ނެނޯ ޓެކްނޮލޮޖީ ބޭނުންކޮށްގެން މަސް ފިނިކުރުމުގެ ޓެސްޓުތަށް ފަށައިފިއެވެ. މި ޓެސްޓުތައް ފައްޓަވާ ދެއްވީ މިނިސްޓަރ އޮފް ފިޝަރީޒް އެންޑް އެގްރިކަލްޗަރ ޑރ މުހައްމަދު ޝައިނީއެވެ. ނެނޯ ޓެކްނޮލޮޖީ ބެނުންކޮށްގެން މަސްފިނި ކުރުމުގެ މަސައްކަތް ފުރަތަމަ ފެށީ މިއަހަރުގެ މަސްވެރިންގެ ދުވަހުގެ ހަރަކާތްތަކާއި ގުޅުވައިގެން މިހާރު ހއ އިހަވަންދޫގައި ކުރިއަށް ގެންދާ ހަރަކާތްތަކުގެ ތެރޭގައެވެ.
އިހަވަންދޫގައި ނެނޯ ޓެކްނޮލޮޖީ ބޭނުންކޮށްގެން މަސް ފިނިކުރުމުގެ މަސައްކަތް ފައްޓަވާ ދެއްވުމަށްފަހު މިނިސްޓަރ ޝައިނީ ވިދާޅުވީ މިއީ މަސްވެރިންނަށް ދިމާވާ ކަންކަން ހައްލު ކޮށްދެއްވުމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ކުރައްވަމުން ގެންދާ މަސައްކަތްޕުޅުގެ ދަށުން ފެއްޓެވި ކަމެއްކަމަށެވެ. އެގޮތުން މަސްވެރިންނަށް ދިމާވާ މައްސަލަތައް ހައްލުކުރުމަށް ކުރައްވާ މަސައްކަތުގެ ތެރެއިން މިފްކޯއަށް ދިމާވެފައިވާ މައްސަލަތައް ހައްލުކުރުމާއި މަސްވެރިންނަށް އައިސް ލިބުމުގެ ދަތިތައް ހައްލުކުރުމުގެ މަސައްކަތް މިނިސްޓަރ ފާހަގަކުރެއްވިއެވެ.
"މިފްކޯގައި ހުރި އާބާތުރަ ފިލުވާ މަސްވެރި ސީޒަނަށް ތައްޔާރުވުމަށްޓަކައި ކުރަންޖެހޭ ކަންތައްތައް ކުރުމަށްޓަކައި މިފްކޯއަށް 3 މިލިއަން ރުފިޔާގެ ލޯނެއް ދިނުމަށް ނިންމެވި. ދެން އެލޯނު މިހާރު މިފްކޯއަށް ހަވާލުކޮށްފައިވަނީ. އޭގެ އިތުރަށް ދެން އަޅުގަނޑުމެންގެ ތެރޭގައި ދެކެވުނީ އައިސްގެ މައްސަލަތައް އެންމެ ރަނގަޅަށް ހައްލުކުރެވޭނީ ދޯނިފަހަރުގަ މަސްވެރިންނަށް އެ އައިސް އަމިއްލައަށް އެމީހުންގެ ކޮންޓްރޯލްގަ ލިބިގެންކަމަށް." މިނިސްޓަރ ޝައިނީ ވިދާޅުވިއެވެ.
img:http://s3.psmnews.mv/images/660x400/15133581999458.jpg|އިހަވަންދޫއިން މިނިސްޓަރ ޝައިނީއަށް މަރުޚަބާ ދަންނަވަނީ
ނެނޯ ޓެކްނޮލޮޖީ ބޭނުންކޮށްގެން ކުރާ މިޓެސްޓް ތަކުގެ ހުރިހާ ޚަރަދެއް ކުރަނީ އިންޓަނޭޝަނަލް ޕޯލް އެންޑް ލައިން ފައުންޑޭޝަންގެ ފަރާތުންނެވެ. އަދި އައިސްލޭންޑްގެ މިޓެކްނޮލޮޖީ ޓެސްޓް ކުރުމުގެ މަސައްކަތް ކުރައްވަނީ އެތަނުގެ ކަމާގުޅުންހުރި ބޭފުޅުންނެވެ.
"މި އައިސް މެޝިނަކީ ނެނޯ އައިސް ޓެކްނޮލޮޖީ ބޭނުންކޮށްގެން ވަރަށް ކުޑަކުޑަ ވަގުތުކޮޅެއްގައި އައިސް ވަގުތުން އުފައްދާ. އޭގެ މާނައަކީ މޫދަށް ހޮޅިގުޅާފަ އަނެއްކޮޅުން ޕެޓްރޯލް އަޅާގޮތަށް އައިސް އޭގެން ނުކުންނާނީ. ނުކުމެފަ އެ ބޭނުންކޮށްގެން މަހުގެ ޓެންޕަރޭޗާރ ވީހާވެސް ދަށަށް ގެނައުން" މިނިސްޓަރ އިތުރަށް ވިދާޅުވިއެވެ.
ނެނޯ ޓެކްނޮލޮޖީ ބޭނުން ކޮށްގެން މަސްފިނި ކުރުމުގެ ޓެސްޓުތައް ފެށިއިރު ޓެކްނޮލޮޖީގެ އިތުރު ވަސީލަތްތައް ބެނުންކޮށްގެން މަސްފިނި ކުރުމުގެ ޓެސްޓުތައް މިހާރުވެސް ދަނީ ކުރަމުންނެވެ. އަދި މި ޓެސްޓުތަކަށްފަހު މިތަނުުން އެންމެ ރަނގަޅު، ރައްޖެއާއި އެންމެ ގުޅޭ ނިޒާމެއް ބޭނުން ކުރަން ނިންމާފައިވާކަމަށް ފިޝަރީޒް މިނިސްޓްރީން ބުނެއެވެ.