އިސްލާމިކް މިނިސްޓްރީން ކުރިއަށް ގެންދަވާ މިސްކިތް އިމާރާތްކުރެއްވުމުގެ މަޝްރޫޢުގެ ދަށުން، 10 މިސްކިތެއް ހުޅުއްވުމަށް ތައްޔާރުވެވަޑައި ގަންނަވަމުންގެންދަވާ ކަމަށް މިނިސްޓްރީ އޮފް އިސްލާމިކް އެފެއާރޒުން ހާމަކުރައްވައިފިއެވެ.
ރާއްޖޭގެ އެކިކަންކޮޅުތަކުގައި މިސްކިތް އިމާރާތްކުރުމުގެ 21 މަޝްރޫޢެއް އިސްލާމިކް މިނިސްޓްރީން ކުރިއަށް އެބަގެންދަވައެވެ. މީގެ ތެރެއިން ގިނަ މަޝްރޫޢު މިއަހަރު ނިމިފައިވާއިރު، އަލަށް 10 މިސްކިތެއް ހުޅުވުމަށް ތައްޔާރުވެވަޑައިގަންނަމުން ގެންދަވާ ކަމަށް މިނިސްޓްރީން ވިދާޅުވެއެވެ.
ޕީއެސްއެމް ނިއުސްއަށް ދެއްވި އިންޓަރވިއުއެއްގައި މިނިސްޓަރ އޮފް ސްޓޭޓް ފޮރ އިސްލާމިކް އެފެއާރޒް އަލީ ވަޙީދު ވިދާޅުވީ، ޢިމާރާތްކުރުމުގެ މަސައްކަތް ނިންމަވާ އަލަށް މިސްކިތް ހުޅުވުމަށް ހަމަޖެހިފައިވާ ބައެއް އަތޮޅުތަކުގެ ތެރޭގައި ފ، މ، އދ އަދި ގދ ގެ ބައެއް ރަށްތަށް ހިމެނޭ ކަމަށެވެ. މީގެ ތެރޭގައި ފ.މަގޫދޫ، މ.ކޮޅުފުށި، އދ.ކުނބުނރުދޫގައި އިމާރާތްކުރައްވާފައިވާ މިސްކިތްވެސް ހިމެނެއެވެ.
ސަރުކާރުގެ ބަޖެޓުން ޚަރަދުކުރައްވައިގެން މިސްކިތް ޢިމާރާތްކުރެއްވުމުގެ މަޝްރޫޢު ކުރިއަށް ގެންދަވަނީ ސަޢުދީ ސަރުކާރުގެ ހިލޭ އެހީއާއި، ސަޢުދީ ރަސްގެފާނުގެ ހިލޭ އެހީއާއި އަދި ހެޔޮއެދޭ ފަރާތްތަކުގެ ދީލަތި އެހީގައެވެ. މީގެއިތުރުން ސަރުކާރުން ވޭތުވެދިޔަ 3 އަހަރުގެ ތެރޭގައި 21 މިސްކިތެއް ބިނާކުރައްވާ ރައްޔިތުންނަށް ބޭނުންކުރެވޭނެ އިންތިޒާމުތައް ހަމަޖައްސަވާދެއްވާފައިވެއެވެ.