ނޭޝަނަލް ބައިކް ޗެމްޕިއަންޝިޕްގެ ސްޕޮންސަރެއްގެ ގޮތުގައި އިއްސޯ މޯލްޑިވްސް ހަމަޖައްސައި އެއްބަސްވުމުގައި ސޮއިކޮށްފިއެވެ.
މި އެއްބަސްވުމުގައި ސޮއިކުރީ އެކަމަށްޓަކައި ހުޅުމާލޭގައި މިއަދު ކުރިޔަށްގެންދިޔަ ޙަރަކާތެއްގައެވެ. ބައިކް މޯލްޑިވްސްގެ ފަރާތުން އެއްބަސްވުމުގައި ސޮއިކުރީ އެޖަމްޢިއްޔާގެ ޗެއަރޕަރސަން ޒުލައިޚާ ޙަސަން ދީދީއެވެ. އިއްސޯގެ ފަރާތުން ސޮއިކުރެއްވީ އެ ކުންފުނީގެ މެނޭޖިންޑިރެކްޓަރ އިބްރާހިމް ޙުސެން ނަސީމެވެ.
ބައިކްމޯލްޑިވްސްގެ ފަރާތުން އިންތިޒާމްކުރާ ނޭޝަނަލް ޗެމްޕިއަންޝިޕް ބޭއްވުމަށް ހަމަޖެހިފައިވަނީ މިމަހުގެ ސައުވީހާއި ފަނަސްވީސް ވަނަ ދުވަހު ބޮޑުތަކުރުފާނުމަގުގެ ތާރައެޅި ސަރަހައްދުގައެވެ.
މި ޙަރަކާތާއިގުޅޭގޮތުން ވާހަކަ ދައްކަމުން ބައިކްމޯލްޑިވްސްގެ ޖެނެރަލް ސެކްރެޓަރީ އަސްމާ ޙަސަންވިދާޅުވީ މި ޗެމްޕިއަންޝިޕަށް ބޮޑު ތަރުޙީބެއް ލިބެމުންދާކަމަށާއި ބައިވެރިވުމުގެ މުއްދަތު ހުޅުވާލާފައިވަނީ މިމަހުގެ 18 ވަނަ ދުވަހާއިހަމަޔަށްކަމަށެވެ. މި ޗެމްޕިއަންޝިޕްގައި ވާދަކުރުމަށް ބައިކްމޯލްޑިސްގެ މެމްބަރުން އެއްވެސް ފީއެއް ދައްކަން ނުޖޭހެނެ ކަމަށާއި، އާންމު ފަރާތަކުން ބައިވެރިވާނަމަ ރަޖިސްޓްރޭޝަން ފީއެެއްގެ ގޮތުގައި 200 ރުފިޔާ ދައްކަން ޖެހޭނެކަމަށް އަސްމާ ވިދާޅުވިއެވެ.
އިއްސޯއިން ބުނީ މިފަދަ ޙަރަކާތެއްގައި ބައިވެރިވުމަށް ނިންމީ މިއީ ތިމާވެއްޓާރ ރައްޓެހި އިޖުތިމާޢީ ރަނގަޅު ޙަރަކާތަކަށް ވާތީކަމަށެވެ. އަދި މިފަދަ ޙަރަކާތެއް ބޭއްވުމަށް ބައިކް މޯލްޑިވްސް އިން އިނީޝިއޭޓިވް ނަގާފައިވާތީ އިއްސޯގެ ފަރާތުން ވަނީ އެކަން ފާހަގަކޮށްފައެވެ.
ބައިކްމޯލްޑިވްސްގެ ފަރާތުން ދަނީ ރާއްޖޭގައި ބައިސިކަލް ދުއްވާ މީހުން އިތުރުކޮށް ކުދިބޮޑު އެންމެން އެކަމަށް ޝައުގުވެރިކުރުވުމަށް ގިނަ ޙަރަކާތްތަކެއް ހިންގަމުންނެވެ.
ނޭޝަނަލް ބައިކް ޗެމްޕިއަންޝިޕްގެ ސްޕޮންސަރެއްގެ ގޮތުގައި ހަމަޖެއްސި، އިއްސޯ މޯލްޑިވްސް އަކީ މާލޭގައި ހުޅުވުމަށް ތައްޔާރުވަމުންދާ ސީފުޑަށް ޚާއްސަ ރެސްޓޯރެންޓެކެވެ.