ހުޅުމާލޭގެ ޖެޓީ ސަރަޙައްދު ތަރައްޤީ ކުރުމުގެ މަސައްކަތް ނިމެނީ

ހުޅުމާލޭގެ ޖެޓީ ސަރަޙައްދު ތަރައްޤީ ކުރުމުގެ މަސައްކަތް ކުރިއަށް އޮތް ދެ މަހުގެ ތެރޭގައި އެއްކޮށް ނިންމާލެވޭނެ ކަމަށް ހައުސިންގ ޑިވެލޮޕްމަންޓް ކޯޕަރޭޝަން، އެޗް.ޑީ.ސީގެ މެނޭޖިންގ ޑިރެކްޓަރ މުޙައްމަދު ސައިމަން ވިދާޅުވެއްޖެއެވެ.

ހުޅުމާލޭގައި ހުންނަ އެމް.ޓީ.ސީ.ސީ ފެރީ ޓަރމިނަލް ހިމެނޭ ސަރަޙައްދަކީ އެރަށުގެ މޫނުމަތިކަމަށްވެފައި، ހުޅުމާލެއަށް ދަތުރުކުރާ ދިވެހިންނަށާއި، ފަތުރުވެރިންނަށް ފަސޭހަކަމާއެކު އެރަށަށް އަރައި ފޭބުމުގެ އިންތިޒާމް ހަމަޖެއްސުމަށްޓަކާ އެޗް.ޑީ.ސީއިން ދަނީ ހުޅުމާލޭ ޖެޓީ ސަރަޙައްދު ތަރައްޤީ ކުރުމުގެ މަސައްކަތް ކުރަމުންނެވެ. ޕީ.އެސް.އެމް ނިއުސްއަށް މަޢުލޫމާތު ދެއްވަމުން އެޗް.ޑީ.ސީގެ މެނޭޖިންގ ޑިރެކްޓަރ މުޙައްމަދު ސައިމަން ވިދާޅުވީ، މޫސުމަށް އަންނަ ބަދަލުތަކާއެކުވެސް، ހުޅުމާލެއަށް ދަތުރުކުރާ ފަރާތްތަކަށް ލުއިފަސޭހަކަމާއެކު ޖެޓީ ސަރަޙައްދު ބޭނުންކުރުމުގެ މަގުފަހިކޮށްދިނުމުގެ ގޮތުން އެ ސަރަޙައްދު ހިޔާ ކުރުމުގެ މަސައްކަތް ވަރަށް ބާރު ސްޕީޑުގައި ކުރަމުންދާ ކަމަށެވެ. އެގޮތުން ޖެޓީ ސަރަޙައްދުގައި ހިޔާކޮށްގެން ހަދާ ވޯކްވޭގެ މަސައްކަތާއި، އެ ސަރަޙައްދުގައި ޖެހުމަށް ހަމަޖެހިފައިވާ ލައިޓްތަކުގެ ކުރިއަށް އޮތް ދެ މަސް ދުވަހުގެ ތެރޭގައި ނިންމާލެވޭނެ ކަމަށް ސައިމަން ވިދާޅުވިއެވެ. އަދި ދޯނި ފަހަރަށާއި، ލޯންޗުތަކަށް ފަސޭހައިން ކައިރިކުރެވޭނެހެން، އެ ސަރަޙައްދުގައި އިތުރު ފިންގަރ ޖެޓީތަކެއް ހެދުމަށް ހަމަޖެހިފައިވާ ކަމަށް ސައިމަން ވިދާޅުވިއެވެ. img:http://s1.psmnews.mv/images/660x400/14847197078754.jpg|ހުޅުމާލެ ޖެޓީ ސަރަޙައްދު - ފޮޓޯ: ޕީއެސްއެމް

"ރީތިކޮށް އޮންނާނެ ގޮތަކަށް ޖެޓީ ސަރަޙައްދު ޑިޒައިން ކުރުމުގެ މަސައްކަތް އަޅުގަނޑުމެން މިދަނީ ކުރަމުން. އެތަނުގެ ވޯކްވޭސްތަކާއި ލައިޓްތައް ހަރުކުރުމުގެ މަސައްކަތް މަހެއް ނުވަތަ ދޮޅުމަހެއްގެ ތެރޭގައި ނިންމާލެވޭނެ. މީގެ އިތުރުން އަޅުގަނޑު ފާހަގަކޮށްލަން ބޭނުން މިހާރު ހުރި ފިންގަރ-ޖެޓީގެ އަދަދު 2 ޖެޓީއަށްވާއިރު، އިތުރު 2 ޖެޓީއެއްގެ ބޭނުން ވަރަށް ބޮޑަށް ޖެހިފައިވާކަން އަޅުގަނޑުމެންނަށް ވަނީ ފާހަގަކުރެވިފައި. އެހެންވީމަ މިއަހަރުގެ ތެރޭގައި އިތުރު 2 ޖެޓީ ހެދުމުގެ މަސައްކަތްވެސް އަޅުގަނޑުމެން ކުރާނަން. އަޅުގަނޑުމެން ބޭނުންވަނީ އެ ސަރަޙައްދަކީ ހުޅުމާލެއަށް ޒިޔާރާތްކުރާ ފަތުރުވެރިންނަށާއި، އަދި ދިވެހިންނަށްވެސް ހިތްފަސޭހަ ސަރަޙައްދަކަށް ހެދުން" އެޗް.ޑީ.ސީގެ މެނޭޖިންގ ޑިރެކްޓަރ މުޙައްމަދު ސައިމަން ވިދާޅުވިއެވެ. img:http://s4.psmnews.mv/images/660x400/14847197747926.jpg|ހުޅުމާލެ ޖެޓީ ސަރަޙައްދު - ފޮޓޯ: ޕީއެސްއެމް

ހުޅުމާލޭ ތަރައްޤީ ކުރެއްވުމުގެ މަޝްރޫޢަކީ ރާއްޖޭގައި ހިންގަމުންދާ ތަރައްޤީގެ މަޝްރޫޢުތަކުގެ ތެރެއިން، އެންމެ ފާހަގަކޮށްލެވޭ އަދި އެންމެ ބިޔަ އެއް މަޝްރޫޢެވެ. ހުޅުމާލޭގައި މިހާރުވެސް 50،000 ވުރެ ބޮޑު އާބާދީއެއް ދިރިއުޅެމުންދެއެވެ. އަދި ތަފާތު ބޭނުންތަކަށް ހަފްތާ ބަންދުތަކުގައި ގިނަ ޢަދަދެއްގެ މީހުން ހުޅުމާލެއަށް ދަތުރުކުރާކަން ފާހަގަކޮށްލެވެއެވެ.