ރާއްޖޭގައި ދުންފަތް ބޭނުންކުރާ މީހުންގެ ނިސްބަތް މަދުވަމުން އަންނަކަމަށް ހެލްތް ޕްރޮޓެކްޝަން އެޖެންސީ ވިދާޅުވެއްޖެއެވެ.
ދުނިޔޭގެ ދުންފަތު އިސްތިއުމާލު ނުކުރާ ދުވާހައި ގުޅިގެން ޕީއެސްއެމްގެ ރާއްޖެ މިއަދުގައި ވާހަކަދައްކަވަމުން ހެލްތު ޕްރޮޓެކްޝަން އެޖެންސީ، އެޗްޕީއޭގެ ޑެޕިއުޓީ ޑިރެކްޓަރ ޙަސަން މުޙައްމަދު ވިދާޅުވީ، ރާއްޖޭގައި ދުންފަތް ބޭނުންކުރާ މީހުންގެ ނިސްބަތް އިތުރުވަމުން ނުދާ ކަމަށެވެ. އަދި ދުންފަތް ބޭނުންކުރުން ހުއްޓަލާ ޒުވާނުންގެ ނިސްބަތްވެސް އެއްދުވަހުން އަނެއް ދުވަހަށް އިތުރުވަމުން އަންނަކަންވެސް ހަސަން ފާހަގަކުރެއްވިއެވެ. ދުންފަތު ސަލަމާތްވެފައިވާ ޖީލެއް އުފެދުމަށް ސަރުކާރުން ކުރައްވާ މަސައްކަތްތަކުގައި ރަށު ފެންވަރާއި ފަރުދީ ފެންވަރުގައި ހުރިހާ ފަރާތްތަކުން ބައިވެރިވެ ދުންފަތުން ރައްކާތެރިވުމަށް ހަދާފައިވާ ޤާނޫނުތަކާއި ޤަވައިދުތައް ތަންފީޒުކުރުމަށް މަސައްކަތް ކުރެއްވުމަށް ހަސަން ގޮވާލެއްވިއެވެ. img:http://s4.psmnews.mv/images/660x400/14647070246314.jpg|ދުންފަތުން ލިބޭ ގެއްލުންތައް ދައްކުވައިދޭ ތަސްވީރު ހިމެނޭ ފޮށިތަކެއް
މި ޕްރޮގްރާމްގައި ވާހަކަދައްކަވަމުން ދުންފަތް ކޮންޓްރޯލްބޯޑުގެ މެންބަރު އަދި އޭޑީގެ މެނޭޖިންގ ޑިރެކްޓަރ އަޙްމަދު އައްފާލް ވިދާޅުވީ ރާއްޖޭގައި ދުންފަތް ކޮންޓްރޯލް ކުރުމަށްޓަކައި ދުންފަތުން ސަލާމަތްވެފައިވާ ޖީލެއް ބިނާކުރުމުގެ މަސައްކަތް ފަށަންޖެހިފައިވާ ކަމަށެވެ.
ދުންފަތުގެ އިސްތިއުމާލް ނުކުރާ ނުވަތަ ސަލާމަތްވެފައިވާ ޖީލެއް ބިނާކުރުމުގެ މަސައްކަތް ދުނިޔޭގެ ބައެއް ޤައުމުތަކުގައި މިހާރު ފަށާފައިވާކަން ފާހަގަކުރައްވަމުން އައްފާލް ވިދާޅުވީ ރާއްޖޭގައިވެސް 2007 ވަނަ އަހަރުން ފެށިގެން އުފަންވެފައިވާ ކުދިންނަކީ ދުންފަތުން ސަލާމަތްވެފައިވާ ބަޔަކަށް ހެދިއްޖެނަމަ 2 އަހަރު ފަހުން ދުންފަތުން ސަލާމަތްވެފައިވާ ޖީލެއް ރާއްޖޭގައިވެސް އޮންނާނެ ކަމަށެވެ.
ދުންފަތުގެ ސަބަބުން ގައިންގަޔަށް ނާރާ ބަލި އެންމެ ގިނަ އެއް ޤައުމަކީ ރާއްޖެކަމަށް އެޗްޕީއޭއިން ވިދާޅުވެއެވެ. ރާއްޖޭގައި މީހުން މަރުވާ ނިސްބަތުގެ 81 އިންސައްތަ އަކީ ދުންފަތުގެ ޒަރީއާއިން ޖެހޭ ބަލިތަކުގައި މަރުވާ މީހުންކަމަށްވެސް އެޗްޕީއޭއިން ވިދާޅުވެއެވެ.