެ ހުރިހާ ދިމާލަކަށް ހުޅުވާލައިގެން މީގަ މިބައިވެރިވީ 15 ބައިވެރިން" ރަޝީދާ ނަޖީބު ވިދާޅުވިއެވެ.
މި ޕްރޮގުރާމްގައި 3 އަތޮޅަކުން 15 ބައިވެރިން ބައިވެރިވިިއިރު، ބައިވެރިން ބުނީ މި ޕްރޮގުރާމްގެ ތެރެއިން ގިނަ ކަންކަން ދަސްވެގެންދިޔަކަމަށެވެ. އެގޮތުން ޓީމެއްގެ ގޮތުގައި މަސައްކަތްކުރާނެގޮތާއި، ބޮޑެތި މީހުންނަށް ތަމްރީންދޭނެގޮތް ދަސްވިކަން ބައިވެރިން ފާހަގަކުރިއެވެ.
މިއީ މޯލްޑިވްސް ގާލްގައިޑް އެސޯސިއޭޝަނުން ކުރިއަށްގެންދިޔަ މިފަދަ 2 ވަނަ ތަމްރީން ޕްރޮގުރާމެވެ.