ވެލާނާ އިންޓަރނޭޝަނަލް އެއަރޕޯޓަކީ ދެކުނު އެޝީއާ ސަރަޙައްދުގައި މިވަގުތު އޮޕަރޭޓްކުރަމުން އަންނަ އެންމެ ބިޒީ އެއް އެއަރޕޯޓެވެ. އެއަރޕޯޓަށް އޮންނަ ޑިމާންޓް ދުވަހެއް ދުވަހަކަށް އިތުރުވަމުންދާއިރު، ޖާގައިގެ ދަތިކަމަކީ މިވަގުތު އެއަރޕޯޓަށް ދިމާވެފައިވާ އެންމެ ބޮޑު އެއް ގޮންޖެހުމެވެ. މިކަމަށް ހައްލެއް ގެނެއުމުގެ ގޮތުން ސަރުކާރުން ދަނީ އެއަރޕޯޓް ތަރައްޤީކުރުމަށް 1 ބިލިއަން ޑޮލަރުގެ ބިޔަ މަޝްރޫޢެއް ކުރިއަށްގެންދަމުންނެވެ. މި ބިޔަ މަޝްރޫޢުގެ ތެރޭގައި، އާ ރަންވޭއެއް ހެދުމާއި، އިންޓަރނޭޝަނަލް ޓަރމިނަލަކާއި، އާ ސީޕްލޭން ޓަރމިނަލެއްގެ އިތުރުން، ފިއުލް ފަރމަކާއި، ކާގޯ ކޮމްޕްލެކްސްއެއް ތަރައްޤީކުރުމަށް ވަނީ ހަމަޖެހިފައިވެއެވެ. އަދި އެއަރޕޯޓަށް ޖައްސާ އެއަރ ކްރާފްޓްތަކަށް ފަސޭހަކަމާއެކު ޕާކް ކުރެވޭނެ އިންތިޒާމް ހަމަޖެއްސުމަށްޓަކައި، އެއަރޕޯޓުގެ ޕާކިން ސްޕޭސް އިތުރުކުރުންވެސް ހިމެނެއެވެ.
ވެލާނާ އިންޓަރނޭޝަނަލް އެއަރޕޯޓުގައި މިހާރު ބޭނުންކުރާ ނޯތް އޭޕްރަންގެ ބޮޑުމިނަކީ 50،000 (ފަންސާސް ހާސް) އަކަ މީޓަރެވެ. އާ ރަންވޭގެ މަޝްރޫޢުގެ ތެރެއިން ކުރިއަށްގެންދިއުމަށް ހަމަޖެހިފައިވާ ވެސްޓް އޭޕްރަންއަކީ 80،000 (އަށްޑިހަ ހާސް) އަކަ މީޓަރުގެ ޖާގައިގެ އޭޕްރަންއެކެވެ. މިއީ ވައިޓް-ބޮޑީ އެއަރކްރާފްޓްގެ 7 ފްލައިޓަށް ފަސޭހަކަމާއެކު ޕާކްކުރެވޭނޭހެން ތައްޔާރުކުރާ އޭޕްރަންއެކެވެ. ވެސްޓް އޭޕްރަންގެ މަސައްކަތް ނިމޭއިރު އެއަރޕޯޓުގެ ޕާކިން ސްޕޭސްގައި 130،000(ސަތޭކަ ތިރީސް ހާސް) އަކަ މީޓަރު ހުންނާނެއެވެ. މިއާއެކު އެއަރޕޯޓުގައި ޕާކްކުރެވޭ އެއަރ ކްރާފްޓްތަކުގެ އަދަދު ދެގުނައަށް އިތުރުކުރެވިގެންދާނެކަމަށް އެމް.އޭ.ސީ.އެލުން ބުނެއެވެ.
ވެސްޓް އޭޕްރަންގެ އަމަލީ މަސައްކަތް މިހާރު ފަށާފައިވާއިރު، އޭޕްރަނަށް ބޭނުންވާ ބިން ސާފުކޮށް، ލެވެލްކުރުމުގެ މަސައްކަތް މިހާރު ވަނީ ނިމިފައެވެ. އަދި މި މަސައްކަތަށް ގާތްގަނޑަކަށް 8 މަސްދުވަސް ހޭދަވާނެކަމަށް ބެލެވޭއިރު، އަމާޒަކީ އެއަރޕޯޓުގެ އާ ރަންވޭއާއެކު ވެސްޓް އޭޕްރަންގެ މަސައްކަތް ނިންމާ ބޭނުންކުރަން ފެށުންކަމަށް އެމް.އޭ.ސީ.އެލުން ބުނެއެވެ. ވެސްޓް އޭޕްރަންގެ މަސައްކަތްވެސް ކުރަމުންދަނީ ރަންވޭގެ މަސައްކަތް ކުރަމުންދާ، ޗައިނާގެ ބެއިޖިންގ އަރބަން ކޮންސްޓްރަކްޝަން ގްރޫޕް، ބީ.ޔޫ.ސީ.ޖީއިންނެވެ. ވެސްޓް އޭޕްރަންގެ މަސައްކަތް ނިމުމާއެކު، އެއަރޕޯޓުގައި މިހާރު ބޭނުންކުރާ އޭޕްރަން އަޕްގްރޭޑް ކުރުމުގެ މަސައްކަތްވެސް ފެށުމަށް ހަމަޖެހިފައިވާކަމަށް އެމް.އޭ.ސީ.ލުން ހާމަކުރެއެވެ.