ޗައިނާ މޯލްޑިވްސް ފްރެންޑްޝިޕް ބްރިޖްގެ މައި ތަނބުތަކުގެ ކޮންކްރީޓް މަސައްކަތް ކުރިއަށް އޮތް 10 ދުވަހުގެ ތެރޭގައި އެއްކޮށް ނިންމާލެވޭނެކަމަށް މިނިސްޓަރ އޮފް ހައުސިންގ އެންޑް އިންފްރާސްޓްރަކްޗަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މިނިސްޓަރ މިހެން ވިދާޅުވެފައިވަނީ ބްރިޖްގެ މަޝްރޫޢާއި ގުޅޭގޮތުން ކުރެއްވި ޓުވީޓެއްގައެވެ.
ބްރިޖުގެ ތަނބުތަކުގެ މަސައްކަތް ނިމުމުން ބީމެއްގެ އެހީގައި އެއްތަނބު އަނެއްތަނބާ ގުޅާލެވޭނެއެވެ. އެއަށްފަހު ޗައިނާގައި މިހާރު ތައްޔާރުކުރަމުންދާ، ބްރިޖްގެ ސްޕަރ ސްޓްރަކްޗަރ ނުވަތަ ޑެކްގެ ބައިތައް ބީމްތަކުގެ މަތީގައި އަތުރާލެވޭނެއެވެ.
ބްރިޖްގެ ހުރިހާ މަސައްކަތެއްވެސް ކުރިއަށްދަނީ ކަނޑައަޅާފައިވާ ޝެޑިއުލާއެއްގޮތައްކަން ހައުސިންގ މިނިސްޓްރީން ފާހަގަކުރެއެވެ. އެގޮތުން ބްރިޖްގެ ޑެކް ނުވަތަ ސްޕަރ ސްޓްރަކްޗަރ އެތުރުމަށް އެއްތަނބު އަނެއްތަނބާ ދެމެދު އަޅާ ބީމްތައް އެތުރުމުގެ މަސައްކަތް މިހާރު ދަނީ ކުރަމުންނެވެ.
ބްރިޖުގެ މައި ޕްލެޓްފޯމުގައި މައި 5 ތަނބު ހިމެނޭއިރު، ކަނޑަށް ޖަހާފައިވާ މި މައި ތަނބުތަކުގައި މިހާރު ކުރިޔަށް ދަނީ ވީއަކުރުގެ ސިފަޔަށް ހުންނަ ކެޕްތަކުގެ މަސައްކަތްކަން ފާހަގަކޮށްލެވެއެވެ.
ބްރިޖްގެ މާލެއާވީކޮޅުން އެޕްރޯޗް ބްރިޖުން މި މަސައްކަތް ފަށާފައިވާއިރު، ބްރިޖްގައި ޖުމްލަ 240 އައިބީމް އަޅާނެއެވެ. އެޕްރޯޗް ބުރިޖްގެ ތަނބުތަކުގެ މަސައްކަތުގެ ބޮޑުބައިވެސް ނިމިފައިވާއިރު، މެއިން ބްރިޖަށް ބޭނުންވާ މައި ތަނބުތަކުގެ މަސައްކަތްވެސް މިހާރު މިވަނީ ނިމުމަކާއި ހިސާބަށް ގޮސްފައެވެ.
ބްރިޖާއި ގުޅުންހުރި މަސައްކަތްތައް މާލެ، ހުޅުލެ އަދި ހުޅުމާލޭގައި ހަދާފައިވާ ސައިޓުތަކުގައި ހަލުވިކަމާއެކު ކުރިއަށްދާއިރު، ޗައިނާގައި ތައްޔާރު ކުރަމުންދާ ސްޕަރ ސްޓަރަކްޗާރގެ ބައިތަކުގެ މަސައްކަތް ކުރިއަށްދާގޮތް ބައްލަވާލެއްވުމަށް ހައުސިންގ މިނިސްޓަރ ދާދިފަހުން ވަނީ ޗައިނާއަށް ދަތުރުކުރައްވާފައެވެ. ޗައިނާގައި ތައްޔާރުކުރާ ބްރިޖާގުޅުން ހުރި ބައިތައް، މިއަހަރުގެ ފަހުކޮޅު ރާއްޖެ ގެނެއުމަށް ހަމަޖެހިފައިވާކަމަށް ހައުންސިންގ މިނިސްޓްރީން ބުނެއެވެ.
ޗައިނާގެ ސީ.ސީ.ސީ.ސީ ސެކަންޑް ހާބަރ އިންޖިނިއަރިންގއާއި ހަވާލުކޮށްގެން ރާއްޖޭގައި ކުރެވޭ އިންޖިނިއަރިންގެ އެންމެ ބޮޑު މި މަސައްކަތުގައި އެކުންފުނީގެ 1000 ވުރެ ގިނަ މަސައްކަތްތެރިން ދަނީ ހަރަކާތްތެރިވަމުންނެވެ. ސަރުކާރުގެ އަމާޒަކީ ބްރިޖްގެ މަސައްކަތް 26 ޖުލައި 2018 ގެ ނިޔަލަށް އެއްކޮށް ނިންމާ، އާއްމުންނަށް ބޭނުންކުރަން ހުޅުވާލުމެވެ.