8ވަނަ "އަހާ" ފޯރަމް އާދިއްތަ ދުވަހުގެ ރޭ
-
އިޤުތިސާދީ ވަޒީރާއި ދިފާޢީ ވަޒީރު އަދި ބަންޑާރަނައިބު ބައިވެރިވެވަޑައިގަންނަވާނެ
-
ފޯރަމް އޮންނާނީ އާދިއްތަ ދުވަހުގެ ރޭ 21:00ގައި
ސަރުކާރުގެ ވުޒާރާތަކުން ކުރަމުން އަންނަ މަސައްކަތްތަކާބެހޭ މަޢުލޫމާތު ހިއްސާކުރުމަށް ބާއްވާ "އަހާ" ފޯރަމްގެ 8ވަނަ ފޯރަމް އާދިއްތަ ދުވަހުގެ ރޭ އޮންނާނެއެވެ.
މިއީ، ސަރުކާރުގެ އެކި ވުޒާރާތަކާއި އިދާރާތަކުގެ މަސައްކަތްތައް ވީހާވެސް ތަފްޞީލުކޮށް އާންމުންނާ ހަމައަށް ގެނެސްދިނުމަށް، ރައީސުލްޖުމްހޫރިއްޔާގެ އޮފީހާއި ޕަބްލިކް ސަރވިސް މީޑިއާ، ޕީއެސްއެމް ގުޅިގެން ގެނެސްދޭ ފޯރަމެކެވެ.
މި ފޯރަމަކީ ސަރުކާރުގެ ވުޒާރާތަކާއި އިދާރާތަކުގެ މަސައްކަތްތަކާ ގުޅޭގޮތުން އެކަމުގެ މަސްޢޫލުވެރި އެންމެ އިސް ފަރާތްތަކާ ސުވާލުކޮށް ރައްޔިތުންގެ ޝަކުވާތަކަށް ޖަވާބު ހޯދުމަށް ސަރުކާރުން ހުޅުވާލާފައިވާ ފުރުޞަތެކެވެ.
8ވަނަ "އަހާ" ފޯރަމްގައި ބައިވެރިވެ ވަޑައިގަންނަވަނީ:
އިޤުތިޞާދީ ތަރައްޤީއާއި ދަތުރުފަތުރާ ވިޔަފާރިއާ ބެހޭ ވަޒީރު މުޙައްމަދު ސަޢީދު
ދިފާޢީ އަދި ވަތަނީ ޚިދުމަތާ ބެހޭ ވަޒީރު ޙަސަން ރަޝީދު
ބަންޑާރަނައިބު އަލްއުސްތާޛު އަޙްމަދު އުޝާމް
ދެ ގަޑިއިރަށް ކުރިއަށްގެންދާ މި ފޯރަމުގައި ބައިވެރިވެ، ވަޒީރުންނާ ކުރަން ބޭނުންވާ ސުވާލުތައް ފޮނުވުމުގެ ފުރުޞަތު މިހާރު އާންމުންނަށް ވަނީ ހުޅުވާލާފައެވެ.
ފޯރަމް އޮންނާނީ، އާދިއްތަ ދުވަހުގެ ރޭ 21:00ގައެވެ.
ފޯރަމްގައި ބައިވެރިވުމަށް ފޯރަމް އޮންނަ ތަނަށް ގޮސް ސުވާލުކުރެވޭނެއެވެ. މީގެއިތުރުން ފޯރަމް ކުރިއަށްދާ ވަގުތު، ފޭސްބުކް، އެކްސް އަދި ޕީއެސްއެމް އެއަރ އެޕް މެދުވެރިކޮށްވެސް ވަޒީރުންނާ ސުވާލު ކުރެވޭނެއެވެ.
ރައީސުލްޖުމްހޫރިއްޔާގެ އޮފީހާއި، ޕީއެސްއެމް ގުޅިގެން ކުރިއަށްގެންދާ "އަހާ" ސިލްސިލާ ފޯރަމްތައް ފަށާފައިވަނީ، 2024 ވަނަ އަހަރުގެ ޖެނުވަރީ މަހުގެ ތެރޭގައެވެ.
ސަރުކާރުގެ މަސައްކަތްތަކާ ގުޅޭ ތަފްސީލުތައް ރައްޔިތުންނާއި ވީހާވެސް ގާތުން ޙިއްސާކުރުމަށް ތަފާތު ޕްރޮގްރާމުތައް އަންނަނީ ކުރިއަށް ގެންދަމުންނެވެ. ވަޒީރުންގެ ފޯރަމުގެ އިތުރުން ރައްޔިތުންނަށް ސީދާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި ބައްދަލުކުރައްވާ ކަންބޮޑުވުންތައް ހިއްސާކުރުމުގެ ފުރުޞަތު ފަހިކޮށްދިނުމަށް "ރައްޔިތުންގެ އަޑު"ގެ ނަމުގައި ޚާއްސަ ސިލްސިލާ ޕްރޮގްރާމެއް އަންނަނީ ގެންނަމުންނެވެ.
އަދި ސަރުކާރުގެ ސިޔާސަތުތަކާއި، މަސައްކަތްތަކާ ގުޅޭ މަޢުލޫމާތު ހިއްސާކުރުމަށް ޕީއެސްއެމްއާ ގުޅިގެން "ނޭޝަން ޗެޓް"ގެ ނަމުގައިވެސް ރައީސުލްޖުމްހޫރިއްޔާ ބައިވެރިވެ ވަޑައިގަންނަވާ ޚާއްސަ ސިލްސިލާ ޕްރޮގްރާމެއް އަންނަނީ ގެނެސްދެމުންނެވެ.
މީގެއިތުރުން ވުޒާރާތަކުގެ ނޫސްވެރިންގެ ބައްދަލުވުންތައްވެސް އަންނަނީ ބާއްވަމުންނެވެ.