މިނިސްޓަރ އޮފް ފޮރިން އެފެއަރޒް ޑރ. މުޙައްމަދު އާސިމް އިންޑޮނޭޝިޔާގެ މިނިސްޓަރ އޮފް މެރިޓައިމް އެފެއާޒް އެންޑް ފިޝަރީޒް، ސުސީ ޕުދިއާސުޓީ އާ މިއަދު ބައްދަލުކުރައްވައިފިއެވެ.
މި ބައްދަލުވުމުގައި ފިޝަރީޒްގެ ދާއިރާއިން ދެޤައުމުގެ ގުޅިގެން މަސައްކަތް ކުރުމާއިމެދު ފުޅާ ދާއިރާއެއްގައި މަޝްވަރާކުރައްވާފައިވެއެވެ.
މި ބައްދަލުވުމަށްފަހު، އިންޑޮނޭޝިއާގެ ކަނޑުގެ ސަރަޙައްދުގައި ޤަވާއިދާ ޚިލާފަށް ކުރަމުންދާ މަސްވެރިކަން ހުއްޓުވުމަށްޓަކައި ޤާއިމް ކުރެވިފައިވާ އޮންލައިން ވެސަލް މޮނިޓަރިންގް ސިސްޓަމްގެ ޓުއާރއެއް އެމިނިސްޓްރީއިން ދެއްވާފައިވެއެވެ.
ފޮރިން މިނިސްޓަރ ޑރ. މުހައްމަދު އާސިމް އިންޑޮނޭޝިއާއަށް މިހާރު ކުރައްވަމުންގެންދަވާ ރަސްމީ ދަތުރުފުޅުގައި އިންޑޮނޭޝިޔާގެ ފޮރިން މިނިސްޓަރ ރެޓްނޯ މަރސުދީއާއި ވަނީ އިއްޔެ ބައްދަލުކުރައްވާފައެވެ.
މި ބައްދަލުވުމުގައި ދެޤައުމުގެ ދެމެދުގައި އޮތް އެކުވެރިގުޅުން އިތުރަށް ބަދަހިކުރުމަށް ކުރެވިދާނެ ކަންތައްތަކާ ގުޅޭގޮތުންވަނީ މަޝްވަރާކުރައްވާފައެވެ. އެގޮތުން، އިންސާނީ ވަސީލަތް ތަރައްޤީކުރުމާއި، ތަޢުލީމާއި، މަސްވެރިކަމާއި އަދި ދެޤައުމުގެ ދެމެދުގައިވާ ވިޔަފާރީގެ ގުޅުންތައް އިތުރަށް ޙަރުދަނާ ކުރުމާމެދު މަޝްވަރާތައްކުރައްވާފައިވެއެވެ.
މީގެއިތުރުން ބައިނަލްއަޤްވާމީ މަޝްރަހުގައި، ޚާއްސަކޮށް އދ ގެ ތެރެއިން ދެޤައުމު އެކުގައި މަސަތްކަތްކުރުމާއި ގުޅޭގޮތުންވެސް ވަނީ މަޝްވަރާކުރައްވާފައެވެ.
މި ބައްދަލުވުމުގައި މިނިސްޓްރީ އޮފް ފޮރިން އެފެއާޒް ގެ ސެކްރެޓަރީ ބައިލެޓްރަލް އަހުމަދު ޙަލީލް އަދި އެސިސްޓެންޓް ޑިރެކްޓަރ އަލްފާޟިލް އަހުމަދު ސުޒިލް ބައިވެރިވެވަޑައިގެންނެވިއެވެ.