ޤާނޫނަށް ފިލައިގެން އުޅޭބަޔަކަށް ޤާނޫނު އަސާސީގެ ދިފާޢުގައި ނުކުތުމުގެ އެއްވެސް ހައްޤެއް ނެތްކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ޕީ.ޕީ.އެމުން މިރޭ ރުމާލު 2 ޖަގަހައިގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.
ރައީސް ޔާމީން ވިދާޅުވީ، ޤާނޫނު އަސާސީގެ ފާރަވެރި ފަރާތަކީ ސްޕްރީމް ކޯޓު ކަމަށާއި، ނަމަވެސް ސްޕްރީމް ކޯޓަށް ލިބިފައިވާ ޤާނޫނީ އިޚްތިސާސްތަކާއި، އެ ކޯޓުގެ މެންޑޭޓާވެސް ޚިލާފަށް، ނުހައްޤުން ބާރުތައް ތަންފީޒުކުރަން މަސައްކަތްކުރުމަކީ ޤާނޫނު އަސާސީގެ ބާރު ކަނޑުވާލުންކަމަށެވެ. އަދި އިދިކޮޅު ފަރާތްތަކާ ގުޅިގެން ޖުޑިޝަރީ ތެރެއިން ގެންނަން އުޅުނު ބަޣާވާތާއި، ޤާނޫނުން ބޭރުން ރައީސުލްޖުމްހޫރިއްޔާ ޢަޒުލުކުރަން އުޅުމަކީ ޤައުމަށް ހަރާންކޯރުވުމުގެ ޢަމަލެއްގެ ގޮތުގައި އެމަނިކުފާނު ވަނީ ސިފަކުރައްވާފައެވެ. ސްޕްރީމް ކޯޓުން މިމަހުގެ 1 ވަނަ ދުވަހު ކުއްލިގޮތަކަށް ނެރުނު އަމުރު ތަންފީޒުކޮށްފިނަމަ، އެކަމުގެ ނަތީޖާއެއްގެގޮތުން ޤައުމުގެ މިނިވަންކަމާއި އިސްތިޤްލާލު ގެއްލި، ރައްޔިތުން މަގުމައްޗަށް ނުކުމެ، އިޖްތިމާޢީ އެތައް މައްސަލަތަކަކަށް ދޮރު ހުޅުވިދާނެފަދަ ނުރައްކާތެރި ޢަމަލެއްކަމަށް ރައީސް ޔާމީން ވިދާޅުވިއެވެ.
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވީ، ދައުލަތުގެ ބާރުތަކާއި މުއައްސަސާތައް ވަކިވެފައިވާއިރު، ޤާނޫނު އަސާސީން އެންމެ މުހިއްމު ބާރުތަކެއް ލިބިދޭ އަދި މުއައްސަސާތައް ޖަވާބުދާރީ ކުރުވުމުގެ ޤާނޫނީ ޒިންމާވެސް ހަވާލުވެފައިވާ އެންމެ އިސްފަރާތަކީ ރައީސުލްޖުމްހޫރިއްޔާކަމަށެވެ.
ޤާނޫނު އަސާސީގެ ދިފާޢުގައިކަމަށް ބުނެ، އިދިކޮޅު ފަރާތްތަކުން ދައްކަމުންދާ ވާހަކަތަކަށްވެސް ރައީސް ޔާމީން ވަނީ ރައްދުދެއްވާފައެވެ. އެގޮތުން އެމަނިކުފާނު ވިދާޅުވީ، އިދިކޮޅު ފަރާތްތައް ތަމްސީލު ކުރަންތިބި ލީޑަރުންނަކީ އަދި ސްޕްރީމް ކޯޓުން ދޫކޮށްލަން އަމުރު ކުރި ބޭފުޅުންނަކީ ޤާނޫނީ ބޮޑެތި ތުހުމަތުތަކެއް އެބޭފުޅުންގެ މައްޗަށް ސާބިތުވެ، ހުކުމްތައް ތަންފީޒުކުރަމުން ގެންދާ ބައެއްކަމަށެވެ. އަދި މީގެތެރެއިން ބައެއް ބޭފުޅުންނަކީ ހުކުމްތައް ތަންފީޒުކުރަން ފެށުމާއެކު ޤައުމުން ފިލައިގެން އުޅޭ ބައެއްކަން އެމަނިކުފާނު ފާހަގަކުރެއްވިއެވެ. އެހެންކަމުން ޤާނޫނަށް ފިލައިގެން އުޅޭ މިފަދަ ބަޔަކަށް ޤާނޫނު އަސާސީގެ ދިފާޢުގައި ނުކުތުމުގެ އެއްވެސް ހައްޤެއް ނެތްކަމަށް ރައީސް ޔާމިން ވިދާޅުވިއެވެ.
ރައީސް ޔާމީން ވިދާޅުވީ، ޤާނޫނީގޮތުން އުފެދޭ މައްސަލަތައްވެސް މި ސަރުކާރުން ހައްލުކުރަނީ ޤާނޫނީ ނިޒާމްގެ ތެރެއިންކަމަށެވެ. އަދި ރާއްޖޭގައި ޢަދުލު އިންސާފު ޤާއިމުކުރުމަށް އެމަނިކުފާނު ކުރައްވާ މަސައްކަތްޕުޅަށް ކުޑަވެސް ދުލެއް ނުދެއްވާނެކަމަށް ރައީސް ވިދާޅުވިއެވެ.