ދޭދޭ ޤައުމުތަކާއެކު ގުޅުން ބަދަހި ކުރުމުގެ އެންމެ މުހިންމު އަސާސަކީ ދިވެހިން އެހެން ޤައުމުތަކުން ޚިދުމަތް ހޯދުމުގައި ލުއި ފަސޭހަ ގޮތްތަކެއް ފަހިކޮށްދިނުން ކަމަށް ފޮރިން މިނިސްޓަރ ޑރ. މުޙައްމަދު އާސިމް ވިދާޅުވެއްޖެއެވެ. ފޮރިން މިނިސްޓަރ މިހެން ވިދާޅުވީ ޕީއެސްއެމުން ގެނެސްދޭ "ޚާރިޖީ ސިޔާސަތު" ޕްރޮގްރާމުގައި ވާހަކަފުޅު ދައްކަވަމުންނެވެ.
ޕީއެސްއެމް ނިއުސްއިން ގެނެސްދޭ "ޚާރިޖީ ސިޔާސަތު"ގެ ދެވަނަ ޕްރޮގްރާމް ޚާއްޞަކޮށްފައިވަނީ ބައިލެޓްރަލް ރިލޭޝަންސް ނުވަތަ ދޭ ދޭ ޤައުމުތަކާއެކު އޮންނަ ގުޅުމަށެވެ. މި ޕްރޮގްރާމުގައި ވާހަކަފުޅު ދައްކަވަމުން ފޮރިން މިނިސްޓަރ ޑރ.މުޙައްމަދު އާސިމް ވިދާޅުވީ ޤައުމުތަކާއެކު އޮންނަ ގުޅުން ވަރުގަދަކޮށް ފުޅާކުރުމަށް ސަރުކާރުން ކުރަމުންދާ މަސައްކަތުގެ ދަށުން މިހާތަނަށް ދުނިޔޭގެ 164 ޤައުމަކާއެކު ސިޔާސީ ގުޅުން ޤާއިމްކޮށް، އެޤައުމުތަކާއެކު ތަފާތު އެކި ދާއިރާތަކުން ގުޅުން ބަދަހި ކުރަމުން އަންނަ ކަމަށެވެ. އަދި 15 ޤައުމެއްގައި މިޝަން ޤާއިމްކޮށް، މިޝަންގެ މަސައްކަތްތަކުގެ ތެރެއިން ވަކިވަކި ޤައުމުތަކާއެކު ދޭދޭ ގުޅުން ވަރުގަދަކުރަން މަސައްކަތް ކުރަމުންދާ ކަމަށެވެ. އަދި އަމާޒަކީ ތަފާތު އެކި ވަޞީލަތްތައް ބޭނުންކޮށްގެން ދުނިޔޭގެ އެކި ބައްރުތަކުގެ ޤައުމުތަކާއެކު ގުޅުން ބަދަހިކުރުންކަމަށް މިނިސްޓަރ ވިދާޅުވިއެވެ.
"ދޭދޭ ޤައުމުތަކުގެ ގުޅުން ބަދަހިކުރުމުގެ މަސައްކަތުގައި އަޅުގަނޑުމެން ތަފާތުއެކި ވަޞީލަތްތައް ބޭނުންކުރަމުން މިދަނީ.މީގެތެރޭގައި ޖޮއިންޓް ކޮމިޝަންތަކާއި،އިކޮނޮމިކް ކޮމިޓީ މިޝަންތަކާއި،ވޯރކިންގް ގްރޫޕްލެވެެލްގެ ކޮމިޓީ އުފެއްދާ ތަފާތު އެކި ދާއިރާތަކުން ގުޅުން ބަދަހި ކުރުމުގެ މަސައްކަތްކުރަމުން މިދަނީ.މިސާލަކަށް،ހެލްތައް ބަކި ކޮމިޝަނެއް ނުވަތަ ކޮމިޓީއެއް އޮވެދާނެ،އެހެންވީމަ މިޞަރަޙައްދުގެ ޤައުމުތަކާ އަދި އެނޫން ޤައުމުތަކާއެކުވެސް މިދެންނެވި ބާވަތުގެ މެކޭނިޒަމްތައް ބޭނުންކޮށްގެން ގުޅުން ބަދަހިކޮށް، ކުރިއަރުވާ ކޯޕަރޭޝަން އިތުރުކުރުމުގެ މަސައްކަތް ކުރިޔަށްއެބަދޭ." ފޮރިން މިނިސްޓަރ ޑރ.މުޙައްމަދު އާސިމް ވިދާޅުވިއެވެ
ދޭދޭ ޤައުމުތަކާއެކު އެކިދާއިރާތަކުން އޮންނަ ގުޅުން ބަދަހި ކުރުމަށް ކުރަމުންދާ މަސައްކަތުގެ ތެރެއިން ،ބޭރުގައި ދިރިއުޅޭ ދިވެހިންގެ ކަންކަން ރަނގަޅު ކުރުމާއި، އަދި އެޤައުމުތަކަށް އެކި ޚިދުމަތް ހޯދުމަށް ދަތުރުކުރާ ދިވެހިންނަށް ބޭނުންވާ ޚިދުމަތް ލިބިގަތުމުގައި ލުއި ފަސޭހަގޮތްތަކެއް ފަހިކޮށްދިނުމަކީ ސަރުކާރުގެ އަމާޒެއްކަމަށް މިނިސްޓަރ ވިދާޅުވިއެވެ. އަދި ޤައުމުތަކާއެކު އޮންނަ ދޭދޭ ގުޅުން ވަރުގަދަ ކުރުމުގެ މުހިންމު އަސާސަކީވެސް މިކަންކަމަށް މަގުފަހިކުރުންކަން މިނިސްޓަރ ފާހަގަކުރެއްވިއެވެ.
"ދިވެހިން ބޭރުޤައުމުތަކާ ގުޅިގެން ކުރަންޖެހޭ މަސައްކަތްތަކުގައި، އެއީ ވިޔަފާރިވިޔަސް،އިންވެސްޓްމެންޓްކަމުގައިވިޔަސް،ތަޢުލީމު ޙާޞިލް ކުރުން ކަމުގައިވިޔަސް،ޞިއްޙީ ޚިދްމަތް ހޯދުންކަމުގައިވިޔަސް،އެޤައުމަކަށް ދަތުރުކުރާއިރު،އަޅުގަނޑުމެންނާ އެޤައުމަކާ ދޭތެރޭ ރަނގަޅު ބައިލެޓަރަލް ގުޅުންތަކެއް އުފެދިފައިވާނަމަ،އެޚިދްމަތްތައް ވަރަށް ލުއިފަސޭހަގޮތެއްގައި ލިބިގެންދާނެ. އެއީ ދޭދޭ ޤައުމުތަކާއެކު ގުޅުން ބަދަހި ކުރުމުގެ އެންމެ މުހިންމު އަސާސަކީ. އެމަސައްކަތް ވަރަށް ބާރަށް ހަރުދަނާގޮތެއްގައި ކުރިޔަށް މިގެންދަނީ. އެހެންކަމުން ކުރިޔަށްއޮތްތާނގަވެސް އަޅުގަނޑުމެން ވީހާވެސް ގިނަ ޤައުމުތަކާއެކު ޑިޕްލޮމެޓިކް ގުޅުން އުފައްދާ އަދި އޭގެ އިތުރަށް އިރާދަކުރެއްވިއްޔާ އިތުރު މިޝަންތައް ހުޅުވުމުގެ މަސައްކަތް ކުރިޔަށް ގެންދާނަން." ފޮރިން މިނިސްޓަރ ޑރ.މުޙައްމަދު އާސިމް ވިދާޅުވިއެވެ.
"ޚާރިޖީ ސިޔާސަތު" ޕްރޮގްރާމުގައި މިނިސްޓަރ ވިދާޅުވީ ޞަރަޙައްދީ ޤައުމުތަކާއެކުވެސް ބަދަހި ގުޅުންތަކެއް އެބައޮތްކަމަށެވެ. ހަމައެގޮތައް އިރުމަތީ އޭޝިޔާގެ ޤައުމުތަކުގެ އިތުރުން އެފްރިކާ ބައްރުގެ ޤައުމުތަކާއެކު ގުޅުން ބަދަހި ކުރުމަށް މަސައްކަތް ކުރަމުންދާކަން މިނިސްޓަރ ފާހަގުރެއްވިއެވެ. ހަމައެއެއާކު މިނިސްޓަރ ވިދާޅުވީ ވިލާތު އިއްތިހާދަކީ ރާއްޖެއަށް ވަރަށް މުހިންމު އިއްތިހާދެއް ކަމަށާއި ވިލާތުގެ ޤައުމުތަކާއެކު އެކި ދާއިރާތަކުން ގުޅުން ޤާއިމްކުރުމަށް މަސައްކަތް ކުރައްވާނެކަމަށެވެ. އަދި މެދުއިރުމައްޗާއި އަރަބި އިސްލާމީ ޤައުމުތަކާއެކު އޮންނަ ގުޅުންތަކަށް އިޝާރާތް ކުރައްވާ މިނިސްޓަރ ވިދާޅުވީ ޚާރިޖީ ސިޔާސަތުގެ އަމާޒަކީ މުސްލިމް ޤައުމުތަކާއެކު ގާތް އުޚުވަތްތެރި ގުޅުމެއް ބޭއްވުންކަމަށެވެ.