ތިމާވެށި ޙިމާޔަތްކުރުމަށް މަސައްކަތް ކުރަންވީ އަދަބުދީ ބޮޑެތި ޖޫރިމަނާތަކެއް ކުރީމަ ނޫންކަމަށާއި، އެފަދަ ކަންކަމުގައި ފަރުދީ ޒިންމާ އިސްކުރުމަށް އެންވަޔަރަމަންޓް މިނިސްޓްރީން ގޮވާލައިފިއެވެ.
ޕީ.އެސް.އެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަފުޅުދައްކަވަމުން އެންވަޔަރަންމަންޓް މިނިސްޓްރީގެ ޑިރެކްޓަރ ޖެނެރަލް މުޙައްމަދު ޒާހިރު ވިދާޅުވީ، ފަހަކަށް އައިސް ތިމާވެއްޓަށް ގެއްލުން ލިބޭފަދަ ތަފާތު ޢަމަލުތައް ޢާއްމުރައްޔިތުންގެ ފަރާތުން ފެންނަލެއް އިތުރުވަމުންދާކަމަށެވެ. އަދި ތިމާވެއްޓާގުޅުންހުރި ކަންކަމުގައި ޢާއްމު ރައްޔިތުން މިހާރަށްވުރެ ހޭލުންތެރިވާންޖެހޭކަމަށްވެސް ޒާހިރު ވިދާޅުވިއެވެ.
ދިވެހި ރާއްޖެއަކީ ގުދުރަތީ ގޮތުން ވަރަށްވެސް ނާރުކު ތިމާވެއްޓެއްގެ މައްޗަށް ބިނާވެފައިވާ ޤައުމެކެވެ. ވަށައިގެން ކަނޑުއޮވެފައި، ބިމުގެ ޖާގަ ކުޑަވުމާއި، ދުނިޔޭގެ އެހެން ޤައުމުތަކާއި އަޅާބަލާއިރު ބިން ތިރިވުމަކީ ތިމާވެށީގެ ރޮނގުން ރާއްޖެއަށް ދިމާވެފައިވާ ބޮޑެތި ގޮންޖެހުންތަކެކެވެ. އެހެންކަމުން ގުދުރަތީ ތަފާތު ކާރިސާތަކުން ރާއްޖެއަށް ލިބޭ ގެއްލުންތައް ވިހާވެސް ކުޑަކުރުމަށްޓަކާ، ތިމާވެށި ޙިމާޔަތްކުރުމަށް ކޮންމެ މީހަކުވެސް މަސައްކަތް ކުރުން މުހިއްމެވެ. ނަމަވެސް ހިތާމައަކީ މިފަދަ ނާޒުކު ތިމާވެއްޓެއް ލިބިފައިވާ ޤައުމެއްގެ، ބައެއް މީހުންގެ ފަރާތުން ތިމާވެއްޓާއި ރައްޓެހިނޫން ޢަމަލުތަކެއް ފެންނަމުންދާކަމެވެ. ވަކިން ޚާއްސަގޮތެއްގައި ރަށްރަށަށް ލިބިފައިވާ ގުދުރަތީ ރީތިކަމާއި، ރަށުގެ ފެހިކަމާއި ގުޅިފައިވާ ރުއްގަސް ކެނޑުމާއި، އެތަކެތި އުފުރުމާއި، ކޮނެގެން ނެގުމާއި، އަދި ރުއްގަސް އެހެން ރަށްރަށަށް ގެންދިއުން މިހާރަކަށް އައިސް ވަރަށް އާއްމުވަމުންދާކަމަށް އެންވަޔަރަމަންޓް މިނިސްޓްރީން ބުނެއެވެ.
img:http://s1.psmnews.mv/images/660x400/15154090997056.jpg|
ޕީ.އެސް.އެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅުދައްކަވަމުން އެންވަޔަރަމަންޓް މިނިސްޓްރީގެ ޑިރެކްޓަރ ޖެނެރަލް މުޙައްމަދު ޒާހިރު ވިދާޅުވީ، އެކި ކަހަލަ ގަސްގަހާގެހީގެ ނަސްލުތައް ޙިމާޔަތްކޮށް، އެތަކެތި މުޑުވައްކޮށް، އާލާކުރުމަކީ މިނިސްޓްރީން ނުހަނު ބާރުއަޅާ، އަދި އެކަމަށް ހިތްވަރުވެސް ދޭކަމެއްކަމަށެވެ. ނަމަވެސް އޭގެ ބަދަލުގައި ބައެއް ކައުންސިލްތަކުންނާއި އަމިއްލަ ފަރުދުންގެ ފަރާތުން ވިޔަފާރީގެ ބޭނުމަށް ޤަވާއިދާ ޚިލާފަށް ރުއްގަސް ކެނޑުމާއި އުފުރުމުގެ އަމަލުތައް ފެންނަކަމީ ހިތާމަކުރާ ކަމެއް ކަމަށެވެ. އަދި މިފަދަ ކަންކަމަށް އާއްމުން ހޭލުންތެރިކުރުމަށްޓަކާ އެކަމަށް ޚާއްސަ ޤަވާޢިދެއް އެކުލަވާލާ، އެއަށް އަމަލުކުރަމުންދާއިރު، އެ ޤާނޫނުގައިވެސް ނާސަރީ ހައްދައިގެން ރުއްގަސް މުޑުވައްކުރުމަށް ބާރުއަޅާކަމަށްވެސް ޒާހިރު ވިދާޅުވިއެވެ.
"އަލަށް ތަނެއް ތަރައްޤީކުރާއިރުވެސް، އެތަނެއް ފެހިކުރުމަށްޓަކާ އެންވަޔަރަމަންޓް މިނިސްޓްރީގެ މި ދެންނެވި ޤަވާއިދުގައިވެސް ބާރު އަޅާ ނާސަރީ ހަދައިގެން، ނާސަރީގައި ރުއްގަސް މުޑުވައްކޮށްގެން، ތަންތަނަށް ވިޔަފާރީގެ ގޮތުގައި ގެންދިއުމަށް. އަދި އެއީ މިނިސްޓްރީންވެސް ތަރުހީބުދޭކަމެއް. އެހެންނަމަވެސް މިކަން ވެގެންމިދަނީ އެއަށްވުރެ މާ ދެރަކޮށް. ބޮޑެތި ވާ ހުންނަ ރަށްރަށުގެ ވަލުގައި ހެދިފައި ހުންނަ ރުށްތަކާއި، ނިކަގަސްތަކާއި، ބޯކަށިކެޔޮގަސްތަކާއި، މިހެންގޮސް ބޭނުންވިއްޔާ ބޭނުންވިހާ ގަސްގަސް ޤަވާއިދާ ޚިލާފަށް ކަނޑާ، އެރަށުން އަނެއް ރަށަށް މި ގެންދަނީ" މުޙައްމަދު ޒާޙިރު ވިދާޅުވިއެވެ.
img:http://s4.psmnews.mv/images/660x400/15154090903324.jpg|ޤަވާޢިދާ ޚިލާފަށް ރަށަކުން ބޭރުކުރަން ތައްޔާރުކޮށްފައިވާ މަގޫ ގަސްތަކެއް - ޒާހިރު ވިދާޅުވީ، ރަށްރަށުގައި ހެދިފައި ހުންނަ ބޮޑެތި ރުއްގަސް ފަދަ ތަކެތި ކެނޑުމަށްފަހު، ޤަވާއިދާ ޚިލާފަށް އެއް ރަށުން އަނެއް ރަށަށް ގެންދިއުމަކީ ދިރޭތަކެތީގެ ނަސްލަށް އިޢާދަނުކުރެވޭފަދަ ބޮޑެތި ގެއްލުންތަކެއް ލިބިދާނެކަމެއް ކަމަށެވެ. އަދި މިފަދަ އަމަލުތަކުގެ ސަބަބުން ތިމާވެށީގެގޮތުން ބޮޑެތި މައްސަލަތަކެއް ކުރިމަތިވުންވެސް އެކަށީގެންވާކަމަށެވެ. އެގޮތުން ރަށްގިރުމަށް މަގުފަހިވުމާއި، ވިއްސާރަ މޫސުމުގައި ފެންބޮޑުވުމާއި، އެއް ރަށުން އަނެއް ރަށަށް ގެންދާ ގަސްގަހުން އެކި ޒާތުގެ ބަލި ފެތުރުން ފަދަ ތިމާވެށީގެ މައްސަލަތައް މިހާރުވެސް ފާހަގަކުރެވިފައިވާކަމަށް ޒާހިރު ވިދާޅުވިއެވެ.
"މިހެން މިކަން ކުރުމަކީ އަޅުގަނޑުމެން ތާއީދުކުރާ ކަމެއް ނޫން. އަދި މިކަމަކީ މީގެ ސަބަބުން ރަށުގެ ވެއްޓަށް ވަރަށް ބޮޑެތި ގެއްލުންތަކެއް ލިބޭނެކަމެއް. ރަށުގައި ފެންބޮޑުވުން ފަދަ ކަންކަން މިކަމުގެ ސަބަބުން ކުރާނެ. ހަމައެހެންމެ އެތަނުގައި ހުންނަ އެހެނިހެން ދިރުންތައް ގަހުގެ ބުނޑުގައި ދިރިއުޅޭ ބާވަތްތައްވެސް އެހެން ރަށްރަށަށް ބަދަލުކުރެވި، އެއް ރަށެއްގައި ނޫޅޭ އެއްޗެހި އަނެއް ރަށަކަށް ގެންދެވި، މިހެންގޮސް ވަރަށް ބޮޑެތި މައްސަލަތައް ހަޤީޤަތުގައި ނިކުންނާނެކަމަކަށްވާތީ މިކަން ނުކުރުމަށް އިލްތިމާސް މިކުރަނީ" މުޙަންމަދު ޒާހިރު ވިދާޅުވިއެވެ.ރާއްޖެ މިއަދު ޕްރޮގްރާމްގައި ވާހަކަދައްކަވަމުން މުޙައްމަދު ޒާހިރު ވިދާޅުވީ، ފަހަކަށް އައިސް ތިމާވެއްޓަށް ގެއްލުން ލިބޭ ފަދަ ތަފާތު ޢަމަލުތައް ޢާއްމުރައްޔިތުންގެ ފަރާތުން ފެންނަލެއް އިތުރުކަމަށާއި، ތިމާވެއްޓާއި ގުޅުންހުރި ކަންކަމުގައި އާއްމު ރައްޔިތުން މިހާރަށްވުރެ ހޭލުންތެރިވާންޖެހޭކަމަށެވެ. އަދި ތިމާވެށި ޙިމާޔަތްކުރުމަށް މަސައްކަތް ކުރަންވީ އަދަބުދީ ބޮޑެތި ޖޫރިމަނާތަކެއް ކުރީމަ ނޫންކަމަށާއި، އެފަދަ ކަންކަމުގައި ފަރުދީ ޒިންމާ އިސްކުރުމަށްވެސް އޭނާ އިލްތިމާސްކުރެއްވިއެވެ.
img:http://s4.psmnews.mv/images/660x400/15154091542491.jpg|ޤަވާޢިދާ ޚިލާފަށް ރަށަކުން ބޭރުކުރަން ތައްޔާރުކޮށްފައިވާ ގަސްތަކެއް -
"އަޅުގަނޑުމެން މިއުޅެނީކީ ކޮންމެހެން ގަދަބަދަވިކަމުން ބަޔަކު ލައްވާ މަސައްކަތެއް ކުރުވާކަށް ނޫން. އަދަބުދިނީމައެއްނޫން ތިމާވެށި ހިމާޔަތްކުރަންވީ. ކޮންމެ މީހަކުވެސް އަމިއްލައަށް ޤަބޫލުކުރަންވީ ތިމާއަށް ތިމާ ދިރިއުޅޭ ވެށި ހިތްގައިމުކަމާއެކީ ބޭއްވިގެންނޫނީ އަނެއް މީހާއަށް އެ ހިތްހަމަޖެހުން ނުލިބޭނެކަން. އެހެންކަމުން ކޮންމެ މީހަކުވެސްވީ އެމީހެއްގެ އަމިއްލަ ޒިންމާއެއްގެ ގޮތުގައި ދެކިގެން ސާފުތާހިރުކޮށް، ރީތިކޮށް ބެލެހެއްޓުމާއި، ފިނިވާނެފަދަ ގަސްތަކާއެއްޗެހި ބަހައްޓާ، މޭވާ އަޅާ ގަސްތަކާއެއްޗެހި އިތުރުކުރަންވީ" މުޙަންމަދު ޒާހިރު ވިދާޅުވިއެވެ.އެންވަޔަރަމަންޓް މިނިސްޓްރީން އެކުލަވާލާފައިވާ ރުއްގަސް ކެނޑުމާއި، އުފުރުމާއި، ކޮނެގެން ނެގުން އަދި އެއްރަށުން އަނެއްރަށަށް ގެންދިއުމާބެހޭ ޤަވާއިދުގައިވާގޮތުން ރަށުގެ ހޭޅީގައި އެންމެ ގޮނޑުދޮށަށް ހެދިފައިވާ ގަހުން ފެށިގެން އެއްގަމަށް 15 މީޓަރު ފުޅާ ސަރަޙައްދުގައި ހުރި ރުއްގަހާއި، ކަނޑޫފަލާ، ކުޅި ފަދަ ތަންތަނާއި އެތަންތަން ވަށައިގެން 15 މީޓަރު ފުޅާ ސަރަޙައްދުގައި ހުރި ރުއްގަސް ކެނޑުމަކީ މަނާކަމެކެވެ. އަދި ހިމާޔަތްކޮށްފައިވާ ރުއްގަހާއި، އާދަޔާ ޚިލާފު ސިފައެއް ލިބިފައިވާ ރުއްގަސް ކެނޑުމާއި، ނެގުން އަދި ތަންތަނަށް ގެންދިއުމަކީވެސް މަނާކަމެކެވެ.