ވެލާނާ އިންޓަރނޭޝަނަލް އެއަރޕޯޓުގައި ތަރައްޤީކުރާ އައު އިންޓަރނޭޝަނަލް ޓަރމިނަލް އިމާރާތްކުރުމަށް ބޭނުންވާ ޕައިލްތައް ޓެސްޓްކުރުމުގެ މަސައްކަތް ފަށައިފިއެވެ.
300 މިލިއަން ޑޮލަރު ހަރަދުކޮށްގެން ޒަމާނީ ފެންވަރަށް ތަރައްޤީކުރާ މި އައު ޓަރމިނަލާއެކު އަހަރަކު 7.5 މިލިއަން ފަސިންޖަރުންނަށް ހިދުމަތް ދެވޭނެކަމަށް އެމް.އޭ.ސީ.އެލުން ބުނެއެވެ. ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމަށް ސަރުކާރުން ހިންގާ ބިޔަ މަޝްރޫޢުގެ ދަށުން، އެއަރޕޯޓުގެ އައު އިންޓަރނޭޝަނަލް ޓަރމިނަލްގެ މަސައްކަތް ހަވާލުކޮށްފައިވަނީ ސަޢުދީ އަރަބިއްޔާގެ އެންމެ ބޮޑު އެއް ކުންފުނިކަމުގައިވާ ސަޢުދީ ބިންލާދިން ގްރޫޕް، އެސް.ބީ.ޖީއާއެވެ. އެއަރޕޯޓުގެ އައު އިންޓަރނޭޝަނަލް ޓަރމިނަލް އިމާރާތްކުރުމަށް ހުޅުލެއިން ހަތްދިހަ އަށްހާސް އަކަމީޓަކުގެ ބިން ވަނީ ކަނޑައަޅާފައެވެ.
އިންޓަރނޭޝަނަލް ޓަރމިނަލްގެ މަސައްކަތްތައް ކުރިއަށްދާގޮތާއި ގުޅޭގޮތުން ޕީ.އެސް.އެމް ނިއުސްއަށް މަޢުލޫމާތުދެއްވަމުން މޯލްޑިވްސް އެއަރޕޯޓްސް ކޮމްޕެނީ ލިމިޑެޓް، އެމް.އޭ.ސީ.އެލްގެ މެނޭޖިންގ ޑިރެކްޓަރ ޢާދިލް މޫސާ ވިދާޅުވީ، މިހާރު ކުރިއަށްދަނީ ޓަރމިނަލްގެ މެއިން ސްޓްރަކްޗަރއަށް ބޭނުންވާ ޕައިލްތައް ޓެސްޓްކުރުމުގެ މަސައްކަތްކަމަށެވެ. އަދި މި ޓެސްޓުތައް ނިމުމާއެކު، ޕައިލްތަކަށް އޯޑަރުކުރާނެކަމަށާއި، ގާތްގަނޑަކަށް 1300 އަށްވުރެ ގިނަ ޕައިލް މި މަސައްކަތަށް ރާއްޖެ ގެނެއުމަށް ހަމަޖެހިފައިވާކަމަށެވެ. އަދި ކުރިއަށް އޮތް 3 މަސް ދުވަހުގެ ތެރޭގައި ޕައިލިންގގެ މަސައްކަތް ނިންމާ، ޓަރމިނަލްގެ ކޮންސްޓްރަކްޝަން މަސައްކަތްތައް ފެށުމަކީ ކުންފުނިން ވަނީ އަމާޒުހިފާފައެވެ.
img:http://s1.psmnews.mv/images/660x400/15082345844386.jpg|ޕައިލްތައް ޓެސްޓްކުރުމުގެ މަސައްކަތުގެ ތެރެއިން / ފޮޓޯ: ޕީއެސްއެމް
ފަހުގެ ޒަމާނީ ވަސީލަތްތަކާއެކު ތަރައްޤީކުރާ މި އިންޓަރނޭޝަނަލް ޓަރމިނަލުން ދުނިޔޭގެ އެންމެ ކުރިއަރާފައިވާ އެއަރޕޯޓްތަކުން ލިބޭފަދަ ފެންވަރު ރަނގަޅު ޙިދުމަތް ފަސިންޖަރުންނަށް ލިބިގެންދާނެކަމަށް އެމް.އޭ.ސީ.އެލުން ބުނެއެވެ. އެގޮތުން ވެލާނާ އިންޓަރނޭޝަނަލް އެއަރޕޯޓުގެ އައު އިންޓަރނޭޝަނަލް ޓަރމިނަލުގައި 6 އެއިރޯ-ބްރިޖް ހުންނާނެއެވެ. އަދި 40 ޑިޕަރޗަރ ގޭޓާއި، 38 އިމިގްރޭޝަން ކައުންޓަރުގެ އިތުރުން 12 ޖެޓީ ހުންނާނެއެވެ. ހަމައެހެންމެ ފްލައިޓްތަކަށް ބޭނުންވާ ފިޔުލް ވިހާވެސް ފަސޭހައިން ލިބޭނެ އިންތިޒާމް ހަމަޖެއްސުމަށްޓަކައި ފިޔުލް-ހައިޑްރެންޓް ސިސްޓަމް އިންސްޓޯލްކުރެވިފައި ހުންނާނެއެވެ. މީގެއިތުރުންވެސް، ފަހުގެ ޒަމާނީ ޓެކްނޮލޮޖީއާއި ރަށްޓެހި އެތައް ހިދުމަތްތަކެއް މިތަނުން ލިބިގެންދާނެއެވެ. މި ޓަރމިނަލް ތަރައްޤީކުރުމަށް ހަމަޖެހިފައިވަނީ މުސްތަޤުބަލުގައި ޖާގައިތުރުކުރަން ބޭނުންވެއްޖެނަމަ، އެކަންވެސް ފަސޭހަކަމާއެކު ކުރެވޭނެހެންކަމަށް އެމް.އޭ.ސީ.އެލުން ބުނެއެވެ.
ވެލާނާ އިންޓަރނޭޝަނަލް އެއަރޕޯޓަކީ މުޅި މި ސަރަޙައްދުގައިވެސް އޮތް އެންމެ ހިތްގައިމު އެއަރޕޯޓަށް ހެދުމަށް ސަރުކާރުން ކުރިއަށްގެންދާ ބިޔަ މަޝްރޫޢުގެ ދަށުން، އައު ޓަރމިނަލް ތަރައްޤީކުރުމަށް އެކަނިވެސް 300 މިލިއަން ޑޮލަރު ޙަރަދުކުރުމަށް ވަނީ ހަމަޖެހިފައި. މި ޓަރމިނަލްގެ މަސައްކަތް ނިމިގެންދާއިރު، އެއަރޕޯޓުން އަހަރަކު 7.5 މިލިއަން ފަސިންޖަރުންނަށް ހިދުމަތް ދެވޭނެކަމަށް އެމް.އޭ.ސީ.އެލުން ބުނެއެވެ.