ރާއްޖޭގެ 5 ރަށެއްގައި އެއަރޕޯޓް ތަރައްޤީކުރުމަށް މެލޭޝިއާގެ ގްރީޕޮން އެނަރޖީއާއި ސަރުކާރާއި ދެމެދު ވި އެއްބަސްވުން ބާތިލުކޮށްފިއެވެ.
މި އެއްބަސްވުމުގެ ދަށުން އެއަރޕޯޓް ތަރައްޤީކުރުމަށް މެލޭޝިއާގެ ކުންފުންޏާ ހަވާލުކޮށްފައިވާ 5 ރަށަކީ ހދ. ކުޅުދުއްފުށި، ފ. ނިލަންދޫ، ގދ. މާވަރުލު، އަދި އެއަތޮޅު ފަރެސްމާތޮޑާގެ އިތުރުން ށ.ފުނަދޫއެވެ.
ގާތްގަނޑަކަށް 57.5 މިލިއަން ޑޮލަރު ޚަރަދުކޮށްގެން މި 5 ރަށުގައި އެއަރޕޯޓް ތަރައްޤީކުރުމަށް މެލޭޝިއާގެ ގްރީޕޮންއާއެކުވެފައިވާ އެއްބަސްވުން ސަރުކާރުން ބާތިލުކޮށްފައިވަނީ މިދިޔަ މަހުގެ 18 ވަނަ ދުވަހުއެވެ.
މިކަމާގުޅޭގޮތުން ޕީ.އެސް.އެމް ނިއުސްއަށް މަޢުލޫމާތުދެއްވަމުން ރީޖަނަލް އެއަރޕޯޓްސްގެ ޑިރެކްޓަރ ޖެނެރަލް ސާމީ އަޤީލް ވިދާޅުވީ، މި އެއްބަސްވުން އުވާލަން ސަރުކާރުން ނިންމެވީ، މި 5 ރަށުގައި އެއަރޕޯޓު ތަރައްޤީކުރުމަށް މެލޭޝިއާގެ ގްރީޕޮން އެނަރޖީއާއި ހަވާލުކޮށްފައިވަނީ ކޮންޓްރެކްޓަރ ފައިނޭންސް އުސޫލުންކަމަށާއި، އެކުންފުނިން މި މަސައްކަތާއި ހަވާލުވީ، އެގްޒިމް ބޭންކް މެދުވެރިކޮށް ލޯން އެހީ ހޯދައިގެން މަސައްކަތް ކުރިއަށްގެންދާގޮތަށްކަމަށެވެ. އަދި މަޝްރޫޢުގެ ސޮވެރިން ގެރެންޓީ ސަރުކާރުން ދޭން ނިންމާފައިވަނީ އެކުންފުންޏަށް ފައިނޭންސް ހަމަޖެހުމުންކަމަށާއި، ކަނޑައެޅިފައިވާ މުއްދަތުގެ ތެރޭގައި އެކުންފުންޏަށް ފައިނޭސް ހަމަޖެއްސިފައިނުވާތީ، ސަރުކާރުން އެކުންފުންޏާއެކުވެފައިވާ އެއްބަސްވުން ބާތިލުކުރަން ނިންމެވީކަމަށެވެ.
ސާމީ ވިދާޅުވީ، މި 5 އެއަރޕޯޓުގެ މަޝްރޫޢަކީވެސް މިއަހަރުގެ ބަޖެޓުގައި ހިމަނާފައިވާ މަޝްރޫޢުތަކެއްކަމުން، މި އެއަރޕޯޓުތަކުގެ މަސައްކަތް ކުރިއަށްގެންދެވުމަށް ސަރުކާރުން ވަރަށް ބޮޑު އިސްކަމެއްދެއްވާކަމަށެވެ. އެގޮތުން ބައެއް ފަރާތްތަކުން އެއަރޕޯޓްތައް ތަރައްޤީކުރުމުގެ ޝަޢުގުވެރިކަން ފާޅުކޮށްފައިވާކަމަށާއި، އެ ފަރާތްތަކާއެކު މިހާރުވެސް މަޝްވަރާތައް ކުރަމުންދާކަން ސާމީ ފާހަގަކުރެއްވިއެވެ.
މެލޭޝިއާގެ ގްރީޕޮން އެނަރޖީއާއެކު ސަރުކާރުންވެފައިވާ އެއްބަސްވުން ބާތިލުކޮށްފައިވާއިރު، ހދ. ކުޅުދުއްފުއްޓާއި، ށ. ފުނަދޫގައި އެއަރޕޯޓް ތަރައްޤީކުރުމަށް ވާންޖެހޭ ތައްޔާރީތައް ސަރުކާރުން މިހާރު އަންނަނީ ކުރަމުންނެވެ. އެގޮތުން މި ދެރަށުގައި އެއަރޕޯޓް ހެދުމަށް ބޭނުންވާ ބިން ހިއްކުމުގެ މަސައްކަތް އެމް.ޓީ.ސީ.ސީއާއި ހަވާލުކޮށްފައިވާކަމަށް ރީޖަނަލް އެއަރޕޯޓްސްއިން މަޢުލޫމާތުދެއެވެ.