ޓެރަރިޒަމާއި ކައުންޓަރ ޓެރަރިޒަމްގެ ނުރައްކާތެރިކަން ފެތުރުން ހުއްޓުވޭނީ ދުނިޔޭގެ އެކި ކަންކޮޅުތަކުގައި ހިނގަމުންދާ ނުރައްކާތެރި ކުށްތަކުގެ މަޢުލޫމާތު އެއްޤައުމު އަނެއްޤައުމާއި ޙިއްޞާކުރެވިގެންކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، "ޢަރަބް އިސްލާމިކް އެމެރިކަން ސަމިޓް" ގައި ބައިވެރިވެ ވަޑައިގަތުމަށް ސައޫދީ އަރަބިޔާއަށް ވަޑައިގެން ކިންގް ޚާލިދު އިންޓަރނޭޝަން އެއަރޕޯޓްގައި ސަޢުދީގެ އިސް ބައެއް ފަރާތްތަކާއެކު ބޭއްވި ވާހަކަތަކުގައެވެ.
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ސަޢޫދީ އަރަބިޔާއަށް ކުރައްވާ ދަތުރުފުޅަކީ، ސަޢޫދީ ޢަރަބިއްޔާގެ ރިޔާޟުގައި ބޭއްވުމަށް ހަމަޖެހިފައިވާ "ޢަރަބް އިސްލާމިކް އެމެރިކަން ސަމިޓް" ގައި ބައިވެރިވެވަޑައިގެންނެވުމަށްޓަކައި، ސަޢޫދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒް އާލް ސަޢޫދުގެ ދަޢުވަތަކަށް، ކުރައްވާ ރަސްމީ ދަތުރުފުޅެކެވެ. ސަޢޫދީ ޢަރަބިއްޔާއަށް ވަޑައިގެން ކިންގް ޚާލިދު އިންޓަރނޭޝަނަލް އެއަރޕޯޓްގައި ހުންނަވާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، ޢަރަބް އިސްލާމިކް އެމެރިކަން ސަމިޓަކީ ސައުދީ ޢަރަބިއްޔާއަށާއި، ދުނިޔޭގެ އެހެނިހެން ޤައުމުތަކަށްވެސް ވަރަށް މުހިންމު ސަމިޓެއްކަމަށެވެ. އެގޮތުން ދިވެހިރާއްޖެފަދަ ކުޑަޤައުމަކަށް މި ސަމިޓުން ގިނަ ފައިދާތަކެއް ހާސިލްވާނެކަމަށް އުންމީދުކުރައްވާކަމުގައި ރައީސް ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ޓެރަރިޒަމާއި، ކައުންޓަރ ޓެރަރިޒަމާއި ދެކޮޅަށް މަސައްކަތްކުރެއްވުމަކީ މިއަދު އިސްލާމީ އުންމަތަށް ވަރަށް މުހިންމުކަމެއްކަން ފާހަގަކުރައްވާ އެމަނިކުފާނު ވިދާޅުވީ، ޓެރަރިޒަމަކީ އިމެއް ނެތްކަމެއް ކަމަށާއި، ދުނިޔޭގެ ޤައުމުތަކަށް ކުރިމަތިވެފައިވާ ޓެރަރިޒަމްގެ މައްސަލަތަކުން ރާއްޖެއަށްވެސް އަސަރުކުރާކަމަށެވެ.
ޓެރަރިޒަމާއި ކައުންޓަރ ޓެރަރިޒަމްގެ ނުރައްކާތެރިކަން ފެތުރުން ހުއްޓުވޭނީ ދުނިޔޭގެ އެކިކަންކޮޅުތަކުގައި ހިނގަމުންދާ ނުރައްކާތެރި ކުށްތަކުގެ މަޢުލޫމާތު އެއްޤައުމު އަނެއްޤައުމާއި ހިއްސާކުރެވިގެންކަމަށް ވިދާޅުވިއެވެ. އަދި ދިވެހިޜާއްޖެފަދަ ވަސީލަތްމަދު ޤައުމަކަށް މިއީ ވަރަށް މުހިންމުކަމެއްކަމަށް ރައީސް ވިދާޅުވިއެވެ.
ޓެރަރިޒަމްގެ ވާހަކަތަކަކީ އަބަދުވެސް ދުނިޔޭގެ އެކި ފަންތީގައި މަޝްވަރާކުރެވިފައިވާ ކަމެއްކަމަށާއި، ޢަރަބި އިސްލާމީ ޤައުމުތަކާއި ކުރިއަރާފައިވާ ޤައުމުތަކާއެކު ކުރެވޭ މިމަޝްވަރާތަކުން ރަނގަޅު ހަރުދަނާ ނިންމުންތަކެއް ނިންމާނެކަމަށް އުންމީދުކުރެވޭކަމަށް ރައީސުލްޖުމްހޫރިއްޔާ ވިދާޅުވިއެވެ.