މާލެސިޓީގެ މަގުތައް ރަނގަޅު ފެންވަރަކަށް ތަރައްޤީކުރުމުގެ މަޝްރޫޢުގެ ޢަމަލީ މަސައްކަތް ހައުސިންގ މިނިސްޓްރީން ފަށާފައިވަނީ މިދިޔަ އަހަރުގެ އޯގަސްޓްމަހުގެ ތެރޭގައެވެ. މިއީ މާލޭގެ މަގުތަކަކީ ބޭނުންކުރަން ފަސޭހަ، ރައްކާތެރި މަގުތަކަކަށް ހެދުމަށްޓަކައި، ޚާއްޞަ ޓައިމްލައިނެއް ކަނޑައަޅައިގެން، ސީދާ މިނިސްޓްރީގެ ބެލުމުގެ ދަށުން ކުރިއަށްގެންދާ މަޝްރޫޢެކެވެ. މި މަޝްރޫޢުގެ ދަށުން މާލޭ 13 މަގެއް މަރާމާތުކުރުމަށް ނިންމާފައިވާއިރު، އެންމެ ފުރަތަމަ މަސައްކަތް ފަށާފައިވަނީ މަޖީދީމަގުގެއެވެ.
މަޖީދީމަގުގެ މަސައްކަތް މިނިސްޓްރީން ކުރިއަށްގެންދަނީ 9 ސެގްމަންޓަކަށް ބަހާލައިގެނެވެ. އެގޮތުން މިހާރު ކުރިއަށްދަނީ 8 ވަނަ ސެގްމަންޓްގެ މަސައްކަތެވެ. މި މަސައްކަތް ކުރުމަށްޓަކާ، މަޖީދީމަގާއި ސޯސަންމަގު ގުޅޭ ކަންމަތިން ފެށިގެން ޖަނަވަރީމަގާއި މަޖިދީމަގު ގުޅޭ ކަންމައްޗާހަމައަށް ވަނީ ބައްދުކޮށްފައެވެ. މަޖީދީމަގުގެ މަސައްކަތްތައް ކުރިއަށްދާގޮތާއި ގުޅޭގޮތުން މަޢުލޫމާތުދެއްވަމުން ހައުސިންގ މިނިސްޓްރީގެ ސީނިއަރ އެޑްމިނިސްޓްރޭޓިވް އޮފިސަރ އިސްމާޢީލް ޝަފީޤު ވިދާޅުވީ، ސެގްމަންޓް 8 ގެދަށުން މަގުގެ ފަސްގަނޑު އެއްވަރުކުރުމާއި، ޕޭވްމަންޓާއި ކާނުތައް ހަރުކުރުމުގެ މަސައްކަތް ނިމިފައިވާކަމަށެވެ. އަދި ގައު އެތުރުމުގެ މަސައްކަތް މިހާރު ކުރަމުންދާ ކަމަށާއި، ކުރިއަށް އޮތް ހަފްތާއެއްގެ ތެރޭގައި، އެ މަސައްކަތް މުޅިން ނިންމައި، އާއްމުންނަށް ބޭނުންކުރުމަށް އެ ސަރަޙައްދު ހުޅުވާލާނެކަމަށް އޭނާ ވިދާޅުވިއެވެ.
މަޖީދީމަގު މަރާމާތުކުރުމުގެ މަޝްރޫޢުގެ ދަށުން ޑްރެއިނޭޖް ސިސްޓަމްތައް ހަރުކޮށް، މިހާރު ހުރި ކާނުތަކުގެ ސައިޒް ދެގުނައަށް ވަނީ ބޮޑުކޮށްފައެވެ. މީގެއިތުރުން ދުވާރާއި، މަގުތަކުގައި އަތުރާފައިވާ ގާތައް އާކޮށް، ޚާއްޞަ އެހީއަށް ބޭނުންވާ ފަރާތްތަކަށް ފަސޭހައިން ބޭނުންކުރެވޭގޮތަށް ދުވާރުތައް ވަނީ ބަދަލުކޮށްފައެވެ. ހައުސިންގ މިނިސްޓްރީގެ އަމާޒަކީ މިއަހަރުގެ ނޮވެމްބަރު މަހުގެ ނިޔަލަށް މުޅި މަޖީދީމަގުގެ މަސައްކަތް އެއްކޮށް ނިންމާލުމެވެ.