ރައީސް ޔާމީންގެ ރިޔާސީ ދައުރުގެ ބޮޑުބައެއް ހޭދަކުރަންޖެހުނީ ބޯހިޔާ ވަހިކަމުގެ މައްސަލަ ޙައްލުކުރަން - ޑރ.މުޢިއްޒު
ބޯހިޔާވަހިކަމުގެ މައްސަލައަކީ ކުރީގެ ސަރުކާރުތަކަށް ހައްލު ހޯދިފައިވާ މައްސަލައަކަށް ނުވުމުން، ރައީސް ޢަބްދުﷲ ޔާމީންގެ ރިޔާސީ ދައުރުގެ ބޮޑު ބައެއް އެ މައްސަލަ ހައްލުކުރުމަށް ހޭދަކުރަންޖެހުނުކަމަށް ހައުސިންގ މިނިސްޓަރ ޑރ.މުޙައްމަދު މުޢިއްޒު ވިދާޅުވެއްޖެއެވެ.
މިނިސްޓަރު މިހެން ވިދާޅުވީ ހުޅުމާލޭގައި ޢިމާރާތްކުރާ ހަތްހާސް ހައުސިންގ ޔުނިޓްތަކަށް އެދޭ ފޯމް ދޫކުރުން ހުޅުވާލުމަށް ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ. ރާއްޖޭގެ ތާރީޚްގައިވެސް ހިންގާ ބޯހިޔާވަހިކަމުގެ އެންމެ ބިޔަ މަޝްރޫޢުއުގެ ދަށުން ދޫކުރާ ހައުސިން ޔުނިޓުތަކަށް އެދޭ ފޯމުދުކުރުމާއި، ހައުސިން ޔުނިޓުތަކާ ގުޅޭ މަޢުލޫމާތު ހާމަކުރުމަށް ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ހައުސިންގ މިނިސްޓަރ ޑރ.މުޙައްމަދު މުޢިއްޒު ވިދާޅުވީ، ގެދޮރުގެ ދަތިކަމަކީ އެތައް އަހަރެއްކުރިން ދިމާވެފައިވާ ބޮޑު މައްސަލައެއްކަމަށެވެ. އެތަކެއް ސަރުކާރެއްގެ ވެރިކަން ފާއިތުވެދިޔައިރުވެސް މިމައްސަލައަށް އެކަށީގެންވާ ޙައްލެއް ހޯދައިދީފައިނުމުގެ ސަބަބުން ބޮއްސުންލާފައިވާ މި ބޮޑު މައްސަލައަށް ރައީސް ޔާމީންގެ ސަރުކާރުން ޙައްލު ހޯދަން ޖެހުނުކަން މިނިސްޓަރު ވަނީ ފާހގަކުރައްވާފައެވެ.
ރައީސް ޔާމީން މަސައްކަތް ކުރައްވަނީ، މި މައްސަލައަށް އެކަށީގެންވާ ބޮޑު ހައްލެއް ހޯއްދަވައިދެއްވުންކަމަށާއި، ނަތީޖާއެއްގެ ގޮތުން މި ދައުރުގެ ބޮޑު ބައެއް މި މައްސަލައަށް ހައްލެއް ގެނައުމަށް މަސައްކަތްކުރުމަށް ހޭދަކުރަންޖެހުނުކަމަށް މިނިސްޓަރ ވިދާޅުވިއެވެ. މި ހުރިހާ ހުރަސްތައް ގިރާކޮށް ރައްޔިތުންނަށް އެކަމުގެ ހައްލު ގެނަސްދީފައިވާކަމަށާއި، ހުޅުމާލެ ދެވަނަ ފިޔަވަހި ހިއްކުމަކީވެސް ބޯހިޔާވަހިކަން ހައްލުކުރުމަށް އެމަނިކުފާނު ކުރެއްވި މަސައްކަތެއްކަން މިނިސްޓަރ ޑރ.މުޢިއްޒު ފހަގަކުރެއްވިއެވެ.
