އަންނަ ހަފުތާގައި 2،050 ސްކޮލަޝިޕަށް ފުރުސަތު ހުޅުވާލާނެ ކަމަށް އެޑިއުކޭޝަން މިނިސްޓްރީން ހާމަކޮށްފިއެވެ. އެޑިޔުކޭޝަން މިނިސްޓްރީ ހާމަކޮށްފައިވާގޮތުގައި މަތީ ތައުލީމު ހާސިލްކުރުމަށް ދޭ މި ފުރުސަތު މި މަހުގެ 21 ވަނަ ދުވަހު އިއުލާނުކުރާނެއެވެ. މިއީ މަތީ ތައުލީމު ފޯރުކޮށްދިނުމަށް ރައީސް އަބްދުﷲ ޔާމީން ވެވަޑައިގެންފައިވާ ވައުދުގެ ދަށުން ދޭ ފުރުސަތުތަކެކެވެ. ރައީސް ވަނީ އަންނަ އަހަރުގެ ތެރޭގައި މަތީ ތައުލީމުގެ 3،050 ފުރުސަތު ދޭނެ ކަމަށް ކަމަށް ވިދާޅުވެފަ އެވެ. އެއީ 2،050 ސްކޮލަޝިޕާއި 1،000 ލޯނުގެ ފުރުސަތެވެ.
ޕްރޮމޯޓިން ސްކިލްސް ފޯ ދަ ފިއުޗާ ގެ ނަމުގައި ހުޅުވާލާ ސްކޮލަޝިޕްތަކުގެ ދަށުން ކިޔެވޭނީ ސެޓްފިކެޓް ލެވެލް އިން ފެށިގެން ޑިޕްލޮމާއާ ހަމައަށެވެ. ރާއްޖޭގެ ކޮލެޖުތަކާއި ދެ ޔުނިވާސިޓީގައި ހިންގާ ޕްރޮގްރާމުތަކުގައި ކިޔެވުމަށް އެ ސްކޮލަޝިޕުން ފުރުސަތު ދޭނެކަމަށް އެޑިޔުކޭޝަނުން މައުލޫމަތުދެއްވާއެވެ. އަންނަ މަހު ކޮލެޖްތަކާއި ޔުނިވާސިޓީތަކުގެ ކިޔެވުން ފެށެން ވާއިރަށް ސްކޮލަޝިޕްގެ ހުރިހާ ކަމެއް ނިންމުމަށް އެޑިޔުކޭޝަނުން ގެންދަނީ މަސައްކަތް ކުރައްވަމުންނެވެ..
ލޯން ސްކީމްގެ އެހީގައި މިހާރުވެސް 5200 ކުދިން ކިޔަވަމުންދާއިރު މިދިޔަ ތިން އަހަރު ލޯން ސްކީމަށް ގާތްގަނޑަކަށް އެއް ބިލިއަން ދިވެހި ރުފިޔާ އެޑިޔުކޭޝަން މިނިސްޓްރީން ވަނީ ހޭދަކޮށްފައިެވެ.