ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ ޖަލްސާތައް ފަށައިފިއެވެ. އެގޮތުން މިއަދު ވަނީ ދެވަނަ ދައުރުގެ ފުރަތަމަ ޖަލްސާ ބާއްވާފައެވެ.
މިއަދު މެންދުރު 1 ޖެހިއިރު ބޭއްވި ޖަލްސާ، މާގިނައިރުތަކެއް ނުވެ ވަނީ ނިންމާލާފައެވެ. މިއަދުގެ ޖަލްސާ ފައްޓަވަމުން މަޖިލީހުގެ ރައީސް ޢަބްދުﷲ މަސީޙް މުޙައްމަދު ވަނީ މަޖިލީހުގެ ދެވަނަ ދައުރުގެ ޖަލްސާތައް ފެށުނުކަން އިއުލާންކުރައްވާ، މެންބަރުންނަށް މަރުޙަބާ ދަންނަވާފައެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ 2 ޤާނޫނަކަށް 3 އިޞްލާޙު ހުށަހަޅާފައެވެ. އެއީ ރިޔާސީ އިންތިޚާބުތަކާއިބެހޭ ޤާނޫނަށް ހުށަހަޅާ ދެ އިޞްލާޙަކާއި އިންތިޚާބުތަކާއިބެހޭ ޢާންމު ޤާނޫނަށް ސަރުކާރުން ހުށަހަޅާފައިވާ އިޞްލާޙެކެވެ. މި އިޞްލާޙުތަކުގެ ތެރެއިން ރިޔާސީ އިންތިޚާބުގެ ޤާނޫނަށް އިޞްލާޙު ހުށަހަޅާފައި ވަނީ ޕީޕީއެމް ޕާލިމަންޓްރީ ގްރޫޕް ލީޑަރ އަދި ވިލިމާލެ ދާއިރާގެ މެންބަރ އަޙްމަދު ނިހާން ޙުސައިން މަނިކާއި ފަރެސްމާތޮޑާ ދާއިރާގެ މެންބަރު ޙުސައިން މުޙައްމަދު ލަތީފެވެ. އިންތިޚާބުތަކާބެހޭ ޢާންމު ޤާނޫނަށް އިޞްލާޙު ހުށަހަޅުއްވާފައިވަނީ ހޮޅުދޫ ދާއިރާގެ މެންބަރު ޢަލީ މުޙައްމަދެވެ.
މަޖިލީހުގެ ޖަލްސާއެއް ދެން އޮންނާނީ މާދަމާ އެވެ.