މާލެ އޯޓިޒަމް ސެންޓަރުގެ ކުދިން ޓީވީއެމަށް ޒިޔާރަތްކޮށްފި

މާލެ އޯޓިޒަމް ސެންޓަރަކީ އޯޓިޒަމް ހުންނަ ކުދިންނަށް ޚާއްޞަ އިންތިޒާމްތަކެއްގެ ދަށުން އުނގަންނައިދީ، އެ ކުދިންގެ ކިބައިގައި ހުންނަ ހުނަރު ތަރައްޤީކުރުމަށް މަސައްކަތްކުރާ މަރުކަޒެކެވެ. 

އެމަރުކަޒުގެ ދަރިވަރުން މިއަދު ޓީވީއެމަށް  ގެނެސް ޓީވީއެމްގެ މަސައްކަތްތައް ހިނގާގޮތް ބަލައި ތަޖުރިބާކުރުމުގެ ފުރުޞަތު މާލެ އޯޓިޒަމް ސެންޓަރުގެ ކުދިންނަށް ދިނެވެ. ތަނުގެ މަސައްކަތް ތަޖުރިބާކޮށްލަން ފަހިކޮށްދިން މިފުރުޞަތުގައި، އެސެންޓަރުގެ ސާޅީސް ކުދިން ޓީވީއެމަށް ޒިޔާރަތްކުރިއެވެ. ދެދަންފަޅިއަށް ބަހާލައިގެން އޯޓިޒަމް ކުދިންނަށް ދިން މިފުރުޞަތުގައި ޓީވީއެމްގެ ޚަބަރާއި، ޕްރޮގްރާމްގެ ޕްރޮޑަކްޝަން މަސައްކަތްތައް ކުރިޔަށްދާ ގޮތް ދައްކާލައި ކަންކަން ހިނގާގޮތް ކިޔައިދިނެވެ. އަދި ޚަބަރުކިޔުމާއި ޕްރޮގްރާމް ޕްރެޒެންޓްކުރުން ތަޖުރިބާކުރުމުގެ ފުރުޞަތުވެސް ދިނެވެ. 

img:http://s4.psmnews.mv/images/660x400/14860520768073.jpg|އޯޓިޒަމް ހުންނަ ކުދިން މިއަދު ޓީވީއެމްއަށް ކުރި ޒިޔާރަތުގެ ތެރެއިން - ފޮޓޯ: ޕީއެސްއެމް

ހަމަ އެހެންމެ ރޭޑިއޯ ޚަބަރުކިޔުމާއި، ޓީވީއާއި ރޭޑިއޯ އޮންއެއަރ އޮޕަރޭޓްކުރާ ގޮތްވެސް އެކުދިންނަށް ދައްކާލިއެވެ. ލިބުނު މިފުރުޞަތުގައި ބައެއް ކުދިން އެކުދިންގެ ހުނަރު ދައްކާލިއެވެ. ބައެއް ކުދިން ލަވަ ހުށަހަޅައިދިން އިރު، އަނެއްބައި ކުދިން ލަވައާއި ޚަބަރު ހުށަހަޅައިދިނެވެ. އެކުދިންގެ ހުނަރުވެރިކަން މިއިން ފާހަގަކުރެވުނެވެ.

img:http://s3.psmnews.mv/images/660x400/14860520607046.jpg|އޯޓިޒަމް ހުންނަ ކުދިން މިއަދު ޓީވީއެމްއަށް ކުރި ޒިޔާރަތުގެ ތެރެއިން - ފޮޓޯ: ޕީއެސްއެމް

މާލެ އޯޓިޒަމް ސެންޓަރގެ މެނޭޖިންގ ޑިރެކްޓަރ އިފްހާމް ޙުސައިން ވިދާޅުވީ، އޯޓިޒަމް ހުންނަ ކުދިންނަށް މުޖުތަމަޢުގައި ހުރި ފުރުޞަތު އަދިވެސް މަދުކަމަށެވެ. 

އުފެދުމުގައިވެސް މިކުދިންނަކީ އިޖްތިމާޢީ ގުޅުމުގެ ސިފަތައް ކުޑަ ކުދިންކަމަށް ވުމާއެކު، މުޖުތަމަޢުގައި ހުރި ފުރުޞަތުގެ ބޭނުން ހިފަން ދަތިކަން އިފްހާމްގެ ވާހަކަފުޅުގައި ފާހަގަކުރެއްވިއެވެ. އެހެންކަމުން، މިފަދަ ފުރުޞަތުތައް ފަހިކޮށްދިނުމުގެ ގޮތުން، މިއަހަރުގެ ތެރޭގައި އެކުދިންނަށް ފީލްޑް ޓްރިޕްތަކާއި އެހެނިހެން ޕްރޮގްރާމްތައް ރާވަމުންދާކަމަށް އިފްހާމް ވިދާޅުވިއެވެ. އަދި އެސެންޓަރުގެ މިމަސައްކަތަށް އެންމެ ފުރަތަމަ ޕީއެސްއެމުން މަރްޙަބާކިޔުމުން އެކަމާ ވަރަށް އުފާކުރައްވާކަމަވެސް  އިފްހާމް ވިދާޅުވިއެވެ. 

img:http://s1.psmnews.mv/images/660x400/14860520380000.jpg|އޯޓިޒަމް ހުންނަ ކުދިން މިއަދު ޓީވީއެމްއަށް ކުރި ޒިޔާރަތުގެ ތެރެއިން - ފޮޓޯ: ޕީއެސްއެމް

"އެންމެ ފުރަތަމަވެސް ޕީއެސްއެމްގެ މެނޭޖްމެންޓަށާއި މުވައްޒަފުންނަށް ވަރަށް ޚާއްޞަ ޝުކުރެއް ދަންނަވަން. އަޞްލު ޙަޤީގަތުގައި އޯޓިޒަމް ކުދިންނަކީ ވަރަށް ހުނަރުވެރި ކުދިންތަކެއް. ބޭނުންވަނީ މި ހުނަރު ތަރައްޤީ ކުރާނޭ ޕްލެޓްފޯމެއް. އަޅުގަނޑުމެން މިދަނީ އެކުދިންނަށް މިކަމުގައި އެހީތެރިވުމަށް މަސައްކަތްކުރަމުން. މިއަދު ޓީވީއެމަށް އައި ކުދިންތަކުގެ ތެރޭގައިވެސް ވަރަށް ކެމެރާއަށް ދޯޅު، ޚަބަރުކިޔަން ބޭނުންވާ އަދި ލަވައާއި، ވާހަކަ ކިޔަންވެސް އެހާ މޮޅު ކުދިން އެބަތިބި. ޓީވީއެމް ކަހަލަ ތަނަކުން މިކުދިންނަށް މިކަހަލަ ފުރުޞަތެއް ދިނީތީއާއި މިކުދިން ބަލައިގަތީތީވެ އަދިވެސް އެއްފަހަރު، ޕީއެސްމްގެ ހުރިހައި ބޭފުޅުންނަށް ޝުކުރު ދަންނަވަން.،" މާލެ އޯޓިޒަމް ސެންޓަރުގެ މެނޭޖިންގް ޑިރެކްޓަރ ވިދާޅުވިއެވެ.

މިއަދުގެ ޒިޔާރަތުގައި މާލެ އޯޓިޒަމް ސެންޓަރުގެ ކުދިންނާއެކު އެކުދިންގެ ޓީޗަރުންވެސް ބައިވެރިވިއެވެ. ޓީޗަރުންވެސް ތިބީ ޕީއެސްމެގެ މުވައްޒަފުން ކުދިންނާއި މެދު ބެހެއްޓި ގާތްކަމުން ވަރަށް ހިތްހަމަޖެހިފައެވެ. 

އޯޓިޒަމް ސެންޓަރުގެ ކުދިންނާއެކު މިއަދު ވަގުތުކޮޅެއް ހޭދަކޮށްލަން ލިބުމުން ޓީވީއެމް މުވައްޒަފުން ތިބީ އުފަލުންނެވެ. ބައެއް މުވައްޒަފުން ބުނީ، އޯޓިޒަމް ކުދިންނާ ދިމާވެ، އެކުދިންނާއެކު ވަގުތުކޮޅެއް ހޭދަކޮށްލަން ލިބުން އެއީ އާ ތަޖުރިބާއެއް ކަމަށާއި، މިކަމުން ހިތްހަމަޖެހުން ލިބުނުކަމަށެވެ.