ހުޅުމާލޭގެ ފުރަތަމަ ފިޔަވައްސާއި ދެވަނަ ފިޔަވަހި ގުޅުވާލުމަށް އަޅާ ބްރިޖްތަކުގެ ޑިޒައިން މި އޮކްޓޫބަރުމަހުގެ ނިޔަލަށް ނިމޭނެކަމަށް އެޗްޑީސީން ހާމަކޮށްފިއެވެ.
ހުޅުމާލޭގެ ދެ ފިޔަވަހީގެ ދެމެދުގައި އޮންނަ ކޯޒްވޭ ހުރަސްކޮށް އަޅާ ބްރިޖް ތަކުގެ ޑިޒައިނާއި ކޮންސަލްޓެންސީގެ މަސައްކަތް ހަވާލުކޮށްފައިވަނީ ތުރުކީގެ ކުންފުންޏަކާއެވެ. އެޗްޑީސީގެ ޑިރެކްޓަރ އޮފް ޕްރޮޖެކްޓް ނަވާޒް ޝައުޤީ ވިދާޅުވީ ކޯޒްވޭ ހުރަސްކޮށް ފަސް ބްރިޖް އަޅާނެކަމަށެވެ. އަދި ބްރިޖް ތަކުގެ ޑިޒައިން ލިބުމާއިކު އެ މަސައްކަތް ޓެންޑަރއަށް ހުޅުވާލާނެކަމަށްވެސް ނަވާޒް ވިދާޅުވިއެވެ.
ބްރިޖްތަކުގެ މަސައްކަތް ކުރުމަށް ނިންމާފައިވަނީ ސަޢުދީ ފަންޑުން ހަމަޖައްސާފައިވާ 80 މިލިއަން ޑޮލަރުގެ ލުއި ލޯނުއެހީންނެވެ. މި ލޯނު އެހީގެ ބޮޑުބައެއް ޚަރަދު ކުރުމަށް ނިންމާފައި ވަނީ މި ބްރިޖްތަކުގެ މަސައްކަތަށެވެ. ހުޅުމާލޭގެ ދެވަނަ ފިޔަވަހީގެ މަސައްކަތްތަށް ހަލުވިކަމާއިކު ކުރިޔަށްދާއިރު މިހާރު އެންމެ ބާރަށް ކުރިޔަށްދާ މަސައްކަތަކީ މަގުތަކުގައި ތާރައެޅުމުގެ މަސައްކަތެވެ. މީގެ އިތުރުން ހަތްހާސް ހައުސިން ޔުނިޓާއި 25 ބުރިޔަށް ޢިމާރާތްކުރާ އޮފީސް ކޮންޕްލެކްސްގެ މަސައްކަތްވެސް ދަނީ ހިނގަމުންނެވެ. ހުޅުމާލޭގެ ދެވަނަ ފިޔަވަހި ސަރުކާރުން ތަރައްޤީ ކުރަނީ ޒުވާނުންގެ ސަހަރެއްގެ ގޮތުގައެވެ.