އެނބޫދޫފަޅުގައި ރިސޯޓްތަކެއް ތަރައްޤީ ކުރަމުންދާ ތައިލެންޑްގެ ސިންހާ އެސްޓޭޓް ކުންފުނިން، ގދ. ޓްރިގަރ ކޮނޮއްޓާ މޯލްޑިވްސް ރިސޯޓު ގަންނަން ނިންމައިފިއެވެ.
ދުނިޔޭގެ އެކި ޤައުމުތަކުގެ މަޝްހޫރު ފަތުރުވެރި މަންޒިލްތަކުގައި ޓޫރިސްޓް ހޮޓާތަކާއި ރިސޯޓުތައް ތަރައްޤީކުރަން އިންވެސްޓްކުރަން ނިންމާ އެކުންފުނިން ޢާންމުކޮށްފައިވާ ބަޔާނުގައި ރާއްޖޭގެ ޓްރިގަރ ކޮނޮއްޓާ މޯލްޑިވްސް ރިސޯޓާއެކު ދުނިޔޭގެ އެކި ޞަރަޙައްދުތަކުން ހަ ރިސޯޓް ގަންނަން ނިންމާފައިވާކަން ހާމަކޮށްފައިވެއެވެ.
މި ރިސޯޓުތައް ގަންނަން 250 މިލިއަން ޑޮލަރު ހޭދަކުރުމަށް ސިންހާ އެސްޓޭޓް ކުންފުނިން ވަނީ ނިންމާފައެވެ.
ގދ. އަތޮޅުގައި އޮންނަ ފަސް ތަރީގެ ކޮނޮއްޓާގައި 53 ވިލާ ހުރެ އެވެ. އެއީ 21 ބީޗް ޕޫލް ވިލާ އާއި 21 އޯޝަން ޕޫލް ވިލާގެ އިތުރުން 2 ލެގޫން ޕޫލް ވިލާއެވެ. އޭގެ ތެރޭގައި ރާއްޖޭގެ އެންމެ ބޮޑެތި ވިލާތައް ވެސް ހިމެނެއެވެ. 2015 ވަނަ އަހަރުގެ އޮގަސްޓު މަހު ހުޅުވި މި ރިސޯޓަކީ ކުރު މުއްދަތެއްގެ ތެރޭގައި ފަތުރުވެރިންގެ މަޤުބޫލުކަން ހޯދާފައިވާ ރާއްޖޭގެ އެންމެ ލަގްޒަރީ ރިސޯޓުތަކުގެ ތެރޭގައި ހިމެނޭ ރިސޯޓެކެވެ.
އޭޝިއާ ޞަރަޙައްދުގައި ނެރޭ އެންމެ މަޤުބޫލް އެއް ޓޫރިޒަމް މަޖައްލާ ކަމަށްވާ ޓްރެވަލް ވީކްލީ އޭޝިއާ އިން ހޮވާ އެންމެ މޮޅު ރިސޯޓުގެ އެވޯޑް 2016 ވަނަ އަހަރު އެރިސޯޓަށް ލިބިފައިވެއެވެ.