ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމަށް ސަރުކާރުން ހިންގަވާ 1 ބިލިއަން ޑޮލަރުގެ ބިޔަ މަޝްރޫޢާއެކު، މުޅި އެއަރޕޯޓް މިވަނީ އިންގިލާބީ ބަދަލަކާއި ދިމާލަށް މިސްރާބު ޖަހާފައެވެ.
މި މަޝްރޫޢުގެ ތެރެއިން މިވަގުތު އެންމެ ބޮޑު އިސްކަމެއްދީގެން ކުރިއަށްދާ އެއް މަސައްކަތަކީ އައު ރަންވޭގެ މަސައްކަތެވެ. 3400 މީޓަރު ދިގު އަދި 65 މީޓަރު ފުޅާ މި ރަންވޭގެ ސަބް-ބޭސް އެޅުމުގެ މަސައްކަތް ހަލުވިކަމާއެކު މިހާރު އަންނަނީ ކުރަމުންނެވެ.
ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމަށް ސަރުކާރުން ކުރިއަށްގެންދާ ބިޔަ މަޝްރޫޢުގެ ދަށުން އެއަރޕޯޓަށް ގާތްގަނޑަކަށް 77 ހެކްޓަރުގެ ބިން އިތުރުކޮށްފައިވާއިރު، މިވަގުތު އެންމެ ހަލުވިމިނުގައި ކުރިއަށްދަނީ އައު ރަންވޭގެ މަސައްކަތެވެ. އެގޮތުން އައު ރަންވޭއަށް ބޭނުންވާ ސަބް-ބޭސް އެޅުމުގެ މަސައްކަތް ފަށާފައިވަނީ މިދިޔަ ޖޫންމަހުގެ ތެރޭގައެވެ. ސަބް-ބޭހަކީ ބޮޑެތި ހައިވޭތަކާއި، ރަންވޭ ފަދަ ތަންތަނުގައި ތާރުއެޅުމުގެ ކުރިން، ވެއްޔާއި، ހިލަ އަދި ހިލަވެލި ބޭނުންކޮށްގެން އަޅާ ކޮންކްރީޓް ބޯ ފަށަލަތަކެކެވެ.
img:http://s3.psmnews.mv/images/660x400/15077267009527.jpg|އެއަރޕޯޓް ރަންވޭގެ ސަބް-ބޭސްގެ މަސައްކަތް ކުރިއަށްދަނީ- ފޮޓޯ: ޕީއެސްއެމް
ރަންވޭގެ މަސައްކަތްތަކާއި ގުޅޭގޮތުން މަޢުލޫމާތު ދެއްވަމުން އެމް.އޭ.ސީ.އެލްގެ މެނޭޖިންގ ޑިރެކްޓަރ ޢާދިލް މޫސާ ވިދާޅުވީ، ރަންވޭގެ ސަބް-ބޭހުގެ ފުރަތަމަ ފަށަލަ އެޅުމުގެ މަސައްކަތް ކަނޑައެޅިފައިވާ ޝެޑިއުލާއި އެއްގޮތަށް ކުރިއަށްދާކަމަށެވެ. އެގޮތުން ހުޅުލޭގެ އުތުރު ފަރާތުން ފެށިގެން 1000 މީޓަރަށް ވުރެ ބޮޑު ބައެއްގައި ފުރަތަމަ ފަށަލަ މިހާރު އަޅާ ނިންމާފައިވާކަމަށް އާދިލް ވިދާޅުވިއެވެ.
"މިކަން ކުރިއަށް ގެންދިއުމުގައި އެއްވެސް ހުރަހެއްނެތް. މިހާރު ރާވާފައިވާގޮތަށް ކޮންމެ ދުވަހަކުވެސް މަސައްކަތް ކުރިއަށް އެބަދޭ. އުއްމީދަކީ ޝެޑިއުލާއި އެއްގޮތަށް މި އަންނަ އަހަރުގެ ނިޔަލަށް ރަންވޭގެ މަސައްކަތް ނިންމާލުން. މި މަސައްކަތް ކުރާއިރު، މިހާރު އުތުރު ފަރާތުން ފެށިގެން 1000 މީޓަރަށްވުރެ ބޮޑުބައެއްގައި ފުރަތަމަ ލޭޔަރ މީނީ އެޅިފައި. ކުރިއަށް އޮތް ކުޑަދުވަސްކޮޅެއްގެ ތެރޭގައި ފުރަތަމަ ލޭޔަރގެ މަސައްކަތް އެއްކޮށް ނިމި، ދެވަނަ ލޭޔަރގެ މަސައްކަތް ފެށިގެންދާނެ" އާދިލް ވިދާޅުވިއެވެ.
އައު ރަންވޭގެ މަސައްކަތް ކުރަމުންދަނީ ޗައިނާގެ ބެއިޖިންގ އަރބަން ކޮންސްޓްރަކްޝަން ގްރޫޕް، ބީ.ޔޫ.ސީ.ޖީއާއި ހަވާލުކޮށްގެންނެވެ. ރަންވޭގެ މަސައްކަތް 24 ގަޑިއިރު ހުއްޓުމެއްނެތި ކުރިއަށްދާއިރު، މަސައްކަތުގެ ކޮލެޓީ ބެލެމަށް އެމް.އޭ.ސީ.އެލްގެ އިތުރުން ސިންގަރޕޫރުގެ ފަންނީ ބޭފުޅުންގެ ޓީމެއް އަންނަނީ ހަރަކާތްތެރިވަމުންނެވެ.
"ރަންވޭގެ ކޮލެޓީއަށް ބަލާއިރު، ބައިނަލް އަޤްވާމީ މިންގަނޑުތަކާއި އެއްގޮތަށް ރަންވޭގެ މަސައްކަތްތައް ކުރިއަށް މިގެންދަނީ. ސިންގަރޕޫރުގެ ވަރަށް ޓެކްނިކަލް ޓީމެއް މި މަސައްކަތް މޮނިޓަރކުރުމުގައި އަޅުގަނޑުމެންނާއެކު ހަރަކާތްތެރިވޭ. އެބޭފުޅުން ސައިޓުގައި މަސައްކަތްކުރާތާ ވަރަށް ގިނަ ދުވަސް ވެއްޖެ. އެބޭފުޅުން ވަރަށް ރަނގަޅަށް މިކަން ބައްލަވާ، އަދި ސުޕަރވައިޒްކުރައްވާ. މިކަން މިދަނީ އެންމެ ފުރިހަމައަށް ބެލިގެން، އަދި ސިވިލް އޭވިއޭޝަންއާއިވެސް ކޯރޑިނޭޓް ކުރެވިގެން" އާދިލް ވިދާޅުވިއެވެ.
img:http://s3.psmnews.mv/images/660x400/15077267144010.jpg|އެއަރޕޯޓް ރަންވޭގެ ސަބް-ބޭސްގެ މަސައްކަތް ކުރިއަށްދަނީ- ފޮޓޯ: ޕީއެސްއެމް
އާދިލް ވިދާޅުވީ، އައު ރަންވޭގެ މަސައްކަތް ބާރު ދުވެލީގައި ކުރިއަށްދާއިރު، މިހާރު އެއަރޕޯޓުގައި ބޭނުންކުރާ ރަންވޭ ޓެކްސީ-ވޭ އަކަށް ބަދަލުކުރުމަށްޓަކާއި ވާންޖެހޭ ތައްޔާރީތައްވެސް މިހާރު ކުރިއަށްދާކަމަށެވެ.
"2 ރަންވޭއެއް ގުޅުވާ ވާހަކަ މިދައްކަނީ. އެކަމަށް ބޭނުންވާ ކަންތައްތައްވެސް ކުރަމުން މިދަނީ. ގްރައުންޑް އިމްޕޫރްވްމަންޓާއި، މިކަންތައްތައް އެބަކުރިއަށްދޭ. މިހާރު ހުރި ރަންވޭއާއި، އައު ރަންވޭއާއި ގުޅުވާލަން ބާލާއިރު، މިކަން ކުރުމުގައި ޗެލެންޖްތަކެއް އެބަހުރި. އެއަރޕޯޓް އޮޕަރޭޓްކުރާ ވަގުތު މި މަސައްކަތް ކުރުމަކީ ދަތިކަމެއް. ދެން ރަންވޭ ގުޅުވާލުމުގެ މަސައްކަތް ކުރަން މިޖެހެނީ ދަންވަރު ލިބޭ ކުޑަ ވަގުތުކޮޅުގެ ތެރޭގައި" އާދިލް ވިދާޅުވިއެވެ.
ދުނިޔޭގައި ބޭނުންކުރާ އެންމެ ބޮޑެތި މަތިންދާބޯޓްކަމަށްވާ އޭ ތްރީ އެއިޓީގެ ބޯޓްފަހަރަށްވެސް ފަސޭހަކަމާއެކު ބޭނުން ކުރެވޭނެހެން ފަރުމާކޮށްގެން ހަދާ މި ރަންވޭއާއެކު، އެއަރޕޯޓަށް މިހާރު ދިމާވެފައިވާ ޖާގައިގެ މައްސަލައަށް ބޮޑު ހައްލެއް ލިބިގެންދާނެކަމަށް އެމް.އޭ.ސީ.އެލުން ބުނެއެވެ.