މިދިޔަ އަހަރާ އަޅާބަލާއިރު މިއަހަރުގެ ރަމަޟާން މަހުގެ ފުރަތަމަ 15 ދުވަހު ފުލުހުންނަށް ހުށަހެޅި މައްސަލަތަކުގެ އަދަދު ދަށްކަމަށް ފުލުހުން ބުނެފިއެވެ.
ފުލުހުންގެ ތަފާސް ހިސާބުތައް ދައްކާ ގޮތުން މިދިޔަ އަހަރު ރޯދަމަހުގެ ފުރަތަމަ 15 ދުވަހު ފުލުހުންނަށް 596 މައްސަލަ ހުށަހެޅިއިރު، މިއަހަރުގެ ރަމަޟާންމަހުގެ ފުރަތަމަ 15 ދުވަހު ހުށަހަޅާފައިވަނީ 556 މައްސަލައެވެ. މިމުއްދަތުގައި ފުލުހުންނަށް ހުށަހަޅާފައިވާ ވަކިވަކި މައްސަލަތަކަށް ބަލާއިރު ރޯދަމަހުގެ ދުވާލުގެ ވަގުތުގައި ކެއިގެން ރިޕޯޓުކޮށްފައިވާ މައްސަލަތައްވަނީ މަދުވެފައެވެ. އެގޮތުން ފާއިތުވި އަހަރު 15 މައްސަލައެއްގައި 18 މީހަކު ހައްޔަރުކޮށްފައިވާއިރު މިއަހަރުގެ މި މުއްދަތުގައި 7 މައްސަލައެއްގައި 7 މީހަކު ހައްޔަރުކޮށްފައިވެއެވެ.
ފުލުހުން ބުނީ މިއަހަރުގެ ރަމަޟާން މަހުގެ ފުރަތަމަ 15 ގައި ހުށަހަޅާފައިވާ މައްސަލަތަކަށް ބަލާއިރު އެންމެ ގިނައިން ހުށަހަޅާފައިވަނީ ވައްކަމުގެ މައްސަލަތަކެވެ.
އެގޮތުން ވައްކަމުގެ 127 މައްސަލަ މިއަހަރު ހުށަހަޅާފައިވާއިރު މިދިޔަ އަހަރުގެ މިމުއްދަތުގައި 109 މައްސަލަ ހުށަހެޅިއެވެ. ވައްކަމުގެ މައްސަލަތަކަށް ބަލާއިރު މައިގަނޑު ގޮތެއްގައި ހުށަހަޅާފައިވަނީ ކުދި ވައްކަމުގެ މައްސަލަތައްކަން ފާހަގަކުރެވެއެވެ.
ފުލުހުން ބުނީ ކޮންމެ އަހަރެއްގެ ރަމަޟާން މަހަކުވެސް ކުދި ވައްކަންތައް އިތުރުވަމުންދާއިރު މިފަދަ މައްސަލަތައް މަދުކުރުމުގައި ފުލުހުން ކުރަމުންދާ މަސައްކަތުގެ އިތުރުން އާންމު ރައްޔިތުންވެސް މިފަދަ ކަންކަމަށް ޚާއްޞަ ސަމާލުކަމެއް ދޭންޖެހޭކަމަށެވެ.