"ހުޅުމާލެ ދެވަނަ ފިޔަވަހީގެ ބޮޑު ސަރަހައްދެއްގައި 2 ކޮޓަރީގެ 7000 ފްލެޓް އެޅުމުގެ މަސައްކަތް މިހާރު ކުރިއަށް އެދަނީ. އަދި އެއް ކޮޓަރީގެ އެތައް ސަތޭކަ ފްލެޓެއްގެ މަސައްކަތް މިހާރުވެސް ކުރިއަށް އެބަދޭ. އަމާޒަކީ މިހާރު ކުރިއަށްދާ މަސައްކަތުން މަދުވެގެން 10 ހާސް ފްލެޓްގެ މަސައްކަތް ޢަމަލީ ގޮތުން ކުރިއަށްދިއުން. އަދި ގިނަ ފްލެޓްތަކުގެ މަސައްކަތް މާ ލަސްތަކެއް ނުވެ ރައްޔިތުންނަށް ފޯރުކޮށްދިނުން. މި ކިޔަނީ ވަރަށް ބޮޑެތި އަދަދުތަކުގެ ވަހަކަ."
ހައުސިންގ މިނިސްޓަރ މުޢިއްޒު ވިދާޅުވިއެވެ.
1990 ވަނަ އަހަރުން ފެށިގެން ރާއްޖޭގައި ބިނާ ކުރެވިފައިވާ ފްލެޓްތަކުގެ ޢަދަދު ފަސް ހާހަށްވުރެ އިތުރު ނުވާނެކަމަށާއި، ނަމަވެސް މި ސަރުކާރުން އެ ޢަދަދުގެ ދެގުނަ ނުވަތަ ތިން ގުނައަށްވުރެ އިތުރަށް ފްލެޓް އެޅުމުގެ މަސައްކަތް ފަށައިގެން ކުރިއަށްގެންދާކަމަށް މިނިސްޓަރ ވިދާޅުވިއެވެ.
އަދި އެހެން ފަހަރުތަކާއި ޚިލާފަށް މިފަހަރު ހައުސިން ޔުނިޓުތައް ދޫކުރުމުގައި ގިނަ ކެޓަގަރީތައް ހިމަނާފައިވާކަން ފާހަގަކުރައްވައި މިނިސްޓަރުވަނީ އެކަމުގެ ތަފްސީލްވެސް ހާމަކުރައްވާފައެވެ. މިނިސްޓަރ ވިދާޅުވީ، ރައީސް ޔާމީންގެ ވިސްނުންފުޅަކީ ކުރީގައި އޮންނަ ނިޒާމަށް ދޫކޮށްނުލާ އެންމެ ފުރުސަތު ބޮޑުވާގޮތަށް ވީހާވެސް ގިނަ ފަރާތްތަކަށް ފުރުސަތު ދިނުންކަމަށެވެ. ގިނަ ކެޓަގަރީތަކުގެ ސަބަބުން ޢާއިލާތަކަށް ލުޔެއް ލިބި ދިރިއުޅޭ ޙާލަތަށް ވަރަށް ބޮޑު ބަދަލެއް އަންނާނެކަމުގެ ޔަޤީންކަން މިނިސްޓަރު ވަނީ ރައްޔިތުންނަށް ދެއްވާފައެވެ.
ހައުސިންގ މިނިސްޓަރ ވިދާޅުވީ މިފަހަރުގެ ހައުސިން ސްކީމްގައި ވީހާވެސް ބޮޑަށް ރައްޔިތުންގެ ޙައްޤުތައް ޙިމާޔަތްވާނެކަމަށާ، ބޭއިންސާފުން އެއްވެސް ކަމެއް ނުކުރާނެކަމުގެ ޔަޤީންކަން ރައްޔިތުންނަށް ދެއްވާކަމަށެވެ. އަދި އިސްކަން ދޭނީ އެންމެ ނިކަމެތި މީހާއަށް އިންސާފުން ހަމަހަމައަށް ޙައްޤުތައް ޙިމާޔަތްކުރެވިގެން ދާނެ އުސޫލަކުން ފްލެޓްތައް ދިނުމަށްކަމަށްވެސް ހައުސިންގ މިނިސްޓަރ ޑރ.މުޙައްމަދު މުޢިއްޒު ވިދާޅުވިއެވެ.