އިދިކޮޅު ސިޔާސީ ޙަރަކާތްތަކުގައި ބައިވެރިވަނީ މަދުޢަދަދެއްގެ ބައެއްކަމަށް ވިދާޅުވެ، އިދިކޮޅު ޙަރަކާތްތަކުގައި އިސްކޮށް އުޅުއްވާ ކުރީގެ ރައީސް މައުމޫން ޢަބްދުލްޤައްޔޫމް ވާހަކަފުޅުދައްކަވައިފިއެވެ.
މައުމޫން މިހެން ވިދާޅުވީ، މ.ކުނޫޒްގައި ރޭ އިދިކޮޅު ސިޔާސީ ޕާޓިތަކުން ބޭއްވި ޖަލްސާގައި ވާހަކަފުޅުދައްކަވަމުންނެވެ.
މައުމޫން ވިދާޅުވީ، އިދިކޮޅު ސިޔާސީ ޕާޓީތަކުގެ ލީޑަރުން ފިޔަވައި މާ ގިނަ ބަޔަކު ސިޔާސީ ހަރަކާތްތަކުގައި ބައިވެރިނުވާކަމަށެވެ. ރައްޔިތުންގެ މަޖިލީހުގެ މެންބަރުން ކަމުގައިވިޔަސް، އަދި އެނޫންވެސް މަޤާމަކަށް މީހަކު އިންތިޚާބު ކުރުމަށްފަހު، ގެއަށްގޮސް ނިދާފައި ތިބެގެން ނުވާނެކަމަށް މައުމޫން ވިދާޅުވިއެވެ.
ރައީސް މައުމޫން މިހެން ވިދާޅުވެފައިވާއިރު، ސަރުކާރަށް ތާޢީދު ކުރާ ފަރާތްތަކުން ބުނަމުން އަންނަނީ އިދިކޮޅު ސިޔާސީ ފަރާތްތަކުން ގޮވާލާ ގޮވާލުމަށް ރައްޔިތުން އިޖާބަ ނުދޭކަމަށެވެ. އަދި ރައްޔިތުން ތިބީ ރައީސް ޔާމީނާއި އެމަނިކުފާނު ގެންނަވާ ތަރައްޤީގެ ފަހަތުގައިކަމަށް ސަރުކާރަށް ތާޢީދުކުރާ ފަރާތްތަކުން ގެންދަނީ ތަކުރާރުކޮށް ބުނަމުންނެވެ.