އުރުދުންގައި މިހާރު ކުރިއަށްދާ، ޢަރަބި އިސްލާމީ ޤައުމުތަކުގެ ދީނީ އެއްބައިވަންތަކަމާއި ވަސިއްޔަތު ދެމެހެއްޓުމާބެހޭ ބައްދަލުވުމުގައި ދިވެހިރާއްޖެއިން ބައިވެރިވަމުން އެބަގެންދަވައެވެ. މިއީ ދީނީ ޢިލްމުވެރިން ތާޒާކުރެއްވުމަށްޓަކައި އުރުދުންގެ ޢަބްދުﷲ ރަސްގެފާނުގެ ބެއްލެވުމުގެ ދަށުން ކޮންމެ އަހަރަކުވެސް ބާއްވަމުން އަންނަ ބައްދަލުވުމެކެވެ.
ރިސާލަތު ޢައްމާންގެ 35 ވަނަ ބައްދަލުވުމުގައި، ރާއްޖެ ތަމްސީލްކުރައްވަނީ އިސްލާމިކް މިނިސްޓަރުގެ ނާއިބް އަދި އިސްލާމީ ފަތުވާދޭ އެންމެ މަތީ މަޖިލީހުގެ ނާއިބް ރައީސް އައްޝައިޚް އިބްރާހީމް އަޙްމަދާއި، އިސްލާމީ ފަތުވާދޭ އެންމެ މަތީ މަޖިލީހުގެ މެންބަރު އަލްއުސްތާޛު މޫސާ އަންވަރު ޙަސަންއެވެ.
އުރުދުންގެ ވެރިރަށް ޢައްމާންގައި، ކުރިއަށްދާ މިބައްދަލުވުމުގައި، އިސްލާމްދީނަކީ މެދުމިނުގެ ދީނެއްކަން މީސްތަކުންނަށް ބަޔާންކޮށްދިނުމާއި، އިސްލާމްދީނަކީ ހައްދުފަހަނައަޅައި ދިއުމާއި ޓެރަރިޒަމާ ބީރަށްޓެހި ދީނެއްކަން މީސްތަކުންނަށް ބަޔާންކޮށްދިނުމާ ގުޅޭގޮތުން ޢިލްމުވެރިންނަށް މަޢުލޫމާތުދެއްވިކަމަށް މިނިސްޓްރީން ވިދާޅުވެއެވެ.
މިއަހަރުގެ މަހާސިންތާގެ ލަނޑުދަނިޑއެއްގެ ގޮތުގައި ކަނޑައަޅާފައިވަނީ ޓެރަރިޒަމާއި ކާފަރުކުރުން ނުވަތަ ޝަރުޢީ ޙުއްޖަތެއް ނެތި މީހުންނާއި ދިމާލަށް ކާފަރެކޭ ބުނުން ހުއްޓުވުމާއި އިސްލާމްދީނުގެ ރިވެތި އުޞޫލުތައް ފެތުރުމެވެ. ދުނިޔޭގެ އިސްލާމީ ޤައުމުތަކާއި ފަތުވާދޭ ޢިލްމުވެރިންނަށް އަމާޒުކޮށްގެން ބާއްވަވާ މިބައްދަލުވުމުގައި 14 ޤައުމަކުން 35 ދީނީ ޢިލްމުވެރިން ބައިވެރިވެވަޑައިގަންނަވައެވެ. މިއަދު ފެށި މިބައްދަލުވުން މިމަހުގެ 26ގެ ނިޔަލަށް ކުރިޔަށް ގެންދާނެއެވެ.