"ވީއައިއޭގެ އާ ރަންވޭގެ މަސައްކަތް ނިމޭއިރު ޔޫރަޕްގެ ގިނަ އެއަރލައިންތަކުން ރާއްޖެއަށް ދަތުރުތައް ފަށާނެ"
ވެލާނާ އިންޓަރނޭޝަނަލް އެއަރޕޯޓްގެ އާ ރަންވޭގެ މަސައްކަތް ނިމެންވާއިރަށް، ޔޫރަޕްގެ ގިނަ އެއަރލައިންތަކުން ރާއްޖެއަށް ދަތުރުތައް ފަށާނެކަމުގެ ޔަޤީންކަން ލިބިފައިވާކަމަށް އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވެއްޖެއެވެ.
މިނިސްޓަރ ސަޢީދު މިހެން ވިދާޅުވެފައި މިވަނީ، ޔޫރަޕްގެ ބޮޑެތި އެއާލައިންތަކުން ކުރިއަށް އޮތް ހޫނު މޫސުމާ ދިމާކޮށް ރާއްޖެއަށް ބާއްވާ ދަތުރުތައް ހުއްޓާލަން އުޅޭކަމުގެ އަޑުތަކެއް ފެތުރިފައިވަނިކޮށެވެ.
އިކޮނޮމިކް މިނިސްޓަރ މުޙައްމަދު ސަޢީދު ކުރެއްވި ޓްވީޓެއްގައި ވިދާޅުވެފައިވަނީ، އައު ރަންވޭގެ މަސައްކަތް ނިމުމުން ޔޫރަޕް ހިމެނޭހެން ގިނަ އެއަރލައިންތަކުން ރާއްޖެއަށް ދަތުރުތައް ފަށާނެކަމަށާއި، ފުރަތަމަ ފަހަރަށް އޭ ތްރީ އެއިޓީގެ މަތިންދާ ބޯޓުވެސް ދަތުރުތައް ކުރާނެކަމަށެވެ.
ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމަށް ސަރުކާރުން ހިންގާ 1 ބިލިއަން ޑޮލަރުގެ ބިޔަ މަޝްރޫއާއެކު، މުޅި އެއަރޕޯޓު ވަނީ އިންޤިލާބީ ބަދަލަކާއި ދިމާލަށް މިސްރާބު ޖަހާފައެވެ. މި މަޝްރޫޢުގެ ތެރެއިން މިވަގުތު އެންމެ ބޮޑު އިސްކަމެއްދީގެން ކުރިއަށްދާ އެއް މަސައްކަތަކީ އާ ރަންވޭގެ މަސައްކަތެވެ. އާ ރަންވޭގައި ތާރު އެޅުމުގެ މަސައްކަތް މިހާރު ކުރަމުންދާއިރު، ރަންވޭގެ މަސައްކަތް ނިމުމާއެކު މިހާރު ބޭނުން ކުރަމުން އަންނަ ރަންވޭ ޓެކްސީވޭއަކަށް ބަދަލުކުރުމުގެ މަސައްކަތްވެސް އެމްއޭސީއެލް އިން ދަނީ ކުރަމުންނެވެ.
އާ ރަންވޭގެ މަސައްކަތް މިއަހަރުގެ އޮގަސްޓް މަހު ނިމޭނެކަމަށް އެމްއޭސީއެލްއިން ބުނެއެވެ. ތިންހާސް ހަތަރު ސަތޭކަ މީޓަރު ދިގު އަދި ފަސްދޮޅަސް ފަސް މީޓަރު ފުޅާ މި ރަންވޭއަކީ ދުނިޔޭގައި އޮޕަރޭޓްކުރާ އެންމެ ބޮޑެތި މަތިންދާބޯޓު ކަމުގައިވާ އޭ ތްރީ އެއިޓީ މަރުކާގެ ބޯޓު ފަހަރަށްވެސް ފަސޭހަކަމާއެކު ޖެއްސޭނެހެން ފަރުމާކޮށްފައިވާ ރަންވޭއެކެވެ.