"ނިވާކަން ކުޑަކޮށް ހެދުން އަޅާ ބިދޭސީންނާމެދު ޤާނޫނީ ފިޔަވަޅު އަޅާނެ"
-
ބިދޭސީންނާ ހަވާލުވެތިބި ފަރާތްތަކަށް ސަމާލުކަން ދިނުމަށް ނަސޭހަތްތެރިވި
-
ފަތުރުވެރިންވެސް އާންމު މިންގަނޑުތަކާ ޚިލާފު ނުވުމަށް ނަސޭހަތްތެރިވާން އެންގި
އާންމު އަޚްލާގީ މިންގަނޑާ ޚިލާފަށް ހެދުން އަޅާ ފަރާތްތަކާމެދު ޤާނޫނީ ފިޔަވަޅު އަޅާނެ ކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.
ދިވެހި ފުލުހުންގެ ޚިދުމަތުން މިހެން ވިދާޅުވީ ރާއްޖޭގެ އިޖުތިމާޢީ އާންމު އަޚްލާގީ މިންގަނޑާ ޚިލާފަށް ބައެއް ބިދޭސީން ހެދުން އަޅާކަން ފާހަގަކުރެވިގެން އެކަން ނުކުރުމަށް ނަސޭހަތްތެރިވެ ނެރުނު ބަޔާނެއްގައެވެ.
ދިވެހި ފުލުހުންގެ ޚިދުމަތުން ވިދާޅުވީ ދިވެހި މުޖުތަމަޢަުގެ އަޚްލާގީ އަދު އާންމު އިޖުތިމާޢީ މިންގަނޑުތައް ހިފެހެއްޓުމަކީ ރާއްޖޭގައި ދިރިއުޅޭ ކޮންމެ މީހަކުވެސް އަދާކުރަންޖެހޭ މަސްއޫލިއްޔަތެއް ކަމަށާއި ރާއްޖޭގައި އުޅޭ ބިދޭސީންވެސް ދިވެހި މުޖުތަމަޢުުގެ ސަގާފަތާއި އާދަކާދައަށް އިހުތިރާމްކޮށް އާންމު ތަންތަނާއި މަގުމަތީގައި އުޅޭއިރު މަސްއޫލިއްޔަތު އަދާކުރަންވާނެ ކަމަށެވެ.
މިހާރަކަށް އައިސް ރާއްޖޭގައި ދިރިއުޅޭ ބައެއް ބިދޭސީން އާންމު އިޖުތިމާޢީ މިންގަނޑުތަކާ ޚިލާފަށް ނިވާކަން ކުޑަ ހެދުން އަޅައިގެން މަގުމައްޗާއި އާންމު ތަންތަނުގައި އުޅޭކަން ފުލުހުންނަށް ފާހަގަކުރެވިފައިވާކަމަށް އެ ޚިދުމަތުން ވިދާޅުވިއެވެ. އެ ބިދޭސީންގެ މި އަމަލުތަކަކީ މުޖުމަތަމަޢުގެ ސުލޫކީ އަދި އަޚްލާގީ މިންގަނޑުތަކާ ޚިލާފު އަމަލުތަކެއް ކަމަށާއި އޭގެ ސަބަބުން އަމާންކަމާއި ސުލްހަ މަސަލަސްކަމަށް ނޭދެވޭ އަސަރުކޮށްފާނެފަދަ ހާލަތެއް ކުރިމަތިވުމުގެ ކުރިން ފުލުުހުންނާ މަތިކޮށްފައިވާ ޒިންމާއަދާކޮށް ފިޔަވަޅު އަޅާނެ ކަމަށް އެ ޚިދުމަތުން ވިދާޅުވިއެވެ.
ފުލުހުން ވަނީ ރާއްޖޭގައި ދިރިއުޅޭ ބިދޭސީންގެ ފަރާތުން އެފަދަ އަމަލުތައް ނުފެންނާނެ ގޮތަށް އެ ބިދޭސީންގެ އަމަލުތައް ބެހެއްޓުމަށް ސަމާލުކަން ދިނުމަށް އެ ފަރާތްތަކާ ހަވާލުވެތިބޭ ފަރާތްތަކަށް އިލްތިމާސްކޮށްފައެވެ.
ރާއްޖޭގައި ދިރިއުޅޭ ބިދޭސީންގެ އިތުރުން ރާއްޖެއަށް ޒިޔާރަތްކުރާ ފަތުރުވެރިންވެސް އެ ފަރާތްތަކަށް ޚާއްސަކޮށްފައިވާ ސަރަހައްދުތައް ފިޔަވައި އާންމު ތަންތަނުގައި އުޅޭއިރު ދިވެހިންގެ ސަގާފަތާއި އާދަކާދައަށް އިހުތިރާމުކޮށް އިޖުތިމާޢީ މިންގަނޑުތަކާ އެއްގޮތަށް އުޅުމަށް ސަމާލުކަން ދިނުމަށް ފަތުރުވެރިން ރާއްޖެ ގެންނަ ފަރާތްތަކަށްވެސް ފުލުހުން ވަނީ އިލްތިމާސްކުރައްވާފައެވެ. އަދި ފުލުހުންގެ މި އިލްތިމާސްތަކާ ޚިލާފަށް އަމަލުކުރާ ފަރާތްތަކާމެދު ޤާނޫނީ ފިޔަވަޅު އަޅާނެ ކަމަށް އެ ޚިދުމަތުން ވަނީ ވިދާޅުވެފައެވެ.