މޯލްޑިވްސް ރިޓަޔަރމަންޓް ޕެންޝަން ސްކީމްގެ މެންބަރުންގެ ތެރެއިން ގެދޮރު ގަތުމަށް އެދޭ މީހުންނަށް އެކަމަށް ބޭނުންވާ ލޯނުގެ ޑައުންޕޭމަންޓްގެ ފައިސާ މޯލްޑިވްސް އިސްލާމިކް ބޭންކް އެމް.އައި.ބީ މެދުވެރިކޮށް ލިބޭނެ އިންތިޒާމް ހަމަޖައްސަވައިފިއެވެ.
ޕެންޝަން އޮފީހުގައި މިއަދު ބޭއްވެވި ރަސްމިއްޔާތެއްގައި ޕެންޝަން އޮފީހާއި އިސްލާމިކް ބޭންކާ ދެމެދުގައި ވަނީ މިކަމުގެ އެއްބަސްވުމެއްގައި ސޮއިކުރައްވާފައެވެ.
މޯލްޑިވްސް ރިޓަޔަރމަންޓް ޕެންޝަން ސްކީމްގެ މެމްބަރުންގެ ތެރެއިން ގެދޮރުގަތުމަށް އެދޭ ފަރާތްތަކަށް އެކަމަށް މަގުފަހިކޮށްދެއްވުމަށްޓަކައި، ކަމާގުޅޭ މުއައްސަސާތަކާއެކު ޕެންޝަން އޮފީހުން ގެންދަވަނީ މަސައްކަތްކުރައްވަމުންނެވެ.
އެ ގޮތުން ގެދޮރު ގަތުމަށް، ޕެންޝަން ފަންޑުގައި ހުރި ފައިސާ ކޮލެޓަރައިޒްކޮށްގެން ޢާންމުކޮށް ހުޅުވާލައިގެން ވިއްކާ ގެދޮރު ގަތުމަށްޓަކައި ބޭނުންވާ ލޯނުގެ ޑައުންޕޭމަންޓްގެ ފައިސާ އެމް.އައިބީ މެދުވެރިކޮށް ލިބޭނެ އިންތިޒާމް މިވަނީ ހަމަޖައްސަވާފައެވެ.
ޕެންޝަން އޮފީހުގައި ބޭއްވެވި ރަސްމިއްޔާތެއްގައި މިކަމާގުޅޭ އެއްބަސްވުމުގައި ވަނީ ސޮއިކުރައްވާފައެވެ. ޕެންޝަން އޮފީހުގެ ފަރާތުން މި އެއްބަސްވުމުގައި ސޮއިކުރެއްވީ ސީއީއޯ މުޙައްމަދު ޙަސަން މަނިކެވެ. އިސްލާމިކް ބޭންކްގެ ފަރާތުން ސޮއިކުރެއްވީ ސީއީއޯ ހާރިޘް ހާރޫނެވެ.
މި ރަސްމިއްޔާތުގައި ވާހަކަ ދައްކަވަމުން ޕެންޝަން އޮފީހުގެ ސީއީއޯ މުޙައްމަދު ޙަސަން މަނިކު ވިދާޅުވީ ޕެންޝަން ސްކީމްގައި ބައިވެރިވެފައިވާ ހުރިހާ އެންމެންނަށް މި އެއްބަސްވުމުގެ ސަބަބުން ޖުމްލަ ގޮތެއްގައި އެ ފުރުޞަތު ފަހިވެފައިވާކަމަށް ޤަބޫލުކުރައްވާ ކަމުގައެވެ.
"މި ސްކީމަކީ މެމްބަރުންގެ ހައުސިންގ ނީޑްސް އަށް އެޑްރެސްކުރުމަށް ހުޅުވާލާފައި އޮތް ސްކީމެއް. އެއީ މިވަގުތު ރާއްޖެ އަށް އެންމެ ދަތި ކަމެއްގެ ގޮތުގައި ފާހަގަކުރެވެނީ. އަދި ސަރުކާރުން ވެސް ވަރަށް ބޮޑު އަހައްމިއްޔަތެއް ދީގެން ކުރައްވާ މަސައްކަތެއް. އަދި ތަފާތު ޕްރައިވެޓް ސެކްޓްރ އަދި ޕަބްލިކް ސެކްޓަރ އިން ވެސް މިހާރު އާންމުކޮށް ފްލެޓް އަޅައި ވިއްކަމުން އެބަގެންދޭ. އެ ގަންނަ ފަރާތްތަކަށް މި ޕެންޝަން ފަންޑުގެ ފައިސާ ހުރި ފަރާތްތަކަށް ދަތިނުވެ އެ ފައިސާ ބޭނުންކޮށްގެން ގެދޮރު ގަތުމުގެ ފުރުޞަތު އަޅުގަނޑުމެން މި ހުޅުވާލަނީ" ޕެންޝަން އޮފީހުގެ ސީއީއޯ މުޙައްމަދު ޙަސަން މަނިކު ވިދާޅުވިއެވެ.
މި ރަސްމިއްޔާތުގައި އިސްލާމިކް ބޭންކުގެ ސީއީއޯ ހާރިޘް ހާރޫން ވިދާޅުވީ މި ސްކީމްގެ ދަށުން ގެދޮރު ގަންނަން ބޭނުންވާ ފަރާތްތަކަށް އިސްލާމިކް ބޭންކުން ލުއިފަސޭހަ ގޮތްތަކެއް ހޯދައިދީ، އެހީތެރިކަން ދޭނެކަމަށެވެ.
"ގެދޮރު ގަންނަން ބޭނުންވާ ފަރާތްތަކަށް މި ސްކީމްގެ ސަބަބުން ލުއި ފަސޭހަތަކެއް ލިބިގެންދާނެ ކަމަށް އުއްމީދުކުރަން. މިކަމަށް ބޭނުންވާ އެހީތެރިކަން އިސްލާމިކް ބޭންކުން ފޯރުކޮށްދޭނެ." ހާރިސް ވިދާޅުވިއެވެ.
މި ސްކީމްގެ ދަށުން ގެދޮރު ގަންނަ ފަރާތްތަކަށް ލޯނުގެ ޑައުންޕޭމަންޓް ފައިސާ އިސްލާމިކް ބޭންކްގެ އިތުރުން ބޭންކް އޮފް މޯލްޑިވްސްއާއި ހައުސިންގ ޑިވެލޮޕްމަންޓް ކޯޕަރޭޝަން، އެޗް.ޑީ.އެފް.ސީން ލިބޭނެ އިންތިޒާމްވެސް ޕެންޝަން އޮފީހުން ވަނީ ހަމަޖައްސާވާފައެވެ. އަދި އިތުރު ބޭންކްތަކުންވެސް މި އިންތިޒާމް ހަމަޖެއްސެވުމުގެ މަސައްކަތްވެސް ކުރައްވަމުން ގެންދަވާކަމަށް ޕެންޝަން އޮފީހުން ހާމަކުރައްވައެވެ